صديق الأزمات والعزومات والمفاجئات: إنه ما يطلق عليه المصريون البانيييه! ما تفهموش ليه، مع إن في مليون طريقة لـ طهي صدور الفراخ المخلية غير القلي. ولإنها من أكتر أنواع البروتينات المتوفرة في أغلب البيوت المصرية ولإن سعرها في متناول الإيد وسهلة وسريعة في
تحضيرها وهي الأقرب لقلب الأطفال عن اللحمة والسمك،
الولاد جعانين؟ طلّعي بانيه من التلاجة واقليه!
جالك ضيوف على غفلة؟ طلّعي البانيه واعملي لهم مكرونة وشويه كريمة بقت أحلى فيتوشيني!
جوزك جاي من الشغل وما لحقتيش تعملي أكل؟ طلّعي البانيه واعملي له ساندوتشات شاورمة!
قررنا النهاردة نساعدك بمجموعة أفكار لتحضير أطباق لذيذة من صدور الفراخ المخلية بحيث تقدري ترجعي للمقال ده في أي وقت لما تحتاجي أفكار لعمل صدور الفراخ. أهم حاجة لازم تراعيها وانتي بتطبخي صدور الفراخ خصوصًا لو هتطبخي الصدور كاملة إنك ما تخليهاش تنشف منك وتفقد كل العصارة بتاعتها. وعشان تحققي ده، هاقول لك على شوية نصايح تساعدك:
- استخدمي صدور الفراخ في درجة حرارة الغرفة ونشّفيها كويس قوي بمناديل مطبخ قبل الطهي.
- لو هتحمري الفراخ أو تشويها على البوتاجاز، لازم الطاسة أو الشواية تكون سخنة جدًا عشان الفراخ ما تنزّلش مياتها وتاخد لون دهبي جميل.
- صدور الفراخ المخلية الكاملة بتكون سميكة وبتحتاج وقت أطول للتسوية. عشان ما تنشفش منك، بانصحك تحمريها في طاسة أو صينية قابلة لدخول الفرن بحيث تاخد لون دهبي وتستوي نص سوا على البوتاجاز، وكمّلي تسويتها في فرن متسخن مش أكتر من 10-12 دقيقة بالكتير حسب حجم الصدور.
- ريحي صدور الفراخ بعد طبخها عشان العصارة بتاعتها ترجع تتوزع جواها بشكل أفضل، ولما تيجي تقطعيها تكون طرية ولذيذة.
1. صدور الفراخ مع الخضار في صينية الفرن المسطحة
طهي الصدور المخلية sheet pan
فيه موضة أو تريند كده في عالم الأكل للناس المستعجلين وهي طريقة sheet pan. طريقة بسيطة بتعتمد على إنك تحطي الأكل كله في صينية فرن مسطحة وعليه تتبيلة بسيطة وتشويه في الفرن على حرارة عالية. كل اللي هتعمليه إنك هترصي صدور الفراخ والخضار على صينية فرن مسطحة وتستخدمي تتبيلة بسيطة من زيت الزيتون مع عصير الليمون والتوم والملح والفلفل وأي نوع أعشاب تحبيه زي الزعتر أو الروز ماري، وتقلبي كل ده مع الفراخ والخضار وتخبزيهم في الفرن، ولا أسهل من كده.
2. الفاهيتا
طبخ الصدور المخلية. المصدر: carlsbadcravings
أكلة مكسيكية أكتر من رائعة بناكلها في المطاعم وهي سهلة جدًا إننا نعملها في البيت. كل اللي هتحتاجيه إنك تتبلي شرايح صدور الفراخ ببهارات الفاهيتا الجاهزة وعصير وبشر الليمون، وتتبلي الفلفل الأخضر والفلفل الملون والبصل اللي كلهم متقطعين لشرايح بنفس البهارات مع شوية من الزيت النباتي. اشوي كل ده في شواية أو طاسة واسعة على البوتاجاز أو في الفرن. الفاهيتا بتتقدم عادة مع عيش التورتيلا والساور كريم.
