محتويات المقال
من أكتر الحاجات اللي بتضايق أي أم وست بيت هي إنها تشتري منتجات وتلاقيها فقدت جودتها وطزاجتها وحالتها الجميلة اللي كانت شارياها عليها. وبالتالي، بتضطري تاكليها وهي مش طازة أو تتخلصي منها لو كانت فاسدة. وده طبعًا نوع من أنواع الهدر اللي أكيد كلنا ما بنحبوش في مطابخنا. ولإن كتير مننا بيحتار في طرق تخزين المأكولات والمنتجات الغذائية المختلفة من فواكه وخضار ومواد جافة وغيرها، فالنهارده جيبنا لك مجموعة نصايح لحفظ وتخزين أغلب المنتجات اللي بتستخدميها بشكل يومي في مطبخك، وبكده تقدري تضمني إنها تفضل طازة وسليمة أكتر فترة ممكنة.
طريقة حفظ وتخزين البيض
المصدر aliexpress
- البيض من الأطعم الحساسة جدًا في طريقة التعامل معاها.
- قشرة البيض المسامية بتخلي البيض من أكتر الأطعمة اللي بتتأثر طزاجتها بالعوامل المحيطة بيها. لكن سبحان الله، ربنا خلق للبيضة طبقة حماية خارجية فوق قشرة البيض اسمها “cuticle” عشان تحميها من العوامل الخارجية دي. عشان كده، لا يفضّل إنك تغسلي البيض قبل ما ترصيه في التلاجة عشان ما تقضيش على الطبقة دي وبالتالي تتأثر بالرطوبة والروائح الخارجية.
- أفضل طريقة لحفظ البيض النيء هي حفظه في التلاجة إما في علبته الأصلية أو في علبة مقفولة مخصصة لحفظ البيض فقط زي في الصورة.
- يفضل عدم حفظ البيض النيء في باب التلاجة والأفضل حفظة في واحد من رفوف التلاجة عشان يوصله التبريد بكفاءة
- لو حبيتي تغسلي البيض النيء من الخارج عشان تضمني عدم وجود أي بقايا عالقة على القشرة الخارجية، إغسليه ونشفيه كويس جدًا قبل الاستخدام (الطهي) مباشرة. عشان ما تتسببيش في دخول أي رطوبه للبيض، ودي ممكن تؤدي لفساد البيض وعدم صلاحيته خلال مدة قصيرة.
طريقة حفظ وتخزين البقوليات
المصدر thespruceeats
- البقوليات زي العدس والفول والفاصوليا بأنواعها المختلفة وغيرها من أصناف البقوليات الجافة أفضل طريقة لتخزينها هي إنك تحفظيها في علب أو برطمانات محكمة الغلق في مكان جاف ومظلم.
- لو كانت درجة الحرارة عالية في مطبخك خصوصًا في فصل الصيف، يفضل إنك تحفظي البقوليات في التلاجة أو حتى الفريزر في علب أو أكياس محكمة الغلق عشان تتجنبي إنها تسوس.
- البقوليات المعلبة إذا استخدمتي جزء من العلبة. وتبقى جزء يفضل حفظه في علبة أو برطمان محكم الغلق في التلاجة، مع السائل الموجود معاها لمدة لا تزيد عن 5 أيام.
طريقة حفظ وتخزين الخضروات الورقية
onieproject
sixcleversisters
valentinascorner
- زي البقدونس والكسبرة والجرجير والسبانخ وأنواع الأعشاب المختلفة، يفضل حفظها بدون غسيل في أكياس محكمة الغلق وحاولي تسحبي الهواء من الأكياس بقدر الإمكان هتفضل معاكي طازة لمدة 10 أيام لإسبوعين ووقت الحاجة إغسلي فقط الكمية إلي هتستخدميها.
- الطريقة التانية لحفظ الورقيات وهي إنك تحفظيها في برطمان زجاجي وتملي البرطمان بالأعشاب بحيث تقللي الفراغ الداخلي وتحكمي غلقة.
- أوراق الخس تقدري تغسليها وتنشفيها كويس قوي من أي رطوبة وتحفظيها في أكياس محكمة الغلق، وحاولي تفرغي منها الهواء بقدر الإمكان ويفضل تحطي جوه الكيس قطعة من مناديل المطبخ المنداه بالميه عشان تحافظي علي وجود نسبة من الرطوبة.
