كلنا بنحب وبنحرص على الحصول على بشرة جسم ناعمة ومشدودة أيًا كان نوع بشرتنا. علشان كده، بينصح دايمًا بعمل سكراب للجسم (تقشير) من مرة لتلات مرات في الأسبوع حسب نوع البشرة. بس إيه هو السكراب أصلًا؟ هو مستحضر سواءً اشترتيه جاهز أو عملتيه في بيتك، دوره إنه يزيل الدهون وطبقة الجلد الميتة من على الجسم باستخدام أدوات مساعدة بتساعد على زيادة فاعليته وبتلاحظي دايمًا اختلاف في تألق بشرة جسمك.
وده طبعًا له تأثير وفوائد كتير جدًا زي إنها بتساعد بشرة جسمك على التنفس وزيادة إنتاج الكولاجين تحت الجلد اللي له تأثير مباشر على شد الجلد وزيادة قوته. ده غير إنه دايمًا بيدّي الإحساس بالاسترخاء لأن الحركة الدائرية اللي بتستخدميها وانتي بتعملي سكراب بتساعد على استرخاء العضلات. علشان كده، بتحسي دايمًا إن وقت السكراب ده هو وقتك الخاص اللي هتلاقي نفسك حريصة تستمتعي بيه بشكل منتظم.
الشكل المنتظم أو عدد مرات عمل سكراب الجسم في الأسبوع بيكون: لو كنتي من أصحاب البشرة الجافة، مرة واحدة في الأسبوع وخليكي حريصة دايما على ترطيب جسمك بعد السكراب. البشرة العادي بينصح دايمًا إنها تعمله مرتين في الأسبوع. والبشرة الدهنية والمحتلطة من مرتين لتلات مرات في الأسبوع مع الحرص برضه على الترطيب بعد الانتهاء منه.
دلوقتي لازم تعرفي إن فيه شوية أدوات هتحتاجي إنك توفريها طالما قررتي تعملي سكراب للجسم في البيت:
- معلقة للخلط.
- وعاء للخلط.
- معلقة للعيار أو وعاء مدرج
- زيت أساسي زي جوز الهند أو الجوجوبا أو اللوز أو الزيتون أو بذور العنب.
- سكر ناعم (مش مطحون) أو ملح أو بن.
- برطمان بغطاء محكم.
- زيتك العطري المفضل.
بتوفر الأدوات السابقة دي، بيكون معاكي الأساس اللي تقدري تبدعي فيه وتعملي أنواع سكرابات مختلفة بتتناسب مع نوع بشرتك أو مع هدفك المقصود من السكراب ده. خلينا نبتدي بأشهر وأسهل وصفات السكراب اللي سهل عليكي تنفذيها في البيت وتستفيدي منها.
-
سكراب القهوة مقشر للجسم (مقاوم ومعالج للسيلوليت):
من مميزات السكراب ده إن القهوة لها دور فعال على تخفيف أثر السبلوليت من الجسم، والحلو فيه كمان إن حبيبات القهوة ناعمة جدًا وده بيخليها لطيفة جدًا على البشرة وفي نفس الوقت فعالة في إزالة خلايا الجلد الميتة، ده غير رائحة القهوة الممتعة. تعالي شوفي إزاي بتعملي السكراب ده:
- نص فنجان قهوة
- معلقتين كبار مياه سخنة
- معلقة كبيرة زيت جوز الهند دافيء
اخلطي كل دول مع بعض لحد ما تحصلي على قوام ناعم زي النوتيلا، مش سايلة ولا صلبة، علشان تقدري تستخدميه بسهولة ويغطي جسمك بسهولة.
اعرفي من هنا طرق ووصفات طبيعية للتخلص من السيلوليت
-
سكراب ملح البحر مقشر للجسم:
من الوصفات السهلة وبتتميز إنها خالية من أي روائح ممكن تسبب تهيج للبشرة، ده غير إنه مقاوم للبكتيريا. علشان كده يعتبر من أفضل الوصفات للبشرة الجافة وكمان مناسب لأنواع البشرة الأخرى. بس خلي بالك دايمًا لو فيه أي جرح في البشرة أو تهيج إنك تتجنبي السكراب ده لأنه ممكن يؤثر بشكل سلبي عليكي ويحسسك بالحرقان.
دايمًا لما تيجي تعملي السكراب ده، اطحنى الملح لأنه يعتبر خشن زيادة على البشرة لكن مع طحنه هتحسي إنه لطيف. لو تحبي، تقدري تزودي بعض النقط من زيتك العطري المفضل علشان تستمتعي بفوايده والرائحة الحلوة. وعلشان تعملي الماسك ده هتحتاجي الآتي:
- نص كوب من الملح المطحون.
- نص كوب من أي زيت من الزيوت الأساسية.
- بعض النقط من زيتك العطري المفضل.
هتخلطيهم مع بعض بجيث تحصلي على القوام المتناسق وبرضه لا سائل ولا صلب علشان سهولة الاستخدام.
-
سكراب العسل:
العسل معروف عنه قدرته على مقاومة البكتيريا، بجانب قدرته على تجديد الأنسجة والخلايا، وكل ده بشرط إن العسل يكون طبيعي 100%. السهل فيه إنك ممكن تخلطيه بالسكر أو الملح أو القهوة أو حتى القرفة مع واحد من الزيوت الأساسية هتلاحظي إن بيساعد على زيادة تألق البشرة وتفتيح لونها
وعلشان تعمليه هتحتاجي للآتي:
- نص كوب من الملح أو السكر أو قهوة أو القرفة
- نص كوب من زيت جوز الهند
- معلقتين من العسل الأبيض
اخلطي كله مع بعض لحد ما تحصلي على القوام المتماسك وإستخدميه بإنتظام للحصول للنتيجة المطلوبة .
دي أسهل طرق لعمل السكراب وهتلاقي مكونات منها أكيد في البيت. لازم تتعلمي تحبي نفسك، ومن مظاهر حبك لنفسك اهتمامك ببشرتك واللي بتحتاج سكراب على الأقل مرتين في الأسبوع. جربي تنتظمي عليه وهتلاحظي الفرق في وقت قصير.
التعليق باستخدام حساب فيس بوك