فيه إحصائية بتقول إن حوالي 84 % من السيدات بيعانوا من آلام الدورة الشهرية الحادة وممكن تستمر الأعراض لحد أول يومين أو أكتر من بدايتها وأحيانًا بتظهر الأعراض قبل بداية الدورة الشهرية بكذا يوم. وعشان كده دايما بنسأل نفسنا هل في طرق لتخفيف وعلاج آلام الدورة الشهرية ؟
ومن أعراضها: الانتفاخ، آلام أسفل البطن وأسفل الظهر، تقلب المزاج، إنتفاخ الثدي وفي بعض الأحيان ممكن تسبب غثيان شديد وأحيانًا بتبقى تجربة مؤلمة جدًا بالنسبة لبعض السيدات لدرجة إنهم مش بيقدروا يمارسوا حياتهم الطبيعية من شدة الألم.
في الموضوع ده هنتكلم عن شوية خطوات تقدري تعمليها عشان تخفف آلام الدورة الشهرية.
- ممارسة الرياضة:
على عكس ما هو متوقع إننا لازم نستريح أول أيام الدورة الشهرية، إلا إن الدكاترة بتنصح بممارسة الرياضة الخفيفة زي المشي والـPilates لإن الرياضة بتحفز إفراز الإندورفين إللي بيعتبر مسكن طبيعي للآلام فبالتالي هيهدي من انقباضات الرحم ويحسن المزاج والاستمرار على ممارسة الرياضة بشكل منتظم بيساعد على الوقاية من آلامها. - تدفئة الجسم:
ممكن تستخدمي قربة ميه دافية على البطن أو أسفل الظهر لتخفيف وجع التقلصات ووجع العضلات بس تخلي بالك إن المية متكونش سخنة أوي لتجنب الحروق، وكمان الدش الساخن ممكن يساعد على إرخاء العضلات وتهدئة التقلصات.
شوفي هنا إزالة الشعر بالليزر .. دليلك قبل هذه الخطوة
- النظام الغذائي:
يفضل وقت الدورة الشهرية الابتعاد عن الأطعمة اللي بتسبب إنتفاخ البطن واحتباس المية زي:
الموالح
الأكلات الدسمة
الكافيين
ويفضل التركيز على الأطعمة اللي بتحتوي على الماغنسيوم لأن ليه فعالية كبيرة في تخفيف إنقباضات العضلات ومن أشهر الأطعمة اللي بتحتوي على الماغنسيوم:
الموز
التمر
الأفوكادو
بعض المكسرات زي اللوز والكاجو
وممكن تلجأي لعلاج ألم الدورة الشهرية بالأعشاب بإنك تشربي مشروبات عشبية سخنة تهدي التقلصات.
- التدليك:
تدليك البطن أو أسفل الظهر لمدة خمس دقايق بينشط الدورة الدموية وبيساعد على تقليل الوجع. - المسكنات
إذا كان الألم شديد والعلاج المنزلي مش بيخفف من حدة الوجع، ممكن تلجأي للأدوية اللي بتساعد على علاج وتقليل آلام التقلصات ومش بتحتاج وصفة طبية زي المسكنات الآمنة.
وفي النهاية بنحب نوضحلك إن دي اجتهادات لتخفيف وجع الدورة الشهرية مش علاج ولو استمرت الأعراض من غير تحسن أو الألم بيمنعك من ممارسة حياتك الطبيعية، يفضل تستشيري الطبيب الخاص بيكي للاطمئنان.
المصادر
https://www.onhealth.com/content/1/menstrual_period_cramps
https://www.healthline.com/health/facts-statistics-menstruation#4
https://www.healthline.com/health/exercise-during-period#best-exercises
التعليق باستخدام حساب فيس بوك