محتويات المقال
رمضان السنة دي تقريباٌ في الصيف، وأكتر حاجة بنفكر فيها في الأيام اللي قبل رمضان – هي إزاي نتجنب العطش في رمضان. في المقال ده، هاقول لك شوية نصايح وطرق لمقاومة و تجنب العطش في رمضان، سواءً حاجات تتجنبيها أو تكتري منها.
أولًا: تجنبي الملح والشطة
بلاش تزودي من الملح والشطة في أكل الفطار والسحور. ده لأن جزء المخ المسؤول عن العطش والتحكم فيه لما بيلاقي مستوى صوديوم عالي في الدم (بينتج من الملح والبهارات الكتير والشطة) بيخليك تحس بالعطش حتى لو لسه شاربة مياه، فتخيلي لما تبقي صايمة. الحل إنك ما تمليش جسمك بالصوديوم عشان تسيبي لمخك ولكليتك فرصة عشان ما يحسسوكيش بالعطش.
ثانيًا: كلي خضار وفاكهة
ألطف حاجة لتجنب الملح والسكر الكتير هو تناول خضار وفاكهة لأن فيهم النكهات المختلفة من غير إضافة ملح أو سكر. مش بس كده، الخضار والفاكهة مليانين مياه، وخضار زي الخيار والخس وفاكهة زي البطيخ مثلًا يعتبروا كلهم مياه. فعشان كده، بدل ما تفضلي تشربي مياه كتير عالسحور (ودي طريقة مش مضمونة لتجنب العطش في الصيام)، تقدري تاكلي الخضار والفاكهة اللي مليانين بالمياه علشان هما من الأكلات اللي بتمنع وتقلل العطش في الصيام.
ثالثًا: راجعي الأدوية اللي بتاخديها
لو بتاخدي أدوية بشكل منتظم، راجعي الآثار الجانبية ليها لأن بعض الأدوية (وخصوصًا أدوية الاكتئاب والاضطرابات النفسية والمسكنات) دايمًا بتزود العطش وبتسبب جفاف الحلق. في الحالة دي، ممكن تراجعي مع دكتورك المختص لو فيه بديل للدوا ما بيسببش الأثر ده.
رابعًا: راجعي جسمك نفسه
لو دايمًا بتحسي بعطش، حتى مع تجنب الحاجات اللي فاتت دي، اعملي فحوصات زي مستوى السكر في الدم، تحليل الغدة الدرقية، لإن مرض السكر وأمراض/اضطرابات الغدة الدرقية بتسبب الإحساس بالعطش. وكمان تابعي عملية الإخراج لإن ممكن يكون فيه إسهال متكرر ويكون ده سبب في جفاف الجسم وبالتالي العطش.
خامسًا: اشربي مياه!
– بالبساطة دي؟ – أمال انت فاكر إيه؟
مش معنى كل النصايح اللي فاتت إننا ننسى أهم حاجة وهي شرب كمية كافية من المياه. المفروض تشربي ما بين 6 – 8 كوبايات مياه يوميًا وبما إننا بنفطر من المغرب للفجر ودي تقريبًا 8 ساعات، فما لكيش حجة، اشربي كوباية ميا كل ساعة. كمان بلاش تشربي كميات مياه كبيرة جدًا مرة واحدة. يعني بلاش أول ما تفطري تشربي كوبايتين أول تلاتة مهما كان إحساسك بالعطش وبلاش كمان آخر حاجة في السحور قبل الفجر تفضلي تشربي كميات كبيرة من المياه لإنها هتخليكي تحسي بالتخمة وفي نفس الوقت الجسم هيخرجها بسرعة شديدة وهتفقدي قيمتها.
نتمنى لك صوم مقبول وإحساس بالامتلاء والشبع والارتواء
التعليق باستخدام حساب فيس بوك