3. بيكاتا الفراخ
طهي صدور الفراخ المخلية – المصدر: pinchofyum
البيكاتا وصفة لذيذة مشهورة أكتر مع اللحمة مش الفراخ، بتعتمد في مذاقها على عصير الليمون اللي بنضيفه للصوص وبيخليه مزز ولذيذ. كل اللي هتحتاجيه إنك تعفّري صدور الفراخ بالدقيق وهو وظيفته إنه يدي طبقة محمرة للفراخ من بره ويساعد على الاحتفاظ بعصارتها جواها عشان تكون طرية. بعد كده هتشوحيها مع الزبدة وزيت الزيتون وبعدين ترفعيها من الطاسة وتضيفي فص توم مفروم وتشوحيه وبعدين تضيفي شوية من شوربة الفراخ وعصير الليمون وهم دول اللي هيكونوا الصوص اللذيذ للبيكاتا. وفي الآخر تنهي الطبق برشة بقدونس. وصفة بسيطة بس مليانة نكهات تقدري كمان تضيفي لها الكابري وهو نوع من المخللات بيليق قوي مع طعم الليمون ومع وصفة البيكاتا.
4. صدور الفراخ المحشية بالموتزاريلا والطماطم المجففة مع الريحان
طهي صدور الفراخ المخلية – المصدر: pinterest
توليفة رائعة من النكهات الإيطالية جوه صدور الفراخ. وفي نفس الوقت وصفة سريعة وسهلة وتنفعك جدًا في العزومات لإن طعمها مبهر وضيوفك هيفتكروا إنك بذلتي مجهود كبير جدًا عشان تعمليها مع إنها ما اخدتش منك وقت ولا جهد الحقيقة. كل اللي عليكي إنك تفتحي صدور الفراخ من الجنب فتحة بسيطة بالسكينة بحيث تكوّني جيب تحطي فيه الحشوة. الحشوة عبارة عن جبنة موتزاريلا وطماطم مجففة وكام ورقة ريحان أخضر. تبّلي صدور الفراخ بالملح والفلفل ورشة زعتر واقفليها بخلة الأسنان. حمريها في طاسة سخنة جدًا بس لحد ما تاخد لون دهبي وتكملي تسويتها في الفرن. تقدري تقدميها مع باستا أو رز أبيض وتقدري تعملي لها صوص كريمة بسيط يتقدم جنبها.
5. مكعبات صدور الفراخ بصوص الترياكي
طهي صدور الفراخ المخلية – المصدر: delish
الوصفات الآسيوية مليانة نكهة وطعم خرافي، وصوص الترياكي مش بس بيتاكل مع اللحمة، لكن كمان مع الفراخ بيبقى ناجح جدًا. صوص الترياكي مكوناته الأساسية هي صويا صوص، عسل أو سكر، وعصير ليمون أو خل. وعندك كمان الاختيار إنك تشتري الصوص جاهز من السوبرماركت. هتشوّحي مكعبات الصدور مع التوم والجنزبيل وشوية من زيت السمسم وتضيفي الصوص الجاهز أو مكوناته وتقدري تتقلي قوام الصوص بشوية مياه مخلوطة مع النشا. قدّميها مع الخضراوات المفضلة لكي والرز البسمتي الأبيض وزينيها برشة من السمسم والبصل الأخضر.
1 comment
[…] وصفات صدور الفراخ: اللينك ده فيه 5 طرق مختلفة لصدور الفراخ المخلية بمقاديرهم وطرقهم. هتلاقي فيها: صدور الفراخ مع الخضار في صينية الفرن المسطحة – الفاهيتا – بيكاتا الفراخ – صدور الفراخ المحشية بالموتزاريلا والطماطم المجففة مع الريحان – مكعبات صدور الفراخ بصوص الترياكي. […]