نوفر في شهر رمضان، طب ازاي ده كله مصاريف ومشتروات وفطار وسحور وعزومات، ومكسرات وياميش، وكمان كحك وبسكوت وغريبة. مصروف البيت بيخلص في أول أسبوع من رمضان، أكيد الكلام ده بتتردد في أذهان ستات كتير! الحقيقة إن التوفير في شهر رمضان ممكن جدًا، طرق التوفير ممكنة وقابلة للتنفيذ. أهم حاجة إنك تكوني عارفة ترتبي أولوياتك وتعرفي إيه المهم فالأهم. والنهارده، في المقال ده، هنشارك معاكي مجموعة نصايح مهمة جدًا هتفيدك توفري فلوسك وتقنني مصاريفك بشكل معقول خلال شهر رمضان 2021.
اعرفي هنا نصائح لتدبير ميزانية رمضان من الأول
طرق التوفير في شهر رمضان
- المنتجات الغالية على قد الحاجة
- المشتروات بدري
- ميزانية محددة للعزومة
- اشتري من الأسواق العامة
- حضري بدل ما تشتري
- ما ترميش البواقي
- توفير الوقت والمجهود
طرق التوفير بالتفصيل
1. اشتري المنتجات الغالية على قد احتياجاتك
المكسرات والياميش من المشتروات الغالية الثمن. عشان كده، دايمًا اشتريها بكميات قليلة على قد استهلاك أفراد أسرتك بدل ما تجيبي كميات كبيرة ويكون عندك فائض كبير، خصوصًا إنها بتفقد طزاجتها مع التخزين الطويل المدى.
2. اشتري بدري عشان تتجنبي الزحمة وغلاء الأسعار
أسعار اللحوم والفراخ والخضار بترتفع جدًا قبل رمضان. عشان كده، يفضل إنك تكوني عاملة قائمة باحتياجاتك لمدة أول أسبوعين على الأقل من شهر رمضان، وتخزنيها في الفريزر بالنسبة للحوم والفراخ. أما بالنسبة للخضار، حاولي تشتريه قبل رمضان بيومين لـ3 أيام وتحفظيه في تلاجتك. مش بس عشان التوفير لكن كمان عشان تتجنبي الزحام الشديد في محلات الخضار ليلة رمضان.
ادخلي هنا عشان تعرفي الطرق السليمة لتخزين وحفظ الأطعمة المختلفة
3. خصصي ميزانية محددة للعزومة
العزومات هي أكتر حاجة بتأثر على الميزانية. عشان كده، حددي بالظبط مبلغ معين مش هتزودي عنه لميزانية العزومة، ودبري كل مشترواتك على قده بالظبط. لو سيبتي الميزانية مفتوحة، هتصرفي كتير جدًا، ومش هتعرفي تتحكمي في كم المشتروات. ومش بس هتهدري فلوس، لكن كمان هتهدري مكونات وخامات زيادة عن اللزوم. أفضل طرق التجهيز للعزومة هو كتابة منيو العزومة بكل أصنافها وكتابة قائمة مشتروات. وبكده تتحكمي أفضل في ميزانيتك وتكوني منظمة ومسيطرة على الموقف.
اعرفي من هنا ميزانية اقتصادية لرمضان لـ16 شخص بالأسعار
4. اشتري من الأسواق العامة
كل منطقة في القاهرة بيكون فيها أسواق عامة فيها محلات للطيور واللحوم والخضروات والفواكه. خليكي حريصة إنك تشتري منها لإن أسعارها بتكون أوفر بكتير من السوبر ماركت، وبتقدري تنقّي الخضار والفواكة براحتك وتشتري الكمية المناسبة ليكي.
5. خليكي لهلوبة وحضّري حاجتك بدل ما تشتري جاهز
العصاير الجاهزة، والحلويات الجاهزة هتكلفك كتير جدًا لو اشتريتيها على مدار الشهر الكريم، لكن لو عملتيها في البيت هتوفري كتير جدًا خصوصًا في البيوت إللي بتستهلك العصاير والحلويات بشكل يومي. ودلوقتي معظم الأفران بتبيع عجينة الكنافة والقطايف، حتى عجينة الجلاش والسمبوسك والرقاق الطري تقدري تشتريهم من الأفران جودتهم بتكون أفضل وسعرهم أفضل بكتير من السوبر ماركت.
ادخلي هنا عشان تعرفي إزاي تحضري مشروبات رمضان زي المحلات. واعرفي ازاي تعملي الكنافة بالكريمة في البيت. وكمان طريقة عمل بلح الشام.
6. اوعي ترمي بواقي الأكل
إعادة التدوير هي واحدة من طرق التوفير الذكية جدًا عشان ما تهدريش بواقي الأكل، خصوصًا في العزومات. أحيانًا بيفيض أكل كتير وطبعًا إنك ترمي الأكل ده قمة في التبذير. عشان كده، خليكي ذكية وعيدي صياغة الأكل تاني يوم بشكل جديد حتى لو بطريقة تقديم جديدة تخلي شكله مشهي. خلّي دايمًا عندك عبوات لتغليف الأكل عشان لو مش هتاكلي البواقي تجهزيها في شكل وجبات وتتبرعي بيها كإطعام عشان غيرك يستفيد منها.
ادخلي هنا عشان تتعرفي على أفكار لإستغلال بواقي الطعام بدون هدر
7. توفير الوقت والمجهود
التوفير في رمضان مش بس توفير للفلوس، لكن كمان توفير الوقت والمجهود مهم جدًا. فيه جدل كبير بين الستات والأمهات على السوشيال الميديا في موضوع تجهيزات رمضان. اتفقنا أو اختلفنا التجهيزات فعلًا بتوفر وقت ومجهود وبتقلل من زمن وقفتك في المطبخ وده بيديكي متسع من الوقت للعبادة أو لالتزامات تانية كتير. أهم حاجة إنك تختاري التجهيزات إللي فعلًا مناسبة ليكي وفعلًا هتريحك وتوفر وقتك ومجهودك، زي تعصيج اللحمة، تجهيز السمبوسك وحشواته، تتبيل اللحوم أو الفراخ، (اعرفي من هنا بالفيديو: تتبيلات الفراخ لوجبات الإسبوع) تسبيك الصلصة، تجهيز عصاير، تخزين خضار، تجهيز مكسرات، المهم تختاري المناسب ليكي ولطبيعة أكلك في رمضان.
اعرفي من هنا روتين تنظيف البيت الأسهل والأسرع
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك