“ابني دايمًا بيضرب أخواته” / “علطول عامل مشاكل في المدرسة” / “مفيش حد مش بيتخانق معاه”. ودي كانت شوية من الجمل اللي بتتقال بمنتهى الأريحية عن الطفل اللي بيطلق عليه اسم “طفل عدواني”. طبعًا إنتم عارفين إني متحفظة على الاسم وعلى وصم الطفل في العموم. فحتى لو بنتكلم هنا عن “الطفل العدواني” فبافكر نفسي وبافكركم إننا ما نقولش أبدًا لطفل أو قصاد طفل إنه “عدواني”!
طريقة التعامل مع الطفل الزنان كثير البكاء
صفات الطفل العدواني
طيب خلونا الأول إيه الصفات اللي على أساسها بنقول على الطفل إنه عدواني؟
- بيستخدم الضرب كأسهل طريقة في التعامل مع غيره.
- في الغالب بيقصد يتنمر ويستهزأ من غيره.
- بيهدد بالإيذاء الجسدي لغيره أو لنفسه وقت المشاكل.
- دايمًا متورط في مشاكل وخناقات مع أقرانه.
طريقة التعامل مع الطفل الهاي نيد High Need
التعامل مع الطفل بالصفات دي
طيب دلوقتي نتعامل معاه إزاي عشان نقلل من حدة عدوانيته واندفاعيته؟
-
مشاعر الطفل والتعبير عنها
من أهم الأسباب اللي بتخلّي الطفل عدواني في تصرفاته عدم قدرته على التعبير عن مشاعره بالصورة الصح. وكمان عدم السماح له ببعض المشاعر زي “الغضب/ الغيرة/ الخجل”. عشان كده، أساسي تدرب طفلك على التعبير عن مشاعره بكلمات مناسبة وتسميتها بأسامي واضحة. وأؤكد له إن مفيش صح وغلط في اللي بنحسه، لكن فيه صح وغلط في التعبير عن اللي حاسينه ده.
-
مشاعر المُربي (الأم/الأب/ولي الأمر) والسيطرة عليها
استفزازنا وقت سلوكيات الطفل العدوانية بتخليه يزيد فيها لأنه عارف إنها بتأثر علينا بشكل شخصي. وبالتالي كل ما يبقى عايز يوصل غضبه أو إحباطه مننا بيستفزنا أكتر. فمهم إننا نحافظ على هدوئنا ونركز في ردود أفعالنا لأن ده اللي بتوصل للطفل رسالة غير مباشرة عن السلوكيات الصح من الغلط.
-
لا تراجع ولا استسلام
ما تخليش سلوك الطفل العدواني يضغط عليك وتضطر تنفذ له اللي هو عايزه تجنبًا لعدوانيته!
-
اللي يضربك إضربه
الجملة ده كفيلة بخلق طفل عدواني درجة أولي، طفل ما يعرفش يرد الأذى أو الغلط عن نفسه غير بأذى أو باغلط زيه وأكتر منه كمان.
عشان كدة دايما بنبدل الجملة ده ب “ما تسيبش حد يضربك”. مع تدريب الطفل عن طرق الدفاع عن نفسه من غير استخدام العنف.
-
دور على الحلو اللي جواه
شجّع الطفل على السلوكيات الإيجابية مهما كانت صغيرة، لأن الطفل العدواني بيكون متحاوط في البيت والمدرسة دايمًا بتعليقات سلبية ونقد بتأثر على ثقته بنفسه وتزود سلوكه السيء.
وفي النهاية، باوصيكم لو سلوك الطفل العدواني ملاحظين إنه زايد عن إطار الطبيعي وبدأ يدخل في أذى حقيقي لنفسه أو لغيره مهم نستشير أخصائي نفسي أطفال عشان نعرف السبب ونعالجه أولًا.
التعليق باستخدام حساب فيس بوك