- أما إذا حبيتي تحفظي الورقيات وهي مغسولة يفضل تنشيفها جيدا بعد الغسيل ووضعها في علبة محكمة الغلق بين قطعتين من مناديل المطبخ المنداه قليلا بالماء، هتفضل طازة لمدة إسبوع.
طريقة حفظ وتخزيين الأجبان
food52
dailymail
- تحفظ الجبن في علبة محكمة الغلق في التلاجة ويفضل وضع قطع من ورق الزبدة بين شرايح الجبن عشان تمتص أي رطوبة.
- إستخدمي ورق الخبز أو ورق الزبدة للف الأجبان وحفظها أفضل من إستخدام الأكياس البلاستيك أو البلاستيك راب.
- بعض الخبراء بينصحوا بوضع مكعب سكر في علبة حفظ الأجبان للحفاظ عليها مدة أطول في أفضل حالاتها.
- تخزيين الأجبان في الفريزر أحيانا بيكون ضروري وبينقذ الموقف، لكن للأسف أغلب الأجبان خاصة الأجبان الطرية زي القريش مثلا بيتغير قوامها مع التفريز. خلي الحل ده للضرورة فقط وإشتري جبنتك طازة بطازة.
طريقة حفظ وتخزيين المخبوزات
betterhomesandgarden
- طبعا المخبوزات والعيوش بأنواعها بتكون في أفضل حالاتها وهي طازة، لكن كلنا كأمهات بنضطر للتخزين، تخزيين المخبوزات له قاعدة بسيطة: فرزني المخبوزات وهي طازة عشان تفضل طازة بعد التخزيين، بمعنى إنك لو عايزة تفرزي العيش أفضل حل هو إنك تفرزيه وهو طازة مش تسيبيه يتخزن بصورة خاطئة ليلة كاملة مثلا وبعدها تفرزيه أكيد النتيجة مش هتكون مرضية.
- تقدري تخزني الكوكيز والبراونيز وأغلب أنواع الكيك بدون أي فروستينج طبعا، في علب محكمة الغلق على رخامة المطبخ لمدة من 3-5 أيام، ولو مش هتستهلكيهم خلال المدة دي من الوقت خصوصا الكيك يفضل إنك تلفيها كويس بالبلاستيك راب وتحفظيها في الفريزر.
طريقة حفظ وتخزيين الخضار والفواكه
homechef
- بالنسبة للخضراوات والفواكة بتختلف طريقة التخزين من نوع للتاني، لكن أغلبها يمكن تخزيينها في التلاجة.
- دلوقتي بقى في إختيارات كتير في الأسواق من العلب المخصصة لحفظ الخضراوات والفواكة، أو ممكن ببساطة تستخدمي فوط المطبخ النضيفة لفي بيها الخضراوات والفواكة.
- البصل والبطاطس يفضل تخزينهم خارج التلاجة في مكان يكون جيد التهوية وبعيد عن الرطوبة، ولا يفضل تخزينهم مع بعض في مكان واحد.
- خزني التفاح في التلاجة، قرمشته بتقل 10 مرات أكتر لو خزنتيه على رخامة المطبخ.
- خزني المشروم الطازة في التلاجة في أكياس محكمة الغلق ولو حبيتي تغسليه فقط يكون قبل الإستخدام مباشرة.
- إستخدمي أكياس بها ثقوب لتخزيين بعض الفواكة زي العنب والكريز والتوت والفراولة.
- الباذنجان بأنواعة يفضل تخزيينة في مكان بارد وجاف برة التلاجة ويستخدم خلال يومين ل3 أيام.
- الخيار: لفي كل خيارة في ورقة مطبخ نظيفة واحفظي كل كمية الخيار في أكياس محكمة الغلق، هيفضل طازة لمدة إسبوع، البعض بينصح بوضع معلقة معدنية داخل كيس حفظ الخيار.
- خلي بالك جدا من عدم تخزيين التفاح بجانب أي نوع تاني من الفواكة أو الخضراوات لإن التفاح بيفرز غاز الإيثيلين إلي بيسرع عملية إفساد الفواكة والخضراوات التانية المحيطة بالتفاح نفسه.
نتمنى النصايح دي تساعدك وتفيدك في مطبخك ولو عندك أي فكرة أو نصيحة لحفظ أي واحدة من المنتجات السابقة، يا ريت تشاركينا أفكارك عشان تعم الفايدة.
What’s your Reaction?
التعليق باستخدام حساب فيس بوك