محتويات المقال
طبعًا مش محتاجين نقول إن لو بنتك أو ابنك مواليد الفترة بين 19 فبراير و20 مارس، هتعرفي طبعًا إنهم برج الحوت. إنما في المقال ده، هنقول لك صفات طفل الحوت اللي بمجرد ما تشوفيها هتؤكد لك إن ابنك بينتموا للبرج ده. وإنصافًا للبنات والولاد، هابدّل بين المؤنث والمذكر.
ذكي
الطفل المصري هو أذكى طفل في العالم، صح؟ صح، لكن مش ده قصدي خالص. القصد هنا مش الذكاء العادي إنه بيعرف يحسب بسرعة أو بيقدر يفهم الحاجات في وقت قصير. الذكاء هنا أكبر وأعمق، لأن فيه عنصر حدس كمان. يعني ذكاء عاطفي وقدرة على فهم المواقف وفهم الناس وتحليلها.
عاطفية
الذكاء مش بس ذكاء رقمي زي ما قلنا، لكن كمان فيه نوع ذكاء مهم جدًا وهو الذكاء العاطفي ودي موهبة بتمتاز بيها جدًا بنت برج الحوت. الذكاء العاطفي والعواطف الحساسة. وكمان مع الرهافة والعاطفة دي، هي بتقدر تقرا الناس وعشان كده، ممكن تتخضي من حاجات معينة أو كلام معين يصدر من بنتك وتحسي “هي إزاي عرفت الموضوع ده؟”
عارف الحياة بدري
مع النوع ده من الذكاء والحدس، طفل برج الحوت بيكون قاري الدنيا بدري، عارف الدنيا بتمشي إزاي، عارف كل واحد بيفكر إزاي وبيتصرف إزاي، فهتلاقيه من صغره وهو فاهم الدنيا على رغم صعوبة الموضوع ده علينا احنا الكبار.
مالهاش في الحدود
طفلة برج الحوت بتحب تبقى معاكي ومالهاش فعلًا في موضوع الحدود بينك وبينها وعشان كده، حاولي ما تحطيش انتي حدود بينك وبينها، خليكي قريبة منها والعبي معاها وافهميها زي ما هي فاهماكي.
فنان
كتير من الأطفال بيحبوا الحواديت. لكن طفل برج الحوت هو مؤلف الحواديت. طفل الحوت بيحب دايمًا يلعب ألعاب التمثيل: يعني يحب انتي وهو تمثلوا حدوتة، تبدلوا الأدوار، تلعبوا اتنين أصحاب، ودي فرصة هايلة لازم تستغليها لأنها مش بس هتقرب بينكم، لكن كمان هتعرفك على شخصية ابنك جدًا. كمان حاولي دايمًا تخصصي وقت تسمعي فيه الحواديت اللي بيألفها في دماغه، حتى لو الحواديت دي تخص أحداث وناس حقيقية وهو قرر يغيّر الأحداث، هنا هو مش بيحاول يكذب، هنا هو بس بيستخدم خياله وبيلعب.
كيف أتعامل مع برج الحوت الطفل؟
- راعي مشاعرهم: لأنهم عاطفيين وحساسين وبيفهموا الناس وذكائهم العاطفي عالي، هيبقوا دايمًا محتاجينك تتفهمي مشاعرهم وتحتويهم. لما مشاعرهم تتحكم فيهم، بلاش تعاتبيهم على ده أو تتكلمي بشكل سلبي عن ده.
- ساعديهم يحطوا حدود: لأنهم ما بيحطوش حدود، سهل إنهم يتجرحوا ويسمحوا لحد إنه يتعامل معاهم بشكل مسيء. عشان كده، لازم تفهميهم إيه المسموح وإيه المش مسموح وامتى يقولوا “لا”.
التعليق باستخدام حساب فيس بوك