الشغف.. على قد ما الكلمة دي وشعورها حالم جدًا، إلا إن لها بعض الاستخدامات سيئة السمعة دلوقتي، زي إن الشغف يكون شرط للنجاح، أو فقدان الشغف يتحول لشماعة للفشل، وياما علاقات زوجية وعاطفية فشلت بسبب كلمة الشغف دي، وبقينا نسمع الأجيال الجديدة بيقولوها بمناسبة وغير مناسبة، لحد ما فقدت معناها الحقيقي، وبقى الشغف مرادف للمغامرات غير المحسوبة. لكن هل معنى كده إنها كلمة فعلا مالهاش لازمة؟ وتقليعة وموضة وهتخلص على السوشال ميديا وخلاص كده؟ أكيد لأ، ومش معنى إن في ناس بتستخدمها في غير مكانها، يبقى نحكم على الكلمة بالنفي أو الإعدام، وإذا كل الناس محتاجة إن الشغف يحركها في الحياة، فالأمهات هما أكتر فئة محتاجة الشغف ده، لإنها مش مسؤولة بس عن نفسها، لكن عن أسرة كاملة وجيل كامل جديد بتربيه، هتعمل المهام المقدسة دي ازاي وهي فاقدة شغفها كله؟ علشان كده هندردش مع بعض عن الشغف وأسباب فقدانه وطرق التغلب على فقده:
-
إيه هو الشغف؟
محدش هيقدر يديكي معنى علمي للشغف ثابت ما يتغيرش، لإنه شعور كل واحد إحساسه بيه بيختلف، لكن بنقدر نشوفه في لمعة العيون، وفي النشاط المصاحب للفعل، وفي السعادة اللي بتملانا رغم المجهود الصعب، وممكن الشغف ده يكون للحظات، وممكن يمتد لسنين طويلة.
التغلب على فقدان الشغف في الحياة
-
ليه بنفقد الشغف؟
زي بقية المشاعر، مش بتفضل ثابته طول الوقت، وسهل جدًا تتأثر بحاجات خارجية، زي ليه بنبطل نحب حد؟ وليه بنحس بالحزن؟ لو حاولنا نجاوب على الأسئلة دي ممكن نقضي ساعات طويلة وإحنا برضه موصلناش لإجابة نموذجية، لكن باختصار ممكن نلخص الأسباب في المواقف الصعبة، والمفاجآت غير السارّة، والضغوط والتراكمات اللي بتقابلنا، مع استمرار المشاكل دي، بنلاقي الشغف اتسرب ما بين إيدينا شوية شوية من غير ما نحس، لحد ما نصحى في يوم نتفاجئ إننا فقدناه بالكامل، وده ممكن يحصل في حاجة واحدة في حياتنا، أو نفقد الشغف في الحياة كلها.
هل الرجالة كمان بيحصل لهم أعراض زي الدورة الشهرية PMSING
-
ازاي نتغلب على فقدان الشغف في الحياة؟
- نركز كده ونصحصح، علشان نلحق شعور الفقد ده من أوله، مش نبدأ نفوق بعد ما نكون فقدناه بالكامل وساعتها هتكون رحلة الرجوع طويلة.
- نحل المشاكل اللي بتقابلنا أول بأول، ولو مالهاش حل، نبتكر طرق للتأقلم عليها والتعايش معاها وتسهيلها.
- نتأمل ونراجع نفسنا، ونسترجع الأفكار اللي كانت بتدينا الشغف، ونعملها إنعاش تاني.
- تحديد الأهداف مهم جدًا، لإن الطريق الطويل بدون أي علامات ولا محطات ده بيكون ممل جدًا وممكن بسهولة نتوه فين، غير لما أكون حاطط هدف قريب وهدف بعيد وفي إشارات على الجانبين بتقولي باقيلي قد إيه وأنجزت قد إيه.
- نطلب المساعدة، ودي على حسب حالتنا، هل مثلا الكلام مع حد بنثق فيه هيشجعنا نقوم ونكمل. ولا محتاجين لايف كوتش؟ ولا حد متخصص في الصحة النفسية؟.
-
فقدان الشغف هو الاكتئاب؟
طبعا لا.. مع إن ممكن النتايج اللي على الصعيد العملي تشبه بعضها، من فشل وملل وغيره، لكن الأسباب والمشاعر مختلفة، فقدان الشغف وهو فقدان الرغبة في الفعل أو فقدان الحماس، لكن الاكتئاب مختلف تمامًا لإنه شعور بالحزن والانسحاب وغيره من المشاكل النفسية المصاحبة له.
لو ليكي تجربة في إعادة شغفك في الحياة، شاركينا بيها.
2 تعليقان
فعليااا كنت قبل سنوات شغوفة جدا وبخطط لكل حاجة لكن دلوقتي حاسه اني تايهه والشغف للحاجات الي بحبها ضايع يعني تبدا بحاجة وتننهي فجاءه ومقدرش ارجع ثاني
الكتابة رجعتلي الشغف بالحياة .