محتويات المقال
ريحته وهو طالع من الفرن سخن ولذيذ، بتضعف قدامها أقوى إرادة بشرية، رغيف العيش السخن الطازة صعب قوي يتقاوم! عمري ما عديت على فرن عيش وقدرت أقاوم إني أدخل واشتري ولو حتى رغيفين تلاتة، ومستحيل كيس العيش السخن يوصل البيت كامل أبدًا، لازم يبقى فيه بعض الأرغفة المفقودة إللي اتنقنقت وانتهى عمرها قبل حتى ما تبرد وتتهوى، شايفاكم ياللي بتاكلوا نص العيش قبل ما تروّحوا بيه!
طب ازاي بقى نحافظ على العيش أطول فترة ممكنة ويكون في أفضل حالاته؟ ازاي نخزنه بطريقة سليمة؟ وازاي نعيد تسخينه بحيث يكون أقرب ما يكون للعيش الصابح؟ ليه أوقات كتير نجيب العيش فلة شمعه منورة، وأما نيجي ناكله تاني يوم يتحول إلى كائن آخر غريب عجيب ما نعرفوش؟ في المقال ده، هنجاوبك على كل الأسئلة دي وهنعرّفك ازاي تسخني العيش وازاي تحفظيه بالطريقة المظبوطة.
ادخلي على اللينك ده عشان تتعرفي على حيل مطبخية مهمة لكل ست.
نصائح وطرق لتخزين العيش
الحفاظ على الخبز طازج – المصدر: epicurious
أكبر عدو لطزاجة الخبز هو تيار الهواء والرطوبة، عشان كده مهم جدًا تحفظي العيش في مكان جاف، بارد، وغير معرض لتيار هوائي. لا ينصح أبدًا بتخزين العيش في التلاجة، لإن درجة حرارة التبريد والرطوبة الموجودة في التلاجة بتأثر بشكل كبير على طزاجة العيش وعلى خواصه وقوامه.
ولو بتحبي تخبزي كيك هنا هتعرفي أهم أسرار نجاح الكيك زي المحترفين.
كمان تخزين العيش في التلاجة ممكن يكون السبب في تعفن العيش وفساده أسرع بكتير من تخزينه في درجة حرارة الغرفة. لو هتستخدمي العيش خلال يومين فقط على الأكثر، تقدري تحفظي العيش بطريقتين في حرارة الغرفة:
- حافظة العيش
الحفاظ على الخبز طازج – المصدر: topratedkitchen
ودي من الحاجات المفيدة جدًا ليكي إنك تستثمري فيها فلوسك، خصوصًا لو بتحبي العيش بأنواعه. الميزة فيها إنها بتوفر البيئة المناسبة للحفاظ على العيش من غير ما ينشف ويجف، ومن غير ما يتأثر بالرطوبة ويصيبه العفن بسهولة، وتعتبر حافظة العيش هي الطريقة المثالية للحفاظ على طزاجة العيش بدون تبريد أو تجميد.
- التخزين في علب محكمة الغلق، البلاستيك الشفاف، أو الأكياس الورقية
الحفاظ على الخبز طازج – المصدر: pinterest
الأكياس الورقية بتكون مفيدة جدًا خصوصًا مع العيش إللي بيكون لها طبقة خارجية مقرمشة زي الباجيت مثلًا، أما الأكياس أو البلاستيك راب بيصلح أكتر مع العيش الطرية زي البلدي، والفينو والتوست مثلًا.
طرق ونصائح هامة عند تفريز العيش
الحفاظ على الخبز طازج – المصدر: pinterest
واحد من أفضل الحلول للحفاظ على العيش لفترة أطول، وخصوصًا لما يكون عندك كمية كبيرة مش هتستخدميها كلها خلال يومين تلاتة. تفريز العيش له قواعد وأصول عشان يخرج العيش من الفريزر بسلام ويفضل طازة وفي حالة جيدة، تعالي نشوف مجموعة نصايح مهمة لتفريز الخبز:
- يفضل دايمًا تفريز الخبز وهو لسه طازة، يعني في نفس اليوم إللي هتشتري فيه العيش، أو هتخبزيه لو كان متحضر في البيت. فيه قاعدة مهمه قوي في تفريز العيش بتقول: إن العيش لما يدخل الفريزر، هيخرج على نفس الحالة إللي دخل عليها، بمعنى إنه لو العيش دخل الفريزر طازة هيطلع طازة، لكن لو بات ليلة واحدة واتخزن بطريقة غلط، وحبيتي تفرزيه هيطلع من التفريز عيش بايت مش طازة أبدًا!
- احفظي دايمًا العيش في أكياس محكمة الغلق وحاولي تفرغي منها الهواء بقدر الإمكان، واتأكدي من سلامة التغليف لإن ده ممكن يأثر بشكل كبير على جودة العيش، ويعرضه لما يسمى بحرق الفريزر.
- قبل تفريز العيش، لازم تتأكدي إنه برد تمامًا، أو على رأي الأمهات والجدات هوي العيش كويس، وخصوصًا لو كنتي شارياه سخن ولسه طالع من الفرن، افرديه كويس في مكان جاف وجيد التهوية، بس لحد ما يبرد، وبعدها تقدريه تفرزيه.
- يفضل إنك تقسمي العيش في صورة حصص على قدر استهلاكك، يعني لو مثلًا هتفرزي عيش بلدي، وانتي في الأغلب بتستهلكي نصف رغيف في الوجبة، قطّعي الأرغفة كلها أنصاف وفرزيها، ولو مثلًا هنفرزي خبز توست وانتي استهلاكك في الوجبة قطعتين، غلفي كل قطعتين مع بعض بالبلاستيك بحيث تكون الحصة الواحدة على قدر الوجبة، وما يكونش عندك هدر.
ولو مبتدئة في الخبازة، ادخلي على اللينك ده عشان تعرفي أ ب مهارات الخبز للمبتدئين.
نصائح هامة عند إعادة تسخين العيش
الحفاظ على الخبز طازج – المصدر: wikihow
- أفضل طريقة تتبعيها عشان تفكي تجميد العيش، وتسخنيه في نفس الوقت، هي إنك تسخني فرنك على درجة حرارة متوسطة، وتحطي العيش في الفرن وهو مجمد، هيفك وهيسخن في نفس الوقت ويبقى في أفضل حالاته.
- التوست المقطّع تقدري تحطيه في التوستر مباشرة، أو في الفرن بنفس الطريقة السابقة.
- لو كنتي مفرزة رغيف خبز كامل، زي الخبز الريفي وخبز الساور دو أو حتى قالب توست كامل بدون تقطيع، يفضل تسيبيه من بالليل يفك في التلاجة لتاني يوم، قبل ما تقطعيه وتسخنيه في الفرن أو التوستر.
- خبز الباجيت أو أي خبز بيتميز بطبقة خارجية مقرمشة، هيفقد قرمشته مع الحفظ أو التفريز، عند إعادة تسخينه في الفرن سيبيه مده أطول عشان ترجع الطبقة الخارجية تقرمش تاني.
- تقدري تعيدي تسخين الخبز في الميكرويف، لكن يفضل إنك تستخدمي كوباية فيها شوية مياه مع الخبز أثناء إعادة تسخينه، عشان الرطوبه الناتجة عنها هتساعد إن الخبز يحتفظ بطراوته أثناء التسخين وما ينشفش.
- يجب استهلاك الخبز كله بعد فك تجميده، وتسخينه، ولا يجوز إعادة تجميده أو تسخينه مرتين لإنه هيفقد خواصه، وقوامه، وطزاجته.
في النهاية، أحب أقول لك إن أفضل طريقة عشان نحافظ بيها على طزاجة العيش، هي إننا ناكله كله وهو لسه طازة، ونشتريه طازة بطازة، آه والله يا جماعة مفيش أحسن من العيش الطازة!
التعليق باستخدام حساب فيس بوك