محتويات المقال
المراهقة تعتبر أصعب مرحلة في حياة الطفل، فجأة ابنك اللي ما كانش بيعرف يعمل حاجة من غيرك اتحول وبقى مش عايز يعمل حاجة معاكي ومش عايزك تعرفي عنه حاجة. بقى قاعد في أوضته وسط حياته الجديدة اللي خلقها لنفسه وانشغل بيها ده غير العند والتمرد. وده كلها علامات طبيعية لمرحلة المراهقة أو بمعنى أصح مرحلة اللخبطة اللي المراهق بيكون حاسس بيها.
بس فيه علامات بتظهر علي المراهق تعرفك إن ابنك محتاج احتواء منك ودعمك ومساعدتك منها كتير بيكون طبيعي في فترة المراهقة لكن محتاج تعامل معاه من غير ضغط أو نقد، ومنها اللي بيكون علامة خطر فعلًا ومحتاجة تدخل فوري.
علامات خطر في سن المراهقة
-
التأخر الدراسي:
لو ابنك كان طول عمره متفوق ومهتم بمذاكرته من الطبيعي جدًا إنك تلاحظي إنه اتغير وفقد النركيز بتاعه ومستواه بدأ يتأخر بسبب التغيرات الهرمونية الكبيرة اللي بتحصل في جسمه، واللخبطة النفسية اللي بيعدي بيها. مش مطلوب منك غير إنك ما تنتقديهوش كتير وما تبينيش إحباطك منه ومن مستواه طول الوقت، لإن ده هيخلي الموضوع يسوء مش يتحسن، حاولي تدعميه وتبيّني ثقتي فيه طول الوقت وتساعديه في تنظيم وقته وتفكريه بمسؤولياته بطريقة الصديقة مش المراقب عليه.
-
أرق أو اضطرابات في النوم:
طبيعي إن المراهقين بيفضلوا يسهروا طول الليل ويناموا لوقت متأخر في النهار. لكن لو لاحظتي على طفلك علامات أرق وعدم قدرة على النوم أو العكس ولاحظتي نومه طول الوقت لساعات طويلة غير المعتادة، فده وقت إنك وباباه تدخلوا لأنها ممكن تكون علامة من علامات الاكتئاب أو إنه بيتعرض لإساءة من أي نوع.
-
تغير الاهتمامات وفقدان الحماس للأشياء المفضلة:
بيحصل تغير في سلوك المراهق في المجمل، وبيتخلى عن صفات الطفل ويبدأ يكتسب صفات جديدة راسمها لشخصيته كراجل. لكن لازم تفرقي بين التغيير السلوكي العادي والطبيعي، وبين التغير السلوكي اللي يخليكي تحسي إنك بقيتي بتتعاملي مع شخص مختلف تمام وتحسي منه إن ابنك داخل في مرحلة اكتئاب وتشتت في الأفكار، قربي منه وما تضغطيش عليه أو تحاصريه لإن في المرحلة دي، بتكون أهم حاجة بالنسبة له هي مساحة الحرية بتاعته تابعيه من بعيد وما تحكميش عليه وعرفيه إنك دايمًا متاحة لو احتاج لك.
-
اكتئاب المراهقة:
اكتئاب المراهقين مشكلة نفسية خطيرة بتصيب عدد من الأطفال في فترة المراهقة والدراسات أثبتت إن 20% من المراهقين بيعانوا من الاكتئاب، وممكن تسبب شعور دائم بالحزن وبتأئر على طريقة تفكير المراهق وشعوره وسلوكه، وبتسبب بعده عن أصحابه ورغبته في الانعزال.
المراهق ممكن يتعرض للاكتئاب نتيجة أسباب كتير منها الضغط من الأهل والتوقعات الأكاديمية أو الضغط من أصحابه والمقارنة أو التنمر أو إحساسه إنه مش مهم أو مش مميز، الخلافات بين الأب والأم أو الطلاق. موت شخص قريب منه. وممكن كمان يكون بسبب الجينات والعوامل الوراثية فالاكتئاب يورث.
اكتئاب المراهقين مش ضعف منهم أو حاجة ممكن نتغلب عليها بقوة الإرادة لإنه بيكون محتاج متابعة من متخصص وفي بعض الأوقات بيحتاج علاج.
وبننصحك إنك تتقبلي التغيير اللي بيحصل في طفلك بعد دخوله مرحلة المراهقة، وتتقبلي ميوله الجديدة وتحترمي آرائه ونظرته للحياة وأحلامه اللي هي أكيد مختلف عن أحلامك، طفلك المراهق في المرحلة دي، مش محتاج منك غير إنك تكوني صاحب يدعمه ويساعده ويرشده للصح من غير تحكم أو تسلط.
التعليق باستخدام حساب فيس بوك