محتويات المقال
في زمن الكورونا، المناعة بقت هي أهم كنز يمتلكه الإنسان، بقينا نسمع كلمه المناعة خمسين مرة في اليوم، في التليفزيون، في الجرايد، في مواقع التواصل الاجتماعي. طول الوقت بنسمع إن لازم نقوي المناعة ونهتم بالتغذية السليمة، اللي هتساعد أجسامنا تكون قوية عشان تتخطى الفيروس اللي محير العالم كله. والكلام ده فعلًا سليم وحقيقي جدًا، وضروري جدًا للشخص السليم وكمان المصاب بالكورونا إنه يهتم بتغذيته كويس جدًا. عشان كده، كل الجهات المسئولة عن الصحة في العالم كله طول الوقت تصدر بيانات بأهمية التغذية وبأنواع المأكولات والمشروبات المفيدة لمناعة الجسم. فمثلًا منظمة الصحة العالمية ذكرت إن كل شخص بيحتاج حوالي 400 جم من الخضار والفاكهة بشكل يومي ممكن يقسّمهم على خمس حصص في اليوم. عشان كده، النهارده هنقدم لكم خمس وصفات لسلطات مليانة بالخضراوات وكمان الفواكه الغنية بالفيتامينات والمعادن ومضادات الأكسدة اللي هتساعد بشكل كبير أي مريض كورونا على إنه يقاوم المرض وتقوي من مناعة جسمه وكمان تفتح شهيته للأكل.
سلطة البنجر بالبرتقال
مصدر الصورة: happyfoodstube
المقادير
- 3 حبات بنجر مسلوق
- أوراق الخس والجرجير
- 1 ثمرة برتقال مقشرة ومقطعة جوانح
- 1/2 ثمرة بصل أحمر مقطعة جوانح
- 3 أعواد كرفس مقطعة مكعبات صغيرة
- بشر برتقاله
- 2 معلقة كبيرة من الحبوب المشكله(بذر الكتان-بذور عباد الشمس-سمسم-بذور الشيا)
لتحضير الدريسينج
- ملح وفلفل
- 1/4 كوب زيت زيتون
- 1/4 كوب عصير برتقال
- 2 معلقة صغيرة مسترد
- 2 معلقة صغيرة عسل أبيض
- 1 فص توم مهروس
الطريقة
- إخلطي كل مكونات الدريسينج مع بعض في الخلاط وسيبيه على جنب.
- في طبق التقديم رصي كل مكونات السلطة، وفوقها ضيفي بشر البرتقان والبذور.
- صبي الدريسينج مباشرة قبل التقديم.
سلطة البروكلي مع الجزر والفواكه المجففة
مصدر الصورة: spendwithpennies
المقادير
- 2 كوب زهرات البروكلي (قطعيها بأحجام صغيرة وتقدري تضيفيها للسلطة نية تمامًا أو مستوية على البخار)
- أوراق الخس والكيل
- 1/2 كوب فواكة مجففة من اختيارك (مشمشة-قراصيا-زبيب-توت مجفف)
- 1 كوب جزر مبشور
- 1/4 كوب لوز شرايح
- 1/2 ثمرة بصل أحمر مقطعة مكعبات
للدريسينج:
- 1 كوب زبادي يوناني
- 2 معلقة كبيرة زيت زيتون
- عصير ليمون
- ملح وفلفل أسود
- 1/2 معلقة صغيرة كركم
- 1/2 معلقة صغيرة بودرة التوم
الطريقة
- اخلطي كل مكونات الدريسينج مع بعض في الخلاط وسيبيه في التلاجة لوقت التقديم.
- في طبق التقديم رصي كل مكونات السلطة.
- صبي الدريسينج مباشرة قبل التقديم.
سلطة خضراء مع الحمص
مصدر الصورة: pinterest
المقادير
- 2 ثمرة طماطم مقطعة مكعبات
- 2 ثمرة خيار مقطعة مكعبات
- 2 ثمرة فلفل أخضر مقطعة مكعبات
- 1 ثمرة فلفل أحمر مقطعة مكعبات
- 2 حزمة بقدونس مفروم
- 3 حبات بصل أخضر مقطعة مكعبات
- 2 ثمرة فجل مقطعة مكعبات
- 1 كوب حمص مسلوق
لتحضير الدريسينج
- 1/4 كوب عصير ليمون
- 1/2 كوب زيت زيتون
- 1 فص توم مهروس
- 2 معلقة صغيرة سماق
- ملح وفلفل أسود
- 1 معلقة صغيرة كمون
الطريقة
- اخلطي كل مكونات الدريسينج مع بعض في الخلاط وسيبيه في التلاجة لوقت التقديم.
- اخلطي كل مكونات السلطة مع بعض واغرفيها في طبق التقديم.
- صبي الدريسينج مباشرة قبل التقديم وامزجيه مع السلطة.
سلطة الخضراوات المشوية
مصدر الصورة: prouditaliancook
المقادير
- 3 أكواب من الخضراوات المشوية المشكلة (باتنجان مكعبات-كوسة-فلفل ألوان-بصل)
- أوراق السلطة المشكلة (خس-جرجير-أعشاب)
- 1/2 كوب حبوب الرمان
- أوراق النعناع الأخضر
- للدريسينج
- 1/4 كوب خل بلسمي
- 1/2 كوب زيت زيتون
- ملح وفلفل
- عصير ليمون
- 1 فص توم مهروس
الطريقة
- اخلطي كل مكونات الدريسينج مع بعض في الخلاط وسيبيه على جنب لوقت التقديم.
- تشوى الخضراوات مفرودة في صينية فرن واسعة مع رشة من زيت الزيتون والملح والفلفل.
- في طبق التقديم، وزعي الخضراوات المشوية فوق طبقة الخضراوات وزينيها بحبوب الرمان وأوراق النعناع.
- صبي الدريسينج مباشرة قبل التقديم.
سلطة الفراولة مع الأفوكادو والسبانخ
مصدر الصورة: ambitiouskitchen
المقادير
- 2 كوب فراولة مقطعة شرايح
- أوراق السبانخ
- 1/2 كوب بيكان، أو عين جمل، أو فستق
- 1 ثمرة أفوكادو مقطعة شرايح
- 1/2 كوب جبنة قريش
لتحضير الدريسينج
- ملح وفلفل
- 1/2 كوب زيت زيتون
- 1/4 كوب عصير ليمون
- 1/4 كوب خل بلسمي
- 1 معلقة كبيرة عسل أبيض
الطريقة
- اخلطي كل مكونات الدريسينج مع بعض في الخلاط وسيبيه في التلاجة لوقت التقديم.
- في طبق التقديم رصي شرايح الفراولة والأفوكادو فوق أوراق السبانخ، زينيها بالبيكان وقطع الجبنة القريش.
- صبي الدريسينج مباشرة قبل التقديم وامزجيه مع السلطة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك