المكرونة من الأكلات السهلة والسريعة اللي ما بتاخدش وقت في التحضير، ولو إنتي أم جديدة أو بتشتغلي هتحتاجي تحضري وجبات منجزة لفطار رمضان والمكرونة هي أحسن اختيار. ولو عايزة تنوعي في أصناف المكرونة وتعمليها بصوصات مختلفة، اقري المقال ده وهنقول لك على 9 من صوصات المكرونة تعمليها في رمضان.
7 أسرار عند سلق المكرونة علشان ما تعجنش منك
صوصات المكرونة
- وايت صوص بالمشروم
- صوص السبانخ
- البينك صوص
- البيستو
- البولونيز
- صوص الجبنة
- صوص الطماطم بالريحان
- صويا صوص
- الديمي جلاس
طريقة عمل وايت صوص بالمشروم
مكونات الوايت صوص بالمشروم
- دقيق.
- زبدة أو سمنة.
- زيت.
- لتر لبن كامل الدسم.
- مكعب جبنة كيري (اختياري)
- كريمة طبخ (عبوة صغيرة)
- مشروم فريش متقطع شرايح.
- جبنة بارميزان أو موتزاريلا (اختياري)
طريقة عمل الوايت صوص بالمشروم
- شوحي المشروم في السمنة أو الزيت لحد ما لونه يتغير وشيليه من الطاسة أو الحلة وضيفي مكانها حوالي 4 أو 5 معالق كبار من الدقيق.
- قلبي الدقيق لحد ما لونه يصفر وبعدين ضيفي اللبن وقلبي كويس قوي لحد ما تختفي الكلاكيع. لو لسه الدقيق مكلكع، اضربيه بالهاند بليندر.
- سيبي البشاميل يغلي شوية وبعدين ضيفي كريمة الطبخ والجبنة الكيري وقلبي كويس وسيبيهم يغلوا دقايق.
- ضيفي المشروم والجبنة وسيبيه خمس دقايق.
اعرفي من هنا وصفة المكرونة بالجمبري والصوص الكريمي اللذيذ
طريقة عمل صوص السبانخ
مقادير صوص السبانخ
- سبانخ بيبي حوالي ربع كيلو.
- ٤ فصوص توم مفروم.
- ٤ معالق دقيق.
- كوب من كريمة الطبخ.
- ٢ كوب لبن.
- ملح وفلفل.
طريقة عمل صوص السبانخ
- هاتي سمنة وزيت في حلة أو طاسة وضيفي عليها التوم يتشوح لحد ما لونه يبقى دهبي.
- ضيفي السبانخ البيبي وقلبي كله في بعض لحد ما السبانخ حجمها يقل.
- ارفعيها من على النار وحطي السبانخ والتوم في الكبة وضيفي ليهم نص كوب لبن واضربي كويس لحد ما القوام يبقى متجانس.
- في نفس الحلة حطي زبدة وزيت وضيفي الدقيق لحد ما لونه يبقى دهبي شوية وضيفي البن وقلبي كويس لحد ما يبقى متجانس وضيفي الكريمة ورجعي خليط السبانخ وسيبي كل المكونات لحد ما تغلي.
- ضيفي الملح والفلفل على حسب رغبتك.
طريقة عمل أشهر صوصات المطاعم .. أجمد 10 فيهم
طريقة عمل البينك صوص
مكونات البينك صوص
- بصل مفروم.
- توم مفروم.
- صلصة طماطم.
- كريمة طبخ.
- زيت وسمنة.
- ملح وفلفل.
طريقة البينك صوص
- شوحي البصل والتوم في السمنة والزيت لحد ما ياخدوا لون دهبي بسيط.
- ضيفي الصلصة وسيبي كل المكونات تغلي مع بعض.
- ضيفي كريمة الطبخ وممكن تزوديها شوية لبن لو الخليط سميك.
- سيبي الصلصة تغلي لمدة عشر دقايق وضيفي الملح والفلفل حسب رغبتك.
طريقة عمل صوص البيستو
مقادير صوص البيستو – صوص الريحان
- ٢ كوب ريحان فريش.
- كوب جبنة بارميزان.
- كوب زيت زيتون.
- ٤ فصوص توم مفرومين.
