محتويات المقال
سواءً بنحط مكياج كامل أو شوية لمسات بسيطة، للأسف نسبة كبيرة مننا بتهمل إزالة المكياج بشكل كامل بعد انتهاء اليوم. وده خطر جدًا على صحة بشرتك. صحيح فيه مستحضرات إزالة مكياج كتير في الأسواق، بس هنقع في نفس فكرة إنها غير فعالة أو قوية جدًا على البشرة أو مليانة مواد كيميائية. علشان كده، لازم نرجع للطبيعة ونتعلم ونعرف طرق إزالة المكياج طبيعيًا بمكونات متوفرة في بيتك.
علشان نساعدك في التغلب على المشكلة دي وفي نفس الوقت تحصلي على تنضيف عميق لبشرتك ، جبنا لك خمس طرق طبيعية سهلة لإزالة الماكياج.
طرق إزالة المكياج بخلطات طبيعية
-
إزالة المكياج بزيت جوز الهند
المكون الرائع ده اللي تحسي إنه حقيقي سحري ومش هيخذلك في أي إستخدام. جمال زيت جوز الهند هو قدرته على إزالة المكياج المقاوم للمياه، اللي يعتبر أقسى أنواع المكياجات وأشدها على البشرة. خبراء البشرة بيقولوا أن جوز الهند عشان بيتكون من أحماض دهنية ومركبات طبيعية، فله القدرة على اختراق المكياج الثابت وتنضيف البشرة بعمق بمركباته المقاومة للبكتيريا وقدرته على ترطيب البشرة في نفس الوقت. وأفضل طريقة لاستخدامه إنك إما تدهني على بشرتك وتسيبيه لمدة عشر دقايق وبعد كده تستخدمى القطن في إزالته أو تجيبي قطع قطن وأغمريها بزيت جوز الهند واستخدميها مباشرةً على بشرتك. هتنبهري بالنتيجة.
-
إزالة المكياج بالحليب
الحليب من ضمن فوائده اللي محدش يختلف عليها، كونه واحد من أفضل طرق تنضيف البشرة. البروتينات الموجودة في اللبن لها قدرة عالية على ترطيب البشرة وتغذيتها في نفس الوقت. وأكيد كلنا سمعنا عن ملكات زي كليوباترا إن واحد من أسرار جمال بشرتهم هو استخدامهم للبن عليها. وهو زي ما هو مرطب قوي، فهو منظف برضه وله قدرة فعالة في إزالة المكياج. كل اللي هتحتاجي له هو بس قطعة قطن مبللة بشوية لبن واتفرجي على السحر بنفسك.
-
بلسم إزالة المكياج
مستغربة من الفكرة؟ بس حقيقي ده اختراع رائع وبيدوم معاكي لشهور. كل اللي هتحتاجي له هو ربع كوباية من زيت الزيتون أو اللوز + ربع كوباية من شمع العسل. على نار هادية، حطي المكونين دول مع بعض لحد ما يمتزجوا تمامًا بسبب الحرارة، صبي الخليط ده في برطمان نضيف وسيبيه يبرد. انتي دلوقتي عندك واحد من ألطف مزيلات المكياج، وفي نفس الوقت مغذي جدًا وفعال. كل اللي هتعمليه بعد كده هو إنك بقطعة قطن تفردي ده على بشرتك وهتلاقي إن المكياج بيتشال بكل سهولة.
-
جل الصبار لإزالة المكياج
كلنا نعرف روعة أثر الصبار على البشرة. يعتبر علاج لأغلب مشاكل البشرة بشكل حقيقي وفعال. وأفضل طريقة لاستخدامه في إزالة المكياج هو إنك تخلطي الجل ده مع معلقتين زيت زيتون وقومي بإزالة المكياج بيها.
-
إزالة المكياج بـ بيكربونات الصوديوم (صودا الخبز) مع العسل
المزيج ده يعتبر من أكتر المغذيات للبشرة وعنده القدرة على إزالة المكياج بعمق بدون الإضرار بالبشرة. كل اللي هتحتاجي له شوية عسل طبيعي على قطنة، عليهم شوية صودا خبز وابتدي نضفي وشك. المزيج ده منظف ومقشر في نفس الوقت. مش هتحتاجي تفركيه. بالعكس نضفي بهدوء وبعد كده اغسلي بشرتك بمياه فاترة.
حاولنا نجيب لك أسهل طرق إزالة المكياج بطريقة طبيعية وفي نفس الوقت تكون مناسبة لكل أنواع البشرة وتقدر أي وصفة من دول إنها توفر الترطيب والتنظيف العميق للبشرة والتغذية. لكن فيه مجموعة نصائح لازم تتبعيها علشان تقدري تحافظي على بشرتك زي:
- اهتمي بنظافتها يوميًا صباحًا ومساءً.
- استخدمي واقي من الشمس يوميًا.
- ابعدي على قد ما تقدري عن المكياج الثابت أو المقاوم للماء.
- احرصي على إزالة المكياج بالكامل: شوية آثار منه ليها تأثير سلبي على بشرتك.
- اشربي مياه كتير وتناولي فاكهة وفيتامينات خصوصًا لو عديتي سن التلاتين.
- ابعدي عن الوجبات السريعة واللي مليانة بهارات وشطة.
دي أكتر النصائح المتداولة في عالم الجمال للحفاظ على البشرة. حاولى تخليها جزء أساسي من روتين حياتك اليومية لأن حقيقي على قد ما اهتميتي بنفسك وحبيتيها على قد ما الناس هتهتم بيكي وتحبك. حب الناس ليكي انعكاس حبك لنفسك. أشوفك في المقال الجاي.
التعليق باستخدام حساب فيس بوك