محتويات المقال
طرق إزالة الشعر في المنطقة الحساسة أصبحت متنوعة جدًا، منها بيكون عن طريق كريم إزالة الشعر أو ماكينة إزالة الشعر أو الليزر وغيرها كتير، وقرار إزالته واحد من الخيارات الشخصية اللي بتعود لصاحبته، لإن فيه اللي بتلجأ لها من باب النظافة الشخصية وفيه اللي عايزاها من باب التجميل.
بس الفكرة هنا ازاي نعملها من غير إحساس بالألم؟ خصوصًا في المنطقة الحساسة! وهنا الموضوع بيتفرع لكذا جانب:
- إما إزالة للشعر بشكل شبه دائم، وده بيتطلب في حد ذاته اللجوء لعيادات جلدية متخصصة وبتكون مكلفة جدًا.
- إزالة مؤقتة، واللي بدورها بتنقسم ما بين طرق بلا ألم تأثيرها قصير، وطرق مؤلمة شوية لكن تأثيرها قد يمتد إلى 4 أسابيع.
احتارتي، مش كده؟ بس ما هاطوّل حيرتك كتير، تعالي نستعرض مع بعض الطرق دي وانتي قرري مين الأنسب ليكي.
إزالة الشعر بالليزر:
زي ما قلت لك ده واحد من الخيارات اللي هتحتاج منك تختاري عيادة جلدية متخصصة، مش أي مركز تجميلي وخلاص، علشان لو خاطرتي وروحتي لمكان غير متخصص، فانتي بتعرّضي نفسك لخطر الإصابة بإصابات جلدية قد تكون دائمة.
عدد الجلسات اللي هتحتاجي لها بيتحدد لك في العيادة على حسب نوع الجهاز وسُمك الشعرة عندك، لكن ضيفي لمعلوماتك إنك ممكن تحتاجي بعد عدة أشهر لجلسة أو اتنين للحفاظ على النتيجة. ده كان بخصوص إزالة الشعر بدون ألم خارج البيت، بس لإننا بنحب البيت، تعالي نتكلم مع بعض ازاي نحل الموضوع ده.
اقري هنا عن إزالة الشعر بالليزر .. دليلك قبل هذه الخطوة
كلنا عارفين الطرق الاعتيادية في إزالة الشعر، وبتضايقنا بسبب الإحساس بالألم، مع إن النقطة دي تكاد تكون اتعالجت مع وجود كريمات تخدير موضعية بتخلّي الموضوع سهل، كإنك بتعملي العملية دي في حد تاني، خصوصًا إن نتايجها كلها بتتفق على إنها بتريّحنا من الشعر غير المرغوب فيه لمدة تتراوح من تلات أسابيع إلى أربعة، وفي نفس الوقت، مع الانتظام عليها سُمك الشعرة نفسه بيقل وبيكون أخف بكتير. وطبعًا فيه الطرق السريعة، واللي بتكون فعلًا من غير ألم، بس دي آخرها أسبوع ويبدأ الشعر في النمو وهو واخد وضع صبار صحراء الربع الخالي، سخيفة جدًا لكن سريعة لأقصى حد. يبقى كده اتفقنا إن اللي بتسبب ألم ممكن يتعالج باستخدام كريم مخدر موضوعي متوفر في الصيدليات قبل البدء في عملية إزالة الشعر، واللي مش بتسبب ألم نتيجتها قصيرة جدًا، تعالي نقولك إيه هي.
طرق بلا ألم:
الحلاقة:
أسهل وأسرع طريقة على الإطلاق، بس ما تخليش الفكرة دي تخدعك. استخدام الشفرة له قواعد وخصوصًا لو هتستخدميها على المنطقة الحساسة، لإنك وقتها بتتعاملي مع جلد طري غير مشدود، مش زي جلد الساق مثلًا، ده بجانب إن شفرة الحلاقة العادية غير مصممة أبدًا للاستخدام في المنطقة دي واللي لو استخدمتيها، هتعرّضي جلد لخطر الجروح. علشان كده، من المهم تختاري شفرة حلاقة مخصصة للمنطقة الحساسة زي شفرات فينوس اللي بتيجي بأشكال مختلفة ومصممة بالشكل الصحيح، ولو انتي هتستخدمي الحلاقة في إزالة شعر الجسم، فبننصحك تشوفي الـ 10 نصائح دول قبل الاستخدام.
كريم إزالة الشعر:
طريقة سهلة جدًا بتاخد من 3 دقايق لحد 10 دقايق في أقصى تقدير، مش بتحتاجي غير إنك تحطي الكريم بالطريقة الصحيحة، وتستني الدقايق دي، وبعد كده تقدري تزيلي الشعر بكل سهولة. بس برضه انتبهي لنقطة مهمة جدًا، مش أي كريم تستخدميه! مهم جدًا جدًا تعملي اختبار حساسية قبل استخدام الكريم. طيب إيه هو اختبار الحساسية؟ هو إختبار بتعمليه على بقعة حساسة من جلدك قبل استخدام أي مستحضر تجميل بـ24 ساعة، والمناطق الحساسة هي عند منابت الشعر خلف الرقبة، أو جلد دراعك الداخلي، بتحطي نقطة صغيرة من الكريم وتستني 15 دقيقة وبعد كده تغسليه وتستني 24 ساعة. لو ظهر أي ملامح للتحسس، يبقى المنتج ده غير مناسب ليكي.
طيب دلوقتي عملنا خلاص اختبار الحساسية والدنيا تمام، فاضل نقطة كمان، كريمات إزالة الشعر بتختلف مدة بقائها على الجلد من كريم للتاني، يعني الكريم اللي مكتوب على العبوة بتاعته 5 دقايق، بيكون فيه خطر على جلدك لو قعد أكتر. قد يسبب مشكلة جلدية حقيقية قد تتطلب التدخل الطبي، يعني اتبعي التعليمات بالظبط زي ما مكتوبة على عبوة المنتج.
ممكن تقري كمان العناية بالمنطقة الحساسة لمعلومات أكتر.
يبقى الليزر بتكلفته العالية والحلاقة وكريم ازالة الشعر يعتبروا ملوك إزالة الشعر بدون ألم مع الفرق الكبير في النتيجة طبعًا. الطرق الأخرى اللي هي منزلية وتقدري تعمليها بنفسك بس تتجنبي ألمها باستخدام مخدر جلدي موضوعي كلها بتتفق على نفس الفكرة، فرد المنتج في اتجاه الشعرة، وإزالته عكس اتجاه نموها واللي هم السكر والليمون أو زي ما بنقول عليها بشكل دارج الحلاوة، والشمع، والنتف وحتى ماكينة السيلك أبيل.
ولو تحبي تعرفي أكتر عن ازاي تهتمي بالمنطقة الحساسة عندك، بارشح لك تشوفي المقالات دي:
تفتيح المناطق الحساسة بأقوى 6 وصفات طبيعية
أفضل أنواع الغسول المهبلي للعناية بالمنطقة الحساسة
أجمد 10 كريمات لتفتيح المنطقة الحساسة من الصيدلية
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك