محتويات المقال
“عارف لو كلت هتبقى قوي جدًا وشاطر”
“لو كلت الأكل كله هجبلك الحاجة الحلوة اللي بتحبها”
” يا ابني ابلع الأكل اللي في بقك”
“طيب خد حتة من الساندوتش حتى”
“طيب تعالى شم الأكل”
كل الأقوال المأثورة دي ما هي الأ عينة من محايلات ومهاترات يومية مع ابني عشان يرضى ياكل.. وفي الآخر بتتحول المناقشات والخلافات لنوبة غضب ساعة عشان عاوز بيضة كيندر أو نوتيلا ومش عاوز يتغدى وأهون عليه يلبس الأكل في راسه ولا ياكله أبدًا.. وانا بتحول لهالك في نوبة غضب وعياط ساعات هي جت عليا يعني بتكون على شكل برطمة “عنك ما كلت” “وانا مالي” “أنا كمان عاوزة ماما” “خلاص مش قادرة جبت أخري” مع صويت ونحيب عبلة كامل ستايل واحيانًا للإستسلام بالأمر الواقع ما كل العيال محبوسة في البيت حرام نديهم أي حاجة حلوة اسمهم كلوا أي حاجة.
بعد عاصفة التنين اللي كل العيال قعدت من ساعتها في البيت ومفيش حضانة ولا فسح، عملت دراسة كده مع نفسي اكتشفت إن 90% من الأمهات اللي حواليا بيشتكوا نفس الشكوى: “ابني ولا بنتي مش عايز ياكل”، “بيحوش الأكل في بقه”، “بيعيش على كوباية لبن طول النهار”، “عايز ياكل حاجات حلوة وبس” “كل العيال نفسها مسدودة ومبتاكلش”. واكتشفت إن لو الأطفال قعدت تاكل في حاجات حلوة طول النهار مش هتقول لأ وهتفتح بقها وترحب جدًا بس مينفعش طبعًا نعمل كده.. وحاولت كتير اعمل سناكس شكلها حلو ولعبتله كل الألعاب D: بس الولاد بيبقوا عارفين إنها مش جاهزة ولا مغلفة فبيرفضوها وبيبقوا عايزينا نشتري ليهم حاجات.. فابتديت ادور على بدايل صحية فيها مكونات طبيعية مغذية لكل الحاجات الجاهزة اللي بيحبوها وخصوصًا الشوكولاتة وهتكلم معاكوا في المقال ده عن البدايل اللي ممكن تشتريها من بره.
1- مافن الكوسة والجزر من Breadfast
2- مشروب بدياشور المغذي
3- ناجتس الفراخ من V-licious
4- صوص الخضروات من The Baby Kitchen
5- الزبادي اليوناني من Lychee
6- بسكويت الشوفان من Lino Oats
7- شوكولاتة سبريد من Ferrobella
8- ميكس الاوميجا 3 من أبو عوف
9- هيلثي بار من ISIS Organics
10- قطع البلح من Sekem Health
مافن الكوسة والجزر من Breadfast
كل الأطفال بيحبوا الكب كيك والمافن وبالذات الجاهز، بريدفاست عملت مافن بالكوسة والجزر مغذية ممكن تقدميها لولادك بديل عن السكريات والكيك اللي بيبقى فيه سكر كتير.
مشروب بدياشور المغذي
مين ولاده مبتحبش عصير الشوكولاتة والسموزي؟ مفيش صح D: .. جربت اخلي العصير والسموزي مغذي أكتر ببدياشور بطعم الفانيلا والشوكولاتة وفيه كمان بطعم العسل وابتكرت عصير الشوكولاتة وآيسكريم ساقع كمان وحطيته في كوبايات جديدة بشاليموه عشان يحس إنه بيشرب عصير زي بره بضبط D: .. وكمان ممكن تستخدميه في عمل البانكيك والكيك والدونتس.
ناجتس الفراخ من V-licious
لو إنتي بتشتغلي ومعندكيش وقت تعملي حاجات مبتكرة لولادك، ناجتس الفراخ على شكل سمك أكيد هتكون مغرية لولادك عشان يجربوها.. وأحلى حاجة في الناجتس دي إن حجمها مناسب ليهم وموجود فيها 7 أنواع خضروات مغذية.
صوص الخضروات من The Baby Kitchen
لو جربتي تأكلي الولاد خضار زي البروكلي أو الأفوكادو لوحده كده مستحيل ياكلوه، بس الأختراع ده عبارة عن صوص جواه خضار مغذي وممكن يتعمل منه مكرونة أو صوص للبيتزا وأهم حاجة إن الولاد بيحبوه جدًا ومش بيحسوا بطعم الخضار نهائي
الزبادي اليوناني من Lychee
ممكن تغيري لولادك شوية وتديهم زبادي يوناني وبيكون جواه جرانولا مقرمشة كل الأطفال بتحبها وكمان فيه عنصر غذائي مهم وهو العسل والفاكهة.
بسكويت الشوفان من Lino Oats
سناك الأطفال المفضل هو البسكوت وطبعًا لو حابة تخليه سناك مغذي، ممكن تجيبي ليهم بسكويت لينو بالشوفان وليه كذا طعم زي الشوكولاتة والتفاح بالقرفة.
شوكولاتة سبريد من Ferrobella
عشق الأطفال الشوكولاتة وطبعًا كلهم بيسألوا عنها ويزنوا عليها، لقيت الشوكولاتة دي بديل للشوكولاتة العادية وكلها فيتامينات ومادن وبستخدمها في ساندوتش أو توست.. بس لازم تسألي الدكتور بتاعك عن الجرعة المناسبة خصوصًا لو بيعاني من نقص الحديد.
ميكس الأوميجا 3 من أبو عوف
أبو عوف عملت ميكس لطيف من المكسرات والفواكه المجففة مفيدة جدًا للولاد وكمان هيحبوها عشان بتيجي في أكياس صغيرة زي أكياس الشيبسي بس لو طفلك سنه صغير خلي بالك ممكن المكسرات تبقى Chocking Hazard.
هيلثي بار من ISIS Organic
ممكن ده تديه سناك مغذي ومشبع لطفلك بيكون جواه شوكولاتة دارك وبلح وجوز هند وليه كذا طعم وولادك هيتبسطوا بيه لانه قريب من طعم الشوكولاتة.
قطع البلح من Sekem Health
الـDate Bites أو قطع البلح بتبقى عبارة عن كور معمولة من البلح وليها كذا طعم مختلف زي الشوكولاتة وجوز الهند وكل الولاد بتحبها عشان صغيرة ومدورة وأهم حاجو إنها مغذية جدًا وبتديهم طاقة.
ودي كانت شوية أفكار بسيطة بنحاول إننا نخلي الأطفال ياكلوا كل اللي بيحبوه من غير حرمان ولو أكل خير وبركة لو مكالوش برضو لا يكلف الله نفسًا الا وسعها بصوت زكريا الدرديري D:
التعليق باستخدام حساب فيس بوك