رمضان على الأبواب وكعادة البيوت المصرية كلها على قدم وساق. وكله بيستعد بالزينة بقى أو بتحضيرات الأكل وغيره. ومن التحضيرات الرمضانية، كمان لينا كأمهات هي تحضير وتهيئة ولادنا عشان يتمرنوا على الصيام، وحيرتنا نبدأ منين وإمتى وازاي! في مقال النهارده، هاقول لك أبسط طريقة تبدأي تعويد الطفل على الصوم من غير ضغط لا عليكي ولا عليهم.
أسئلة الأطفال: ابني بيسألني أسئلة غريبة عن ربنا!
إمتى بالظبط ينفع نبدأ فكرة الصيام؟
الحقيقة باشوف نصايح كتير واقتراحات من غير متخصصين على فيسبوك بيحكوا تجاربهم الشخصية من تمرين الطفل بداية من خمس وأربع سنين والنية بتكون إنه يفهم الفكرة من بدري عشان تبقي سهلة عليه بعد كده. ولكن الحقيقة إن ده بدري جدًا، وفي الغالب الطفل في السن ده مش مستعد جسديًا ولا صحيًا ولا حتى نفسيًا إنه يقطع أكل أو شرب لأي فترة أيًا كانت قصيرة.
والمفاجأة إن ده مش هيفرق كتير في تعودهم أو تقبلهم للفكرة الصيام اللي هتبقى فرض عليهم بعده بـ 8 أو 9 سنين لسه! فالأحسن إننا نبدأ تدريجي من سن 7 أو 8 سنين ويكون برده التدريب على الهادي ونكون كمان متأكدين من طبيب الأطفال إن صحة ولادنا تسمح بالصيام وإن عدم شربه المياه لكام ساعة ده مش هيضرهم بالذات في الأيام الحر.
نبدأ نعوّدهم ازاي؟
-
نحببهم في الفكرة:
لازم الصيام يبقى مرتبط في البيت عندنا بجو مبهج وزينة في البيت وفرحة وحسن استقبال للشهر الكريم، ونتكلم مع ولادنا عن احنا أصلًا بنصوم ليه وليه ده حاجة مهمة ومفيدة كمان لينا.
-
تدريجي:
نبدأ الصيام مع الأطفال بساعة واحدة بس قبل الفطار يمنعوا فيها الأكل والشرب ونزود تدريجي لحد ما يبدؤوا يصوموا من العصر للمغرب وبعدين من الضهر للمغرب وهكذا. المهم إنهم يحسوا بلمة وحلاوة الفطار سوا وقت آذان المغرب.
-
بالهداوة:
الأيام اللي عايزين يقطعوا صيامهم فيها أو الأيام اللي احنا حاسين إنهم بيتدلعوا فيها ومش عايزين يكملوا بلاش ناخد الموضوع على أعصابنا ونقفش عليهم أو نحسسهم بالذنب لأن بمنتهى البساطة ممكن يروحوا يفطروا من ورانا! فبالهداوة كده، ونفتكر إن كده كده لسه الصيام مش مفروض عليهم ونفتكر هدفنا البعيد للتدريب على الصيام.
-
احنا البداية:
وفي النهاية بافكركم ما تنسوش إن دوركم الأكبر هو إن نبقى موديل لولادنا في الصيام عن كل حاجة غلط وضبط النفس وتقليل العصبية. رمضان يبقى وقت محبب وجميل في بيتنا تخلّي الولاد يحبوه ويرتبطوا بذكرياته وبروتين اليوم في رمضان من صلاة جماعة لقراية قرآن قبل الفطار لتجميعنا سوا كل يوم وبعدها ييجي التدريب على الصيام واللي هو مجرد قطع الأكل والشرب لكن التدريب الحقيقي هو تدريب النفس.
التعليق باستخدام حساب فيس بوك