أطفال كتير ممكن تكون بتعاني من مشكلة في نظرها بس مش عارفين وممكن يكونوا مش قادرين يعبروا عن الموضوع ده. عشان كده، لازم احنا كأمهات نكون مركزين في أي تغييرات نلاحظها على ولادنا تبيّن لنا إن فيه مشكلة في النظر لإنها كل ما بتتلحق بدري، كل ما بيكون علاجها أسهل.
في المقال ده، هنقول لك علامات تبين لك إن الطفل بيعاني من مشكلة في النظر ومحتاج يتعرض على دكتور عيون.
في حالة الأطفال الرضع:
- لو البيبي مش بيقدر يتابع أي حاجة بتتحرك قدامه بعد ما يتم 3 شهور.
- لو البيبي لسه مش بيبص لك أو يركز معاكي بعد التلات شهور.
- لو لاحظتي إن جفن العين وارم أو نازل لتحت وشكله مش طبيعي.
- لو عينه بتدمّع كتير وهو مش بيعيط.
- لو لاحظتي إنه بيبرّق جامد لما بييجي يبص على حاجة.
الأطفال الأكبر – سن المدرسة:
- طبعًا أول وأشهر علامة هي إن الطفل يكون محتاج يقرب من التلفزيون أو بيطلب باستمرار إنه يقرب من الشاشة التعليمية أو السبورة في المدرسة.
- بيفرك عينيه باستمرار. طبيعي إن الأطفال الصغيرة بتفرك عينيها وقت النوم أو العياط لكن ده بيكون مختلف لإنه في وقت مركز في حاجة وباصص عليها.
- الطفل يكون بيشتكي من الصداع طول الوقت حتى لو نايم كويس وواكل كويس ومفيش مجهود جسدي.
- بيقفل عين واحدة وقت القراءة أو وقت التلفزيون.
- لو الطفل بيشتكي كتير إنه عينيه واجعاه أو بيشوف الحاجة مزدوجة أو بيشوف الصبح أكتر من بالليل.
- لو لاحظتي إن العين بتتحرك لجوه بطريقة غير الطبيعي.
- لو الطفل عنده حساسية جامدة من النور أو بيتضايق من الأنوار العالية والفلاش.
في النهاية، فريق راحة بالي بيقول لك إن للأسف أوقات بيكون فيه مشكلة في نظر الطفل بس أعراضها مش واضحة للأهل، والطفل مش بيشتكي ومش حاسس بالمشكلة. عشان كده، بننصحك بالكشف الدوري على أطفالك عشان تتطمني على سلامة نظرهم.
التعليق باستخدام حساب فيس بوك