صور شنط جينز يدوية .. أفكار إعادة تدوير الجينز القديم

الشنط الجينز عاملة زي الإيشارب النبيتي كده، تمشي على كل حاجة وبتفيد في كل الأغراض، وبتستحمل كل الظروف وبتعيش وقت أطول، وأكبر ميزة فيها إنك تقدري يكون عندك أكتر من شنطة جينز بأكتر من ستايل، بإعادة تدوير البنطلونات الجينز القديمة، سواء بتاعتك أو بتاعت جوزك وأولادك. وفي المقال ده، هنعرض لك صور أفكار شنط جينز تقدري تعملي زيها، ونصايح عامة لعمل الشنط الجينز لو بتحبي تعملي أعمال يدوية سهلة بنفسك.

نصايح لعمل الشنط من الجينز القديم

اختاري بنطلون جينز حالته كويسة بس مستغنية عنه بسبب المقاس، أو بسبب عيب بسيط فيه، بلاش الجينز تكون قماشته مستهلكة قوي، لإن ده هيأثر على حالة ومظهر الشنطة بعد ما تعمليها.
اغسلي البنطلون الجينز كويس.
اختاري موديل الشنطة اللي انتي عاوزه تعمليها، وطلعي الباترون بتاعها من على بنترست أو يوتيوب واعملي نفس الخطوات.
تقدري تضيفي أكسسوار على ذوقك للجينز، زي الكروشيه، أو البادجات الجاهزة، والسوست والزراير.
اختاري قماشة قوية وشكلها حلو لبطانة الشنطة.
ابدعي في اختيار حزام الشنطة، ومتوفر خامات كتير زي الجلد والضفيرة المكرمية، أو حزام من الجينز نفسه.
لو عندك كذا بنطلون جينز ممكن تعملي تداخل في ألوان وخامات الجينز في نفس الشنطة.
لو مالكيش في الأعمال اليدوية، اختاري الشنطة اللي انتي عاوزاها وجهزي البنطلون اللي هيتعاد تدويره، ووديها لترزي ينفذهالك.