- نص كوب صنوبر (ممكن تستبدليه بالجوز).
- ملح وفلفل.
طريقة صوص الريحان
- حطي كل المكونات السابقة مع بعض في الكبة واخلطي كويس لحد ما توصلي لقوام متجانس.
- ضيفي الصوص السابق على المكرونة المسلوقة وممكن تضيفي طماطم شيري معاهم للزينة.
طريقة عمل صوص البولونيز
مقادير صوص البولونيز
- نص كيلو من اللحم المفروم.
- صلصة طماطم.
- بصل مفروم.
- ملح وفلفل.
- رشة سكر.
- نص معلقة نعناع مجفف.
طريقة عمل البولونيز
- حطي اللحم المفروم وقابيها وضيفي ليها البصل المفروم وقلبي كويس.
- ضيفي الملح والفلفل والنعناع وسيبيها لحد ما تتعصج.
- ضيفي عصير الطماطم وسيبيه لحد ما يتسبك.
طريقة عمل صوص الجبنة
مقادير صوص الجبنة
- كوب من خليط الجبن المبشورة: شيدر، بارميزان، جودة… قائمة بكل أنواع الجبن واستخداماتها في الطبخ
- زبدة وزيت.
- ملح وفلفل.
- معلقتين كبار دقيق.
- كوب من الحليب.
طريقة صوص الجبنة
- حطي الزبدة والزيت في الطاسة وضيفي ليها الدقيق وقلبيهم كويس أوي مع بعض عشان ما يكلكعش.
- ضيفي اللبن وهدي النار خالص وقلبي كويس وضيفي الملح والفلفل.
- ضيفي الجبن وقلبي كويس أوي لحد ما القوام يبقى متجانس.
طريقة عمل صوص الطماطم مع التوم والريحان
مقادير صوص الطماطم
- عصير طماطم.
- ربع كوب ريحان فريش مطحون.
- رشة زعتر.
- ٢ فص توم مفروم.
- بصلة كبيرة مفرومة.
- سمنة وزيت.
- ملح وفلفل.
طريقة عمل صوص الطماطم
- شوحي البصل والتوم في سمنة وزيت مع بعض لحد ما ياخدوا لون دهبي.
- ضيفي الريحان والزعتر وقلبي وبعدين ضيفي عصير الطماطم والملح والفلفل.
- لو الصوص سميك ضيفي شوية مياه وقلبي وهدي النار وسيبيهم لحد ما يستووا.
طريقة عمل صوص الصويا بالخضروات
مقادير صوص الصويا
- نص كوب صويا صوص.
- ربع كوب كاتشاب.
- معلقتين صوص المحار (اختياري).
- ٢ فص توم مفروم.
- خل.
- ملح وفلفل.
- معلقة زنجبيل.
- فلفل أخضر.
- بصل.
- كرنب أبيض.
- جزر.
- ميه.
- معلقة نشا كبيرة.
طريقة عمل صوص الصويا
- قطعي الخضروات شرايح رفيعة.
- شوحي التوم لحد ما ياخد لون دهبي وضيفي الزنجبيل وضيفي عليه الخضار وقلبي كويس.
- ضيفي معلقة خل وقلبي.
- ضيفي الصويا صوص وصوص المحار وقلبي.
- في كوب خارجي قلبي النشا في ربع كوب ميه وقلبي كويس وحطيه على الصوص وقلبي لحد ما يتقل.
طريقة عمل صوص الديمي جلاس
مقادير الديمي جلاس
- بصلة مفرومة.
- ٤ فصوص توم مفروم.
- معلقة صلصة.
- سمنة وزيت.
- ملح وفلفل.
- باكو من صوص الديمي جلاس.
طريقة عمل الديمي جلاس
- شوحي البصل والزيت في الزبدة والزيت لحد ما يبقى لونهم دهبي.
- ضيفي معلقة الصلصة وصوص الديمي جلاس والمياه المغلية وقلبي كويس.
- سيبي الصلصة تغلي لمدة ربع ساعة.
وصفات متنوعة بالمكرونة البينا غير البشاميل
بنتمنى الوصفات تكون عجبتك وبألف هنا وشفا.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
What’s your Reaction?
التعليق باستخدام حساب فيس بوك