صحيح رحلة الحمل مفرحة وممتعة، لكن ده ما يمنعش إن الحامل بتمر عليها حالات ملل وزهق، وخصوصًا إن ممكن صحتها ما تكونش مساعدها تعمل الحاجات اللي كانت بتسليها قبل الحمل، ولو انتي حامل، هنقولك في المقال ده على 10 طرق تسلية أثناء الحمل تسلي بيهم نفسك.
-
مارسي رياضة خاصة بالحوامل
معروف إن الرياضة بتحسن الحالة الجسدية والنفسية جدًا، ده بالإضافة إنها هتشغل وقت طويل من يومك، وتقدري بعدها تاخدي شاور رايق ودافي وتستخدمي كل منتجات العناية بالبشرة اللي بتحبيها وبتحسن مزاجك، بس أهم حاجة تكون الرياضة دي مش مؤذية لحملك وتكون مع متخصيين، وتقدري تشتركي في البرنامج الرياضي للحوامل مع راحة بالي من هنا
-
اتفرجي على حاجات بتحبيها
سواء كانت أفلام أو وثائقيات أو برامج، أو كتب مسموعة، أو أي ميديا مفيدة ومسلية وبتحبيها، وحاولي ماتكونش كئيبة أو محزنة قوي، علشان ما تبوظش مودك.
-
اشتغلي أشغال يدوية
في طرق تسلية أثناء الحمل مشهورة بين كل الحوامل زي الأشغال اليدوية بتكون مسلية جدًا وبتاخد وقت طويل، وهتتبسطي جدًا بالناتج الأخير ليها، ويا سلام بقى لو كانت الأشغال اليدوية دي لحاجات للبيبي، ولو انتي مش بتعرفي تشتغلي فن معين، تقدري تعلمي نفسك ببساطة من اليوتيوب.
-
اقرأي في كتب تربية الطفل
فترة الحمل لا تعوض في استغلال الوقت، وخصوصًا لو ده الحمل الأول ليكي، فعندك فراغ مش هيتكرر، وكمان محتاجه أشياء مسلية وتكون مفيدة ليكي، فتقدري تستفيدي بيه في قراءة كتب تربوية تفيدك في رحلتك مع تربية طفلك.
-
انضمي لمجموعات الحوامل
ودي مش شرط تكون مجموعات سلبية على السوشال ميديا، بس تقدري تتجمعي مع معارف حوامل في النادي أو جيران أو من العائلة، تسلوا بعض وتشاركوا تجاربكم.
-
جهزي غرفة طفلك بنفسك
ما تستعجليش في تجهير غرفة طفلك مرة واحدة، لو صحتك تسمح اعمليها بنفسك خطوة بخطوة، من أول دهان الحوائط، لحد اختيار الديكورات والستاير والمفروشات، وده أكيد هياخد منك شهور.
-
اكتبي رسايل لطفلك
دوّني كل حاجة عاوزة تقوليها لطفلك، أحلامك، مشاعرك، رسايل، مخاوفك، تجربة حملك، زيارات الدكتور، تقدري تدونيها في دفتر خاص، أو في مدونات، أو على صفحتك الشخصية على الفسيبوك والانستجرام.
-
اختاري اسم طفلك من بدري
اختيار اسم الطفل مش بييجي في لحظة، فخدي وقت في قراءة أسماء الأطفال ومعانيها، واتكلمي مع جوزك في الأسامي اللي هو بيحبها والأسامي اللي هو مش قابلها، لحد ما توصلوا مع بعض لاسم عاجبكم انتو الاتنين، واستخدمي آداة أسماء الأطفال هتساعدك جدًا.
-
سهرة مع الصديقات
ممكن مع انشغال كل واحد في حياته، ماتكونيش عارفة تتواصلي مع صاحباتك بكثافة، وهما كمان نفس الحال، فتقدري تجمعيهم في شهرة حلوة مع بعض في بيتك أو في مكان موجود في ذكرياتكم مع بعض، بالتأكيد هترجعي مبسوطة ومغيرة جو ونشيطة.
-
اعملي نشاط مشترك مع جوزك
في فترة الحمل والولادة، بعض الأزواج بيحسوا إنهم منسحبين من اهتمام الزوجة، وكل تركيزها على البيبي، فدي فرصة كويسة إنك تثبتي لجوزك العكس، وإن مفيش حاجة اتغيرت حتى مع الحمل، فشاركيه هواية له، أو اطلبي منه يشاركك حاجة انتي بتحبيها، وقضوا وقت حلو مع بعض، هيفرق في نفسيتكم انتو الاتنين.
مع تمنياتنا ليكي برحلة حمل سعيدة وممتعة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك