بعد التعليم الأونلاين، وتعوّد وسهولة استخدام الأطفال طول الوقت وبقى اليوتيوب متاح بمنتهى السهولة قدامهم، فبقوا معرضين أكتر إنهم يشوفوا مشهد مش مناسب لسنهم أو حاجة مش مفروض يشوفوها! وطبعًا ده بيفتح علينا أبواب كتير ما لهاش لازمة وبيوترنا جدًا. عشان كده، في المقال ده، هاقول لك إيه أنسب طريقة نقدر نتصرف بيها لما ولادنا يشوفوا مشهد إباحي بالغلط.
طريقة التعامل مع مشاهدة الأطفال لـ مشاهد إباحية
- رد الفعل الأول
لو اكتشفتي إن ده حصل بالصدفة من غير ما ابنك ييجي يقول لك، فمهم جدًا إن رد فعلك ما يبقاش عنيف وما يبقاش فيه إتهام له إنه شافه قصد أو اتهام بالكذب عشان ما جاش قال لك أو خبى الموضوع. وضع الاتهام نفسه بيحط الطفل في وضع الدفاع عن النفس هيخليه يخاف ويصدّق إنه السبب في إنه شاف مشهد غلط وممكن يلجأ للكذب بعد كده.
- اشكريه
لما طفلك ييجي يقول لك على اللي شافه، أول حاجة لازم تعمليها هي إنك تشكريه على صدقه، وعلى إنه لجأ لك وطلب مساعدتك. وكمان على حكمه على الأمور، وإنه عرف إن ده مشهد مش صح يشوفه، عشان الطفل يتطمن إنه يقدر يرجع لك في أي حاجة من غير أحكام أو اتهام.
- فهميه
بعد كده، ابدأي كلميه واشرحي له إيه اللي شافه ده بطريقة بسيطة، وإن المشهد ده شيء خاص بيحصل بين المتجوزين بس. وعشان ده شيء خاص، وكل ما يكبر والتربية وتعبير عن الحب بينهم، ما ينفعش أي حد تاني يشوفه، عشان كده ده حرام وغلط إنه يظهر قدام الناس.
- والكلام ده طبعًا بيكون على حسب السن وعلى حسب انتي وصلتي لفين مع ولادك في التربية الجنسية واللي لازم دايمًا تكوني سابقة حواليكي فيها بخطوة.
- بعد كده، تتفقوا مع بعض على خطوات يعملها لو تعرض للموقف ده تاني، وشاف مشهد مش مناسب وهو إنه “يقفل عينه بسرعة أو يقفل الجهاز اللي في إيده ويطلب مساعدة من أي حد كبير يثق فيه”.
وطبعًا احنا كأهل نحاول يكون فيه رقابة ومتابعة طول الوقت والأطفال ما يقعدوش بالأجهزة لوحدهم من غير ما نكون عارفين بيتعرضوا لإيه وبيشوفوا إيه، ونكون جاهزين دايمًا لكل أسئلتهم ونجاوب عليها بمنتهي الصدق بطريقة بسيطة عشان ما يضطروش يلجأوا إنهم يعملوا سيرش ويلاقوا إجابات ترضي فضولهم ويا عالم صحتها إيه.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك