زينة رمضان هي أكتر حاجة بتدي روح وبهجة للبيت قبل شهر رمضان الكريم، طبعًا كنتي واحدة من الناس اللي عملت بحث على جوجل عن زينة رمضان 2021 وعن أشكال وصور زينة رمضان وفانوس رمضان، وديكور رمضان اللي كله ألوان وتفاصيل بتبسط القلب قبل العين، لكن بعد ما تبذلي جهد كبير في ترتيب الزينة وتعليقها، أحيانًا كتير بتنسيها وفجأة مع استعجال تنضيف العيد بتشيليها بدون تركيز. والنتيجة إننا ممكن نحتاج نشتري زينة رمضان من أول وجديد في السنة الجديدة واللي طبعًا هتكون مكلفة جدًا، لذلك قررت أقول لك في المقال ده عن أنسب الطرق للحفاظ على زينة رمضان للسنة اللي بعدها.
اقرأي أيضا: زينة رمضان.. اعملي بنفسك فانوس رمضان مع الأولاد
اختاري الوقت المناسب
مش لازم تستني لحد ليلة العيد، أو وقت التنضيف عشان تشيلي زينة رمضان. ممكن قبل العيد بأسبوع على الأقل تبدأي تشيلي الزينة والأقمشة بترتيب وهدوء عشان تتعاملي معاهم بطريقة ذكية تحافظ عليهم.
اقرأي أيضا: أجمد 10 أماكن تشتري منهم زينة رمضان
التنظيف أولًا
هتحتاجي تنضفي كل الحاجات اللي استخدمتيها طول الشهر، حتى لو ما فيهاش بقع، فهي مليانة تراب وغبار. والخطوة الأولى بالنسبة لأقمشة الخيامية، اللي في الصالة والمطبخ وكل مكان، فكّيها بالراحة، وانقعيها شوية صغيرين في مياه باردة، وعليها نوع سائل من أنواع غسيل الملابس لكن مش كمية كبيرة، عشان تقدري تشطفيه بسهولة. وفي عملية الشطف، احرصي إنك تضيفي نوع من أنواع المعطرات عشان يكون محفوظ بريحة جميلة، وفي نفس الوقت محمي من العتة والحشرات، مع ملمس ناعم وطري طول 11 شهر للسنة اللي بعدها.
قماش الخيامية
أهم نقطة إنك تاخدي بالك من الحاجات اللي بتبهت، خصوصًا قماش الخيامية الأحمر، احرصي إنك تغسليها لوحدها، وكمان الغسيل على الإيد هيحافظ عليهم. تجنبي الغسالة لأنها هتبهدل الأقمشة وخصوصًا الزركشة والتطريز اللي بيكون على الأطراف، وبالنسبة للنشر، سيبيهم يتصفوا لوقت كفاية وانشريهم، هيتفردوا بشكل جميل.
الفوانيس
النسبة للفوانيس هتمسحيها بفوطة مع مياه وخل من التراب وأي حاجة جات عليها، ولو خشب هنلمعها بملمع الخشب.
الديكورات
عربية الفول والفوانيس القماش، وغيرها هنريّشها بريشة، ولو عندك فرشة قماش، هننزّل من عليها التراب وممكن بفوطة مبلولة بمياه وخل خفيف.
خيوط النور
خيوط النور ضروري تتحفظ بطريقة صح، الخطوة الأهم بالنسبة للأسلاك هتحتاج تتلف بطريقة واضحة مش معقدة عشان يتفكوا بسهولة. ولو في أي لمبات محروقة أو سلك اتقطع، احرصي على صيانته قبل الحفظ عشان تقدري تستخدميه بسهولة في السنة اللي بعدها.
الحفظ الصح
بالنسبة للأقمشة، بعد الغسيل والنشر، احرصي إنك تطبقيهم بطريقة مفرودة عشان لما القماش يطلع يفضل شكله جميل، واحفظيهم جوه كيس مخدة أو شنطة قماش. وممكن تشيلي معاهم صابونة بريحة جميلة.
بالنسبة للفوانيس، وعربيات الفول، واللمبات، والإضاءات، أفضل طريقة ممكنة إنك تختاري لهم صندوق أو ضلفة مستغنية عنها في البيت، واحرصي إنك تغلفيهم بكيس بلاستيك قبل الحفظ عشان ما يلموش تراب لحد رمضان اللي بعد كده.
كل سنة وانتي طيبة وبيتك مبهج وجميل.
اقرأي أيضا: اعملي بنفسك زينة الكريسماس في البيت
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك