محتويات المقال
لو مفيش في البيت دفاية سواءً للحماية من مخاطرها أو لترشيد استهلاك الكهربا، بيبقى البيت ساقع جدًا وبنضطر نلبس هدوم كتير جدًا عشان نتدفى، خصوصًا مع دخول فصل الشتاء بشكل مفاجيء. في المقال ده، هنقول لك طرق تدفئة المنزل في الشتاء تقدري تستفيدي منها الشتا ده عشان تخلقي جو دافي في البيت من غير دفاية.
طرق تدفئة المنزل في الشتاء
- استغلي الستاير
- اتأكدي من أماكن تسرب الهوا
- حركي الكنبة
- بصي على الحيطان
- استخدمي بطانات
- استخدمي قرب المياه
1. استغلي الستاير
حتى في الشتا الجامد، مصر شمسها قوية وجميلة. افتحي الستاير بالنهار عشان الشمس تدخل البيت وتدفي لك الأوض بكل العفش اللي فيه. أول ما الشمس تغيب، اقفلي الستاير. ده هيخلي البيت يحتفظ بالحرارة اللي أخدها من الشمس وكمان الستاير هتوفر لك طبقة حماية من الهوا الساقع.
بالصور: أحدث أنواع الستائر المودرن للسنة دي
2. اتأكدي من أماكن تسرب الهوا
يا ترى “دخلك منين سرسوب الهوا” يا بيتي؟ اتأكدي إن الأبواب والشبابيك كلها ما بتسربش هوا من الجوانب أو من تحتها أو من فوقها. لو فيه فتحات زي دي، ممكن تطلبي من النجار إنه يقفلها لك عشان تحافظ على دفا بيتك.
3. حركي الكنبة
لو الكنبة اللي بتقعدي عليها معظم الوقت قدام الشباك أو البلكونة، حركيها من مكانها بحيث ما تبقاش مقابلة لتيار الهوا من البلكونة أو من الشباك. وحاولي لو فيه حيطة من الحيطان بتتعرض للشمس من برا طول اليوم، تحطي ظهر الكنبة عليها بحيث تفضل دافية.
4. بصي على الحيطان
ساعات بتكون الحيطان فيها رطوبة وده بيخلي الحيطان أسقع. كمان لو الحيطان بتبقى دايمًا ساقعة ممكن تبطنيها بطبقة اسفنج وده هيكوّن طبقة عازلة للحيطة وهيساعد إنه يدفي الأوضة.
5. استخدمي بطانات
بطانات الستاير والكنب أو اللي بيتسمى ساعات “دفاية السرير” بيكون شبه البطانية وناعم جدًا وبيتفرش على السرير لطبقة دفا. لو فرشتي الدفايات دي في كل الاماكن (كراسي الولاد، الكنبة، كراسي السفرة، السراير) هتلاقي البيت أدفى.
6. استخدمي قرب الميا
قربة المياه اللي ممكن تجيبيها من الصيدلية بسعر بسيط ممكن تكون حل لمشكلة الجو كمان. امليها بمياه سخنة أو دافية وحطي منها على السراير والكنب عشان تضمني الدفا.
اعملي بنفسك: زينة الكريسماس في البيت
كمان لو شغلتي الفرن في المطبخ على درجة بسيطة (180 مثلًا) ولمدة بسيطة هيفضل مخلّي المطبخ دافي لمدة وبكده هتفضلي دفيانة طول ما انتِ في المطبخ. وانتِ قولي لنا في التعليقات بتعملي إيه عشان تدفي البيت؟
التعليق باستخدام حساب فيس بوك