محتويات المقال
المحشي عند المصريين أكلة مقدسة محبوبة جدًا، الأطفال بيموتوا فيه بكل أشكاله والكبار بيعشقوه وخصوصًا في رمضان بيكون المحشي هو ملك الأصناف على السفرة ويا سلام بقى لو كان طاجن محشي ورق العنب. المشكلة إن ست البيت دايمًا بتشيل همه وهم تجهيزاته وبيشوفوه من الأكلات الصعبة اللي بتاخد وقت طويل جدًا في إعدادها وبتتنسف على السفرة في غمضة عين وخصوصًا ورق العنب. ومين فينا ما بيعشقش محشي ورق العنب ومزازته وصوابعه الملفوفة بإحكام وحرفنة وصباع وراه صباع والواحد ينسى نفسه مع الحلة.
نعمل إيه طيب عشان نسهّل على نفسنا عمل المحشي في البيت؟
- ممكن جدًا تعملي خلطة المحشي وتشيليها في الفريزر بسهولة جدًا بحيث تكون جاهزة عندك للحشو على طول واستعيني دايمًا بأجهزتك المطبخية عشان تنجزي وقتك يعني خضرة المحشي ممكن تتغسل كويس وتتنشف كويس جدًا واستخدمي محضرة الطعام عشان تفرميها باستخدام زرار pulse عشان ما تتهريش معاكي.
- تقدري كمان تستخدمي الصلصة الجاهزة بدل الطماطم الطازة اللي بتاخد وقت طويل في تجهيزها.
- ورق العنب ممكن تجيبيه طازة في الموسم بتاعه وتخزنيه بحيث يكون موجود عندك طول السنة وممكن كمان تستخدمي ورق العنب المحفوظ في البرطمانات في غير الموسم بتاعه. أهم حاجة أنك تنقعيه شوية في مياه عشان تتخلصي من الملوحة بتاعته اللي بيسببها المحلول الملحي المحفوظ فيه.
- مش لازم تكوني دقيقة قوي في لف المحشي، المهم في النهاية الطعم واللمة على حلة المحشي السخنة على سفرة واحدة.
- وأخيرًا خلي كل أفراد الأسرة يساعدوكي في لف المحشي، هتلاقي الوقت عدّى والحلة خلصت بسرعة وهتعملي معاهم ذكريات حلوة كمان، صدقيني هتبقى تجربة جميلة وهتفتكري الست الوالدة لما كانت تقول لك تعالي ساعديني ولفي لك صباعين.
وعشان الجريمة تكمل جيبنا لك النهاردة طريقة لذيذة لعمل وجبة كاملة متكاملة، طاجن محشي ورق العنب بالريش الضاني في الفرن.
مقادير طاجن محشي ورق العنب بالريش الضاني فالفرن
لعمل محشي ورق العنب هتحتاجي
- ورق عنب طازة مسلوق في مياه وملح وليمون أو مجمد حسب المتوفر
- 1 كوب بقدونس مفروم
- 1 كوب كزبرة مفرومة
- 1 كوب شبت مفروم
- 1 بصله كبيرة مفرومة ناعم
- 3 فص توم مفروم ناعم
- 2معلقه صغيرة كزبرة ناشفة
- 1 معلقة صغيرة قرفة
- 1 معلقة صغيرة نعناع ناشف
- ملح وفلفل
- 1/2 معلقة صغيرة شطه (اختياري)
- 2 كوب رز مصري مغسول ومنقوع
- 1 كوب عصير طماطم
- 2 معلقة كبيرة صلصة طماطم
- زيت نباتي
- شرايح بصل وبطاطس لتسوية ورق العنب
مقادير الريش الضاني:
- ½ ك ريش ضاني
- 1 بصل مقطعه أرباع
- ورق لورا وحبهان
- عود قرفة خشب
- 1معلقة صغيرة حبوب الفلفل الأسود
- 3 فصوص توم سليمة
- 1 معلقة كبيرة دبس رمان وعصير ليمون (يضافوا للمرقة بعد سلق الريش)
- ملح
- زبدة
طريقة عمل طاجن محشي ورق العنب بالريش الضاني في الفرن
- أولًا: لسلق الريش، هتشوحي الريش الضاني في الزبدة على نار عالية وبعدين تضيفي عليها البصل والقرفة والحبهان واللورا وفصوص التوم وحبوب الفلفل الأسود وبعدين تضيفي المياه.
- هتسيبيها تتسلق على نار هادية لحد ما تستوي، تقريبًا 30-45 دقيقة، وهترفعيها من الشوربة وتصفي الشوربة كويس وتحتفظي بيها لتسوية ورق العنب.
خطوات تجهيز محشي ورق العنب
- في زيت نباتي، هتشوحي البصل والتوم وبعدين تضيفي عصير الطماطم وصلصة الطماطم وكل البهارات، وتسيبيها تتسبك شوية وبعدين تضيفي الرز المنقوع ومتصفي وتقلبيه كويس وآخر حاجة تطفي النار وتضيفي الخضرة.
- بعد ما تبرد حشوتك، هتحشي ورق العنب وتدهني طاجن الفخار بالزيت النباتي وترصي طبقة من شرايح البصل والبطاطس وبعدين ترصي ورق العنب وبعدين ترصي فوقيه الريش الضاني.
- ضيفي لمرقة الريش الضاني معلقة من صلصة الطماطم وعصير الليمون ومعلقه كبيرة دبس الرمان وملحيها قبل ما تسقي بيها الطاجن.
- ضيفي بعد كده مرقة الريش الضاني حوالي كوبين وغطي الطاجن بتاعك كويس بالفويل.
- سويه في فرن متسخن على درجه حرارة 200 لحد ما يشرب المرقة وبعدين هدّي الحرارة لـ170 درجة وسيبيه لحد تمام التسوية.
- قدمي الطاجن سخن مع السلطة الخضرا وسلطة الزبادي لوجبة كاملة لذيذة.
جرّبي الطريقة دي لمحشي ورق العنب واحنا هنا جيبنا لك طريقة حشوة ورق العنب بالتفصيل ولو مستعجلة وما عندكيش وقت، تقدري تستخدمي ورق العنب الملفوف جاهز للتسوية وإضافة الريش الضاني هتديله طعامة مش طبيعية وتقدري كمان تستخدمي الريش البتلو بنفس الخطوات.
لو بتحبي الأكلات الجديدة، شوفي هنا قالب البطاطس باللحم المفروم
التعليق باستخدام حساب فيس بوك