محتويات المقال
في موسم تقديم المدارس، أكتر سؤال بتكوني محتاجة فعلًا تعرفي إجابته، هل المدارس اللي على قايمتك في موسم التقديم فعلًا كويسة ولا في حد عنده رأي وحش عنها، هل المدارس دي فعلًا كويسة وطفلك هيرتاح فيها ولا دي بداية لرحلة معاناة طويلة هتنتهي بالتحويل من مدرسة لمدرسة ويمكن من إدارة لإدارة وما أدراكي ما هو التحويل.
أول خطوة أي أم بتعملها عشان تعرف معلومات أكتر عن مدرسة المستقبل، هو إنها تدخل على جروبات حد يعرف المتخصصة في المدارس، وللأسف دي أكتر حاجة غلط ممكن تديكي معلومات مضللة وتخليكي تختاري بطريقة غلط جدًا. عشان كده، قررت أكتب المقال ده بناء على تجربتي الصعبة واللي غلطت فيها غلطات كتير ما أحبش إن حد يكررها من بعدي، لو حضرتي قايمة المدارس المفضلة بالنسبة لك واستقريتي عليها فعلًا، تعالي معايا اعرفي ازاي تختاري الأفضل منهم خاصة في عالم ما بعد الكورونا.
اقرأي أيضا: إيه السن المناسب لدخول المدرسة؟
جروبات أولياء أمور المدرسة
أولياء الأمور هم أكتر ناس متورطين في المدرسة وعارفين خباياها واحنا كشعب طيب بنكون ممتنين جدًا لو حد عمل معانا معروف، فلو فعلًا المدرسة كويسة هتلاقي أولياء الأمور نفسهم بيشكروا فيها جدًا