محتويات المقال
سواء كنتي بتفضلّي ما تحطيش أي حاجة فيها كيماويات على شعرك وبشرتك، أو كان عندك حساسية من صبغة الشعر ومش عارفة إزاي تغيري وتجددي في لون شعرك، أو إزاي تغطي الشعر الأبيض، هتلاقي هنا صبغات شعر طبيعية، من مواد طبيعية ما بتسببش أي أضرار لبشرتك ولا لشعرك. العيب الوحيد في الصبغات الطبيعية للشعر هو إن مداه أقصر من الصبغات الكيميائية. لكن قصاد كده، تقدري تغيري اللون باستمرار لإنه مش مضر للشعر زي الصبغات التانية.
ازاي تعرفي لو عندك حساسية من الصبغات؟
الحساسية من الصبغة بتظهر لما تصبغي شعرك (أو تجربي الصبغة تجربة اختبارية على جنب ودنك)، وتلاقي إن جلدك بيحرقك أو فيه إحساس زي القرص أو إن جلدك يحمر أو المنطقة المستخدم عليها الصبغة تورم، أو الوش كله يورم.
صبغات شعر طبيعية
البنجر المهروس
لو عايزة شعر أحمر غني، تقدري تستخدمي البنجر المهروس بالطريقة دي:
- اخلطي البنجر المهروس مع زيت جوز الهند أو زيت الزيتون.
- طبقي الخليط على شعرك بغزارة ولفي شعرك.
- سيبي الخليط في شعرك لمدة ساعة على الأقل وبعدها اغسليه.
- اللون هيفضل معاكي أسبوعين لتلاتة.
الحنة
الحنة من أطول الصبغات الطبيعية اللي بتفضل في الشعر (بتفضل لمدة 4 لـ6 أسابيع) وبتخلي الشعر درجة من درجات الأحمر. عشان تعملي الحنة في البيت
- اخلطي نص كباية حنة مع ربع كباية مياه.
- قلبيهم لحد ما الحنة تدوب تمامًا وتحسيها في قوام البطاطس المهروسة.
- غطي الخليط لمدة 12 ساعة.
- اغسلي شعرك من غير استخدام بلسم.
- حطي استك شعر على جبهتك وحطي زيت زيتون على الجزء قبل مفرق الشعر لمنع صباغة الجلد نفسه.
القهوة/البن
القهوة مش صاحبتنا بس في الفوقان والمزاج، هي كمان صديقتنا في تغطية الشعر الأبيض وصبغ الشعر بلون بني غامق. عشان تصبغي شعرك بالقهوة:
- اغلي فنجان قهوة بن غامق
- صبي محتويات الفنجان (بعد ما يبرد) في كباية لحد ما يتملي نصها بس، واخلطيه مع معلقتين كبار من البن وكباية من البلسم.
- حطي المزيج دي على شعرك وهو نضيف ورطب.
- سيبيه على شعرك لمدة ساعة على الأقل واشطفيه لما تخلصي.
- كرري الخطوات لو لسه اللون ما لقطش.
المريمية
لو شعرك بني أو كستنائي غامق وعايزة تغمقيه أكتر، المريمية ممكن تساعدك في ده. وبرضه ممكن تستخدميه في تغطية الشعر الأبيض.
- انقعي من نص كوباية لكوباية من المريمية الناشفة في لتر مياه مغلية لمدة 30 دقيقة على الأقل. كل ما تنقعيها أكتر، كل ما اللون هيغمق.
- بعد ما تبرد، صفيها من العشب.
- اغسلي شعرك بالطريقة المعتادة، وصبي عليه ميا المريمية لأطول وقت ممكن.
- سيبي فرصة لشعرك يلقط اللون ربع ساعة وبعدين اشطفيه.
مصادر ساعدتنا في كتابة المقال
Healthline
Healthline2
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك