كلنا بنحتار في أفكار للسحور خلال شهر رمضان، وساعات كتير الأمهات من كتر مشاغلها خلال شهر رمضان، ممكن تنسى نفسها وتفوت وجبة السحور. وبما إن السحور مهم جدًا ليكي عشان يكون نهار الصيام بالنسبة لك مريح وغير مرهق لصحتك ومعدتك، جيبنا لك النهارده مجموعة أفكار سندوتشات لسحور رمضان على السريع جدًا. 7 وصفات سندوتشات مشبعة ولذيذة في 10 دقايق تحضيرها عشان ما تفوتيش وجبة السحور إللي ما تقلّش أهمية عن الفطار نفسه.
كلوب ساندوتش بالبيض وصدور الرومي المدخن
سحور سريع لرمضان – المصدر: bbcfood
المقادير
- بيضة مقلية
- شرايح من صدور الرومي المدخن
- شرايح من جبنة الشيدر (أو أي نوع جبنة صفراء تحبيها)
- شرايح من الخس
- شرايح طماطم
- مايونيز
- 3 قطع من التوست
طريقة عمل كلوب ساندوتش
- حمصي التوست قليلًا في طاسة مدهونة بالزبدة.
- ادهني شريحتيّ توست بالمايونيز، على الشريحة الأولى ضيفي شرايح الخس والطماطم مع قطعة من الجبنة وصدور الرومي المدخن.
- على الشريحة التانية ضيفي شريحة طماطم والبيضة المقلية، رصّي الشريحتين فوق بعض واغلقي الساندويتش بالشريحة التالتة.
- ثبّتي الساندويتش بخلة الأسنان وباستخدام سكين منشار، اقسمي الساندويتش لنصين، وثبتي كل نص بخلة الأسنان.
- قدميه مع سلطة جانبية.
ساندوتش الفول بالطحينة
سندوتشات لسحور رمضان – المصدر: aghapystore
المقادير:
- 3 معالق كبيرة فول مهروس جاهز أو بيتي
- 1 معلقة كبيرة طحينة
- 1 حبة طماطم مبشورة
- ملح
- 1/2 معلقة كمون
- عصير ليمون
- زيت زيتون
- عيش بلدي صغير الحجم
- 1 فص توم مهروس
طريقة عمل ساندوتش الفول بالطحينة
- في طاسة على نار متوسطة، اخلطي كل المكونات مع بعض وقلبيهم كويس لحد ما يسخن الفول وتتجانس كل المكونات.
- افردي خلطة الفول في الخبز البلدي وقدميه مع سلطة خضراء.
لو بتحبي أطباق الفول، ادخلي على اللينك ده عشان تعرفي 5 طرق لعمل الفول على السحور
ساندوتش اللبنة التركية بالزعتر
أفكار سندوتشات لسحور رمضان – المصدر: pinterest
المقادير
- 2 معلقة كبيرة لبنة تركية
- 2 معلقة صغيرة زعتر لبناني
- شرايح خيار
- شرايح طماطم
- زيتون أسود
- أوراق النعناع
- زيت زيتون
- 2 قطعة خبز لبناني، أو تورتيلا
طريقة عمل ساندوتش اللبنة التركية
- قومي بفرد اللبنة على الخبز ووزعيها بشكل متساوي.
- ضيفي الزعتر اللبناني وشرايح الخضروات والزيتون، ورشة خفيفة من زيت الزيتون ولفي الساندويتش على شكل رول وقدميه.
ساندوتش الحمص بالفلفل المشوي
سحور سريع لرمضان – المصدر: julieharringtonrd
المقادير
- 1/4 كوب حمص مطحون معلب
- 2 معلقة كبيرة زيت زيتون
- 1/2 معلقة صغيرة كمون
- 2 معلقة كبيرة عصير ليمون
- شرايح فلفل ألوان مشوي في الفرن (تقدري كمان تضيفي شرايح البتنجان المشوي)
- زيتون أسود بدون بذر
- 1 معلقة كبيرة جبنة فيتا
- خس شرايح
- 2 خبز التورتيلا
طريقة عمل ساندوتش الحمص بالفلفل
- في بولة، اخلطي الحمص المهروس مع الليمون والكمون وزيت الزيتون وقلبيهم كويس.
- جهزي الساندوتش: افردي الجبنة الفيتا على خبز التورتيلا، وفوقها افردي خليط الحمص، ووزعي شرايح الخس والفلفل المشوي والزيتون، ولفي الخبز على شكل رول.
- اقسمي كل رول نصفين وقدميه مع السلطة.
ساندوتش الطعمية رول
سحور سريع لرمضان – المصدر: thetastyk
المقادير:
- عيش سوري أو لبناني
- طعمية مقلية جاهزة
- سلطة طحينة، أو حمص مهروس بالطحينة جاهز
- لتجهيز السلطة
- 1/4 كوب جزر مبشور
- 1/4 كوب أوراق الكزبرة
- 1/2 كوب خص شرايح
- 1/2 كوب طماطم شرايح (بدون البذر)
- 1/2 كوب كرنب سلطة شرايح
- عصير ليمون
- ملح وكمون
- 1 معلقة كبيرة زيت زيتون
طريقة عمل ساندوتش الطعمية رول
- في بولة إخلطي كل مكونات السلطة واخلطيها كويس.
- لتحضير الساندويتش: افردي معلقة كبيرة من الطحينة أو الحمص البيوريه على الخبز، ضيفي كمية مناسبة من السلطة، ورصي 3 أقراص من الطعمية ولفي الخبز على شكل رول بإحكام.
- اقسمي كل رول نصين وقدميه.
ساندوتش الحلوم المشوية
سحور سريع لرمضان – المصدر: veggiedesserts
المقادير:
- شرايح جبنة حلوم (يفضل شرائها قليلة الملح، أو نقعها في الماء ساعة للتخلص من الملوحة)
- شرايح خيار
- أوراق الجرجير
- شرايح طماطم
- القليل من المايونيز (اختياري)
- أوراق النعناع
- توست أو أي نوع خبز من اختيارك
طريقة عمل ساندوتش الحلوم المشوية
- قومي بشوي شرايح الحلوم في طاسة سخنة مدهونة بالقليل من زيت الزيتون.
- حضري الساندويتش: افردي القليل من المايونيز على الخبز المحمص ورصي شرائح الحلوم والخضراوات وقدميه.
توست البيض مع الأفوكادو
سندوتشات سحور سريع لرمضان
المقادير
- 1/2 حبه أفوكادو مقطعة شرايح
- 2 بيضه
- زبدة
- ملح وفلفل
- شريحة توست أو خبز ريقي محمص
- بصل أخضر للتزيين
طريقة عمل توست البيض مع الأفوكادو
- حضري البيض المخفوق بطريقتك المفضله في قليل من الزبدة.
- جهزي الساندويتش: ضيفي البيض المخفوق على الخبز المحمص وعليه شرايح الأفوكادو وزينيه بالبصل الأخضر.
ادخلي هنا عشان تعرفي كل حاجة عن تدميس الفول في البيت.
التعليق باستخدام حساب فيس بوك