الكورونا وعمايل الكورونا فينا، كام واحدة مننا عانت من مشاكل في بشرتها وشعرها بعد التعافي من الكورونا ومجاش في بالها إن السبب هو الكورونا. حقيقي الفيروس ده جه وحط البشرية كلها حرفيا أمام تحدي على كافة المستويات، وكل فترة بنكتشف عنه حاجات جديدة وبنحاول يا إما نتعايش يإما نتعالج لو إتوفر العلاج. النهاردة هنتكلم عن مشاكل شعرك بعد الكورونا ،كتير بتجالنا شكاوي ” أنا شعري اتدمر بسبب الكورونا”، واللي أنا شخصيا عانيت منها، بعد التعافي من الكورونا بتواجهي مشكلتين، يإما الإتنين مع بعض يا واحدة منهم.
المشكلتين هما تساقط الشعر الغزير بعد التعافي من دور الكورونا، والمشكلة التانية هي إنك تحسي إن شعرك حرفيا متشابك بشكل مبالغ فيه، وإنك مهما تسرحي فيه بيتشابك أسرع من المعتاد، حاجة كدة زي ما بنقول في لهجتنا الدارجة الشعر ملبد.
أنا عارفة الموضوع سخيف قد إيه، بس الموضوع بيتحسن مع العلاج الصج خلال ست شهور، وهنقولك شوية نصائح لما تمشي عليها الموضوع هيتحل، بس محتاج منك إلتزام وصبر.
أسباب تدهور حالة شعرك بعد الكورونا
- لازم تعرفي إن عملية التعافي من فيروس كورونا بتستهلك كل جوانب جسمك، وده طبعا حسب مدى خطورة الحالة، وإن تدهور حالة الشعر بتظهر عند أغلب الناس بعد مرور شهر أو إتنين من الشفاء.
- تلقي الجسم لمضادات حيوية قوية خلال فترة المرض، وتغير كيمياء الجسم خلال محاربة الفيروس كل ده بيأثر بشكل مباشر في صحة بوصيلات الشعر وبتضعفها، واللي بدوره بيسبب تساقط شديد للشعر.
- علشان كدة أفضل شيء تعمليه إنك تلجأي لمتخصص، والأفضل يكون طبيب جلدية، بلاش تتجهي لمراكز التجميل، لأن اللي عنده بيحتاج علاج طبي مش تجميلي، وتقدري بعد تحسن حالة شعرك وشعورك إن التساقط بيقل إنك تستشيري طبيبك في حالة شعرك إذا كان هيتحمل أي علاج تجميلي في أي مركز تجميل.
- تساقط الشعر بعد الكورونا عرض شائع، مزعج جدا لكنه شائع ومش مخيف، ومع الإهتمام الموضوع بيتحل وشعرك بيرجع لطبيعته.
- تقدري تقصي أطراف شعرك لو حسيتي فيهم جفاف وعلشان تحسي إن فيه كثافة أكتر، وحتى من باب التغيير، وسرحي شعرك بإستمرار بفرشة خشبية أو مشط خشبي، مع الترطيب المستمر، صدقيني خلال أسابيع قليلة هتلاقي المشكلة إتحلت.
التعليق باستخدام حساب فيس بوك