الصيام مع الحمل واحدة من أكتر المسائل الشائكة، فيه أمهات بتكون قادرة تصوم ومش حاسة بمشكلة، وأمهات تانيين ما بيقدروش لكن بيكونوا حاسين بالذنب عشان البيبي. خلينا نقول إن مفيش إجابة نهائية في قصة صيام الحامل في الشهر التاسع. رغم إن بعض الأبحاث بتقول إن الصيام ما لهوش أي تأثير على وزن الطفل عند الولادة، لأنه كده كده بياخد احتياجاته من الأم تحت أي ظرف، لكن المشكلة بتكون في الأم نفسها، وتأثير الصيام على صحة الأم. لذلك التوصية الأخيرة والأسلم والأكثر أمانًا إن الست الحامل تقدر تفطر ومش مفروض تصوم في العموم، لكن يا ترى الموضوع بيختلف لما الست تكون في التلت الأخير وخصوصًا الشهر التاسع من الحمل؟
صيام الحامل في الشهر التاسع وسكر الحمل
لو انتي مريضة سكر أصلًا، أو جالك سكر حملسكر حمل، فالصيام في الحالة دي مش آمن، لأن الصيام ممكن يأثر على مستويات السكر في الدم. وبالتالي انتي كأم هيجي لك جفاف، ولما تفطري بالليل مستويات السكر هتعلى جدًا، وبالتالي الوضع ممكن يكون خطر. عمومًا الشريعة الإسلامية بتوصيكي لو حامل ما تصوميش، وتقدري تقضي الأيام دي في أوقات بعد كده أو تعملي إطعام. الشيء الأكيد إنك لو حامل ومصرة تصومي، بنوصيكي تفطري فورًا لو حسيتي إنك مش تمام، وتراجعي الدكتور قبل ما تاخدي الخطوة ودي مجموعة من الحقايق اللي تخص الصيام أثناء الحمل.
العلم بيقول إيه عن صيام الحامل؟
الدراسات بتقول إن تأثير الصيام على الأطفال حديثي الولادة ضئيل أو يكاد يكون معدوم، المشكلة كلها تتعلق بيكي انتي، احتمالات إصابة بالجفاف ونقص الطاقة بسبب الصيام، لكن عمومًا دي شوية حقائق تقدري تعرفيها:
- الصيام مش هيخلي طفلك أكثر عرضة للولادة المبكرة.
- الصيام مش هيخلي وزن طفلك ينخفض عند الولادة.
- الصيام خلال الشهور الأخيرة من الحمل ممكن يحميكي من الإصابة بسكر الحمل.
حاجات هتقول لك ينفع فعلًا تصومي ولا لا؟
اسألي نفسك قبل خطوة الصيام: يا ترى وزنك صحي وعندك نمط حياة صحي ولا لأ؟ لو صحتك مش أحسن حاجة، افتكري إن طفلك محتاج منك عناصر غذائية معينة وبالتالي جسمك محتاج مخزون كافي من الطاقة ومن المحتمل يكون للصيام تأثير أقل، عمومًا الطريقة اللي جسمك بيتعامل بيها مع الصيام بتعتمد على:
- صحتك العامة قبل الحمل
- انتي في انهي مرحلة من الحمل
- هتصومي كام ساعة 11 ولا 18؟
- الصيام في الصيف ولا في الشتا.
صيام الحامل في الشهر التاسع .. علامات مهمة خدي بالك منها
لو خلاص حالتك تسمح بالصيام وقررتي تصومي وبدأتي فعلا، دي علامات تقولك انك محتاجة توقفي صيام:
- وزنك مش بيزيد، أو بتخسي، لذلك اوزني نفسك بانتظام.
- حاسة بعطش شديد أو بتتبولي بشكل أقل، أو لون البول داكن، لأن دي من علامات الجفاف، اللي ممكن تصيبك بالتهاب المسالك البولية.
- لو حسيتي بالدوخة أو حصل لك إغماء أو ضعف أو ارتباك أو تعب، حتى بعد ما ترتاحي كويس، في اللحظة دي افطري فورًا على مشروب سكري ووجبة خفيفة مالحة أو محلول معالجة الجفاف عن طريق الفم وطبعًا اتصلي بطبيبك.
ازاي تخلي الصيام أسهل في شهور الحمل الأخيرة؟
- خليكي في الأمان دايمًا، يعني لو الجو حر، خليكي في الضل دايمًا، لو في تكييف شغليه، ما تشربيش مياه مبالغ فيها في السحور، اشربي الكمية المعتادة، وخدي أكل فيه سوايل كتير زي الياخني والشوربة.
- دخلي في نظامك سواء في الفطور أو السحور حبوب كاملة وخضورات وفواكه وفاصوليا.
- كلي كميات قليلة في السحور، وما تاخديش أكلات فيها نسب عالية من الدهون أو الموالح.
- ما تمشيش مسافات طويلة أو تشيلي حاجة تقيلة.
- قللي من شغل البيت وأي مجهود زيادة.
أفضل فطار .. لو حامل في الشهر التاسع وقررتي تصومي؟
- كلي ببطء أثناء الفطار.
- ابدأي بوجبات خفيفة زي الشوربة.
- استخدمي أطعمة فيها سكريات طبيعية زي الفاكهة ومشروبات الحليب.
- استخدمي طعام غني زي اللبن والبروتين واللحوم المطبوخة والسمك والبيض والفاصوليا.
- الكاربوهيدرات المعقدة والحبوب الكاملة والبذور والأكل الغني بالألياف زي البقول والفواكه المجففة والحمص والبطاطس.
- ما تاخديش أكل مليان سكريات لأنه هيرفع السكر في الدم بسرعة وينزله بسرعة فيبدأ الشعور بالإغماء والدوخة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك