محتويات المقال
من كام يوم أم بعتت لي مشكلة مع بنتها وهي إنها اكتشفت إن بنتها اللي عندها 9 سنين بتاكل من وراها ومفروض إنها صايمة وما فطرتش ولا يوم. والأم مش عارفة مفروض تتصرف ازاي! هل تتجاهل الموضوع؟ ولّا تواجه البنت؟ ولّا تعاقبها على الكذب ولّا على كسر الصيام؟ ولّا إيه بالظبط! عشان كده، قررت أكتب المقال ده عشان تعرفي أكتر عن صيام طفلك في رمضان وازاي تتصرفي لو طفلك كسر صيامه.
صيام طفلك في رمضان
ليه الطفل ممكن يفطر في السر؟
بداية كده، ده تصرف يكاد يكون عادي على طفل تفكيره لسه محدود في قصة الصيام والحلال والحرام. والبنت في مرحلة تدريب لسه مش فرض عليها الصيام. لكنها صامت كل الأيام، وده عبء شوية على طفلة في سنها. فيوم ما كانت عطشانة أو جعانة، من غير ما تفكر في قصة “الكذب” قررت تعمل ده ببساطة، ومن غير ما حد يشوفها عشان تفضل في عيون اللي حواليها “البطلة” اللي بتصوم رمضان كله وتبقى كبني آدم مناسبة لتوقعات اللي حواليها منها.
طيب إيه التصرف الصح في الموقف ده؟
-
المواجهة:
طبعًا في الحالة دي، ما ينفعش نعمل نفسنا مش واخدين بالنا ولازم نواجه الطفل لكن المواجهة تكون بالهداوة ومن غير ما نحسس الطفل إنه صغير في عنينا أو قدام نفسه. مش لازم نزنقه يعني ونسأله ده حصل ولّا لأ، فيضطر يكذب علينا حفاظًا على منظره أو خوف من الأهل. زي: “أنا لاقيتك بتاكلي وكنت فاكراكي صايمة إنتي جعانة وعايزة تفطري؟”
-
بالهداوة:
نسمع من الطفل هو عمل كده ليه وكان حاسس بإيه، ونشكره على صراحته، طول ما احنا كلامنا مع الأطفال من غير هجوم وفي نفس الوقت بحزم وباحترام، ده هيشجعهم يعبروا عن نفسهم بدون خوف مننا. ووقتها هنقدر نتكلم معاهم عن إن ده يعتبر كذب وكده صيامنا مش حقيقي ومش مقبول.
-
البدايل المتاحة:
نوفّر للطفل بدايل تانية لما يحس بتعب او جوع أو عطش، وندي له أوبشن إنه يفطر لو اليوم طويل أو حر وممكن كمان نحط لهم إزازة مياه وساندوتش في الشنطة ونعرّفهم إنه لو حسوا بتعب يقدروا ما يكملوش صيام عادي، لازم الطفل يتاكد إنه في مرحلة تدريب على الصيام وإننا مش بنجبره يعمل حاجة ما يقدرش عليها عشان ما يضطرش يكذب علينا في الآخر. ونأكد عليه إن أهم حاجة ما نعملش حاجة واحنا مستخبيين أو خايفين حد يشوفنا.
ولو شادّين في موضوع الصيام وبنقارن الأطفال ببعض أو بنديهم هدايا عن كل يوم صيام أو بنفضل نشكر في الصايم ونتجاهل الطفل الفاطر، ضروري نوقف ده فورًا. لأننا بنتخيل إن كده بنشجّع الأطفال لكن في الحقيقة احنا بنخليهم في وضع المنافسين واللي بيصوم عشان الهدية وبنفقدهم المعني الحقيقي للصيام.
التعليق باستخدام حساب فيس بوك