المراهقة مرحلة كده تحسوا مالهاش صاحب، كمية تقلبات وهرمونات وخناقات بالعمر كله. والأصعب كمان إننا بنواجه تحدي إن ابننا أو بنتنا المراهقين مش عارفين هم عايزين إيه أو بيعملوا كده ليه أو بياخدوا القرار الغريب ده عشان إيه! وهنا بييجي التخوف الأكبر في حياة أي أم “ابني ما عندوش شخصية”. وده في الغالب بيوصل لنا لما بنلاقيهم بيقلدوا وبيسمعوا كلام الغريب والقريب، المهم إنه يبقي عكس كلامنا. طيب إزاي أعالج ضعف الشخصية عند المراهقين؟
علاج ضعف الشخصية عند المراهقين
-
خدي خطوة لورا:
مهم في مرحلة المراهقة إننا نقدر نسيطر على نفسنا كأهالي، ونعترف إن خلاص جه الوقت اللي ولادنا بيخرجوا فيه من تحت جناحتنا. ناخد خطوة لورا ونقلل تدخل وتعليق على كل صغيرة وكبيرة، نسيبهم يجربوا تحت عينينا، ونلبس شوية في تربيتهم شخصية الصاحب أكتر من شخصية الأب والأم.
-
اقبليه زي ما هو
التغيرات اللي بتحصل للمراهقين بتخلينا مخضوضين وقافشين عليهم معظم الوقت، وده بيضرب ثقتهم في نفسهم وبيحسسهم بإن دايمًا مطلوب منهم حاجة مختلفة عشان يبقوا مقبولين! فكري نفسك دايمًا إن لولا غلطات طفلك شخصيته مش هتتكون، فاقبلي التغيير ووصلي له حبك غير المشروط بتصرف معين، لأن ده أول طريق إنه يقبل نفسه ويثق فيها.
-
ما تقلليش من اهتماماته:
اهتمامات المراهق بالنسبة له أهم وأحلى حاجة في الدنيا، ولكن تبان لنا دايمًا تافهة أو مش وقتها. وبالتالي ده ممكن يوصل له إنه لا بيعرف يختار ولا يقرر لأن أي حاجة بيحبها هي حاجة مالهاش لازمة. قربي منه وانزلي لمستواه. وجربي كده تاخدي وتدي معاه في اللي بيحبه.
-
حببيه في جسمه:
من أكتر الحاجات اللي بتأثر على ثقة المراهق في نفسه هي التغييرات الجسدية اللي بتبان خلال سنين البلوغ. أبعاد جسم جديدة مع حبوب الشباب مع مناخير كبرت فجأة بيخليهم يتخضوا. دورنا إننا من قبل المرحلة دي نبني مع ولادنا صورة جسم إيجابية وما نعلقش ولا نسمح لحد يعلق على شكل أو جسم أو شعر ولادنا. مهم كمان إننا نبقي متكلمين بمنتهي الأريحية معاهم عن البلوغ وتغييراته قبلها بفترة عشان يتأكدوا إن ده طبيعي.
-
اشركيه في قراراتك:
بما إن المراهق في الغالب متهور، فبالنسبة لنا هو آخر واحد ناخد رأيه في قرار مهم وبنبقى فاكرينهم مش واخدين بالهم! جربي خدي رأيه وناقشيه في مشاكلك واطلبي مساعدته وعرّفيه إنتي قد إيه بتثقي في رأيه وطريقة تفكيره وتحبي تسمعي رأيه وإنتي هتلاقي فرق كبير في ثقته فيكي وفي نفسه.
التعليق باستخدام حساب فيس بوك