لو حماتك عندها طبع الغيرة ملحوظ وواضح، فأكيد ده هيكون مأثر على حياتك الزوجية بشكل سلبي، وهتكون في حرب باردة طول الوقت. وعلشان تريحي أعصابك وتعيشي حياة هادية، هنقول لك في المقال ده على طرق التعامل مع الحماة الغيورة.
نصائح للتعامل مع الحماة الغيورة
- تفهم الطبع
- عدم الاستفزاز
- إعطائها أهمية
- البعد عن المقارنة
- ترك مساحة لها
-
تفهّمي طبعها
ما تحسيش إن المشاكل والغيرة دي، موجهة ليكي كشخص. لكن هي في الحقيقة مشاعرها هي تجاه ابنها، وكانت هتحصل مع أي زوجة ابنها هيرتبط بيها، وهتلاقيها بتحصل مع بقية زوجات ولادها، لإنك لما ما تاخديش الموضوع بشكل شخصي، هتفرق كتير في أعصابك، وطريقة ضيقك من تصرفاتها.
-
ما تستفزيهاش
مش لو عندك طفل بيغير من اخواته، بتحاولي تقدري وتتفهمي ده طول الوقت؟ وهتحاولي ما تعمليش تصرفات تستفز غيرته؟ نفس الشيء اعمليه مع حماتك. مش لازم تبيني لها إن جوزك اللي هو ابنها، بيجيب لك هدايا مميزة عنها، أو بيشاركك تفاصيل مش بيشاركها معاها، لإن لو حسستيها إنك الأولوية في حياة جوزك، فإنتي كده جيتي لها على الجرح.
-
اعملوا لها أهمية
وده هييجي عن طريق جوزك بالدرجة الأولى وبعدين عن طريقك، خليه هو اللي يرتب مواعيد زيارته لها، وهو اللي يكلمها ويحكي لها أي حاجة تقدروا تشاركوها معاها، ولو مثلًا مسافر، خليه يكلمها يطمنها عنه، مش انتي اللي تطمنيها على ابنها، لو هياخد شغل جديد واتفقتي انتي وجوزك مع بعض خلاص، ما تبلغوهاش كخبر، لكن خلي جوزك يجيبها لها عن طريق إنه بيستشيرها، وبياخد رأيها في الشغل الجديد ويقبله ولا لا. ويُفضل إن الحوارات اللي بينهم دي ما تكونش في وجودك، علشان الحماة تحس بخصوصية أكبر بينها وبين ابنها.
-
ابعدي عن المقارنة
وخصوصًا في الأكل والحاجات الي هي ربت عليها ابنها، حسسوها طول الوقت إن أكلها ما لوش زي، وإن ابنها دايمًا فاكر طعم الأكلات اللي بتعملها، وخليه يطلب منها بعض الأكلات دي، وانتي كمان احكي لها إن جوزك طول الوقت بيمدح في أكلها، أو بيحكي عن مواقف حلوة بينهم لما كان صغير، وهكذا.
-
سيبي لهم مساحة
في حالة الحماة الغيورة، يفضل إنك ترجعي خطوتين ورا في العلاقة دي، ومش لازم رجلك تكون على رجل جوزك في كل ما يخص مامته، خليه يزورها لوحده، ويوصلها مشاويرها لوحدهم، ده هيرجع لها مشاعر إن ابنها لسه ملكها زي زمان، وإنك ما اخدتيهوش منها ولا حاجة، وبالتأكيد ده هيهديها شوية.
5 نصائح سحرية هتحسن علاقتك بحماتك
التعليق باستخدام حساب فيس بوك