صيام مريض السكر من أكبر الأسئلة الموجودة سواء في مواقع الصحة أو في مواقع الفتاوى. وبما إننا مش موقع طبي ولا موقع فتاوى، فنصائحنا هنا هتكون متوجهة لك لو انتي مريضة سكر وقررتي تصومي وطبيبك قال لك إن مفيش مانع طبي يمنعك من الصيام، وعليه فتقدري تصومي طبقًا للشريعة الإسلامية. تعالي نشوف ازاي تضمني صيام آمن ليكي ولعيلتك في حالة إصابة حد منكم بمرض السكر.
لو حامل يبقى لازم تشوفي 10 أسباب تمنع الحامل من صيام رمضان
نصائح صيام مريض السكر في رمضان
- تنظيم الوجبات من الفطار للسحور.
- أنواع الطعام في السحور.
- قياس السكر بشكل منتظم.
- الانتباه لعلامات نقص السكر.
- صيام مريض السكر من النوع الأول.
هنا ممكن تشوفي أعراض سكر الحمل وطرق الوقاية منه
تنظيم الوجبات من الفطار للسحور
خلال ساعات الفطار من المغرب للفجر، لازم مرضى السكر ياخدوا بالهم من الوجبات. ما ينفعش ياكلوا الفطار كله بشكل مفاجيء وقوي مرة واحدة أو زي ما بنقول كده “يدبوها”، لإن ده خطر جدًا على نسبة الأنسولين وممكن يؤدي لهبوط شديد مفاجيء. عشان كده، يفضل مريض السكر من أي نوع ياكل وجبات متقطعة على مدار الفترة بين الفطار والسحور. وأفضل طريقة لفعل ده هيكون هو تقسيم وجبة الفطار نفسها لوجبتين مثلًا، وإضافة وجبة عشا خفيف، وتأخير السحور.
أنواع الأكل في السحور
نوعية الأكل اللي في السحور نفسها بتساعد الجسم على الحفاظ على مستوى السكر معتدل وكمان عدم الشعور بالإرهاق أثناء اليوم. دي بتكون الأكلات اللي امتصاصها بطيء زي الجبنة القريش والشوفان واللبن واللي امتصاصها متوسط مش سريع زي البيض والفول والعدس.
قياس السكر بشكل منتظم أثناء الصيام
ده هيحميكي طول الوقت لإنك هتبقي عارفة على الأقل إذا كنتي محتاجة تفطري في وسط اليوم أو لا. وهيساعدك حتى بعد الفطار في إنك تعرفي امتى لازم تاخدي الدوا أو لازم تروحي للدكتور عشان تغيري الدوا أو تغيري قرار صيامك من الأساس.
الانتباه لعلامات نقص السكر
علامات نقص السكر بشكل عام بتكون دوخة وهبوط وبرودة الأطراف، وكل حالة بتبقى عارفة حالتها وبتبقى عارفة علامات ممكن تكون بتحصل لها هي بس لما سكرها بينقص. لو أي علامة من دول ظهرت، لازم تقيسي السكر ولو منخفض لازم تاكلي فورًا. الصيام ممكن يتعوض لكن صحتك لا.
صيام مريض السكر من النوع الأول
مريض السكر من النوع الأول (من الميلاد أو من الطفولة – علاجه الأنسولين) بيكون معرض مع الصيام (انقطاع الدوا بالذات مش الأكل والشرب) إن مستوى الدم في السكر يعلى جدًا. ده بيعمل حالة اسمها hyperglycaemia ودي بتكون أعراضها عطش شديد وتبول أكتر من المعتاد وإرهاق شديد. لو الحالة دي حصلت، لازم تكسري صيامك فورًا ولازم ترجعي لطبيبك عشان قرار الصيام.
نصائح عامة
- ارجعي لطبيبك دايمًا قبل قرار الصيام.
- طول فترة الفطار، اشربي سوائل كتير مش مسكرة، ومش كافيين. هتضمني إن الجسم يفضل مترطب وشبعان مياه.
- بلاش الأكل الدسم عالي الدهون والسكريات.
نتمنى لك ولعيلتك الصحة والسلامة، ورمضان كريم.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك