محتويات المقال
شرح خطوات صلاة العيد للأطفال مهمة جدًا عشان يقدروا يشاركوا في طقوس نهار يوم العيد بدل ما يكونوا واقفين مش فاهمين مفروض يعملوا إيه أو يصلوا إزاي؟ وطبعا لأنهم أطفال فاحنا محتاجين نبسط لهم الموضوع جدًا وبطريقة لطيفة عشان يفهموها من خلال الخطوات اللي هنتكلم عنها في المقال ده، واللي هتكون طريقتها مختلفة بين أطفال اتعلموا الصلاة من وقت كبير وأطفال لسه ما تعلموهاش..
شرح صلاة العيد للأطفال
في البداية بنشرح للولاد إنهم عشان مسلمين فهم بيحتفلوا بنهاية شهر الصوم من خلال العيد واللي بنبدأه بصلاة اسمها صلاة العيد، وصلاة العيد عبارة عن:
- ركعتين اتنين بس
- التكبيرة يعني: الله أكبر
- بنكبر 7 تكبيرات في الركعة الأولى ونقرأ الفاتحة وسورة قصيرة بعدها.
- بنكبر 5 تكبيرات في الركعة التانية ونقرأ الفاتحة وسورة قصيرة بعدها.
إزاي نتحضر لصلاة العيد؟
بنشرح لهم ليه هنصحى بدري جدًا، وإزاي ده مهم جدًا عشان نلحق الصلاة، ده هيمهد لهم فكرة الصحيان بدري فمش هيكونوا متضايقين، بنحضر هدوم مخصوصة – لو أمكن – لأن ده بيضفي بهجة أكبر جلابية بيضا للولد وإسدال أو عباية لونها جميل للبنات، ونبدأ نشرح لهم إنها زي أي صلاة بتحتاج وضوء.
الوضوء لصلاة العيد
هنشرح لهم إن الوضوء لصلاة العيد زي الوضوء للصلاة العادية خطواته بالترتيب، لو ما كانوش يعرفوها قبل كده هيكون مناسب لو نبدأ نوريهم خطاوت الوضوء بصورة عملية:
- أول خطوة في الوضوء هي النية، بنبدأ الوضوء إننا ننوي نتوضأ ونقول بعدها “بسم الله”.
- بنغسل الكف 3 مرات
- بنتمضمض 3 مرات
- بنستنشق بالأنف 3 مرات
- غسل الوجه 3 مرات
- غسل اليدين للمرفق (الكوع) 3 مرات ونبدأ باليد اليمنى
- مسح الرأس مرة واحدة
- مسح الأذن مرة واحدة ونبدأ باليمنى
- غسل القدمين إلى الكعبين 3 مرات – نبدأ باليمين وندخل المياه بين صوابعنا.
- بنقول بعد الوضوء “أشهد أنّ لا إله إلّا الله وحده لا شريك له، وأنّ محمّدًا عبده ورسوله، اللهمّ اجعلني من التوّابين، واجعلني من المتطهّرين”.
بنختبر الطفل
المعلومات مش بتثبت عند الأطفال من أول مرة فاحنا محتاجين نكلمهم بدري شوية ومن وقت للتاني نسألهم في وسط اليوم أو وسط الكلام هو صلاة العيد كام ركعة؟ طيب الركعة الأولى كام تكبيرة؟ اقري كمان: أفكار لتشجيع الأطفال على الصلاة
المكافأة
أجواء صلاة العيد بطبيعتها لطيفة ومليانة بهجة هيكون مناسب لو جبنا بلالين واحنا رايحين وربطنا بين الصلاة والعيدية كمكافأة للطفل.
التعليق باستخدام حساب فيس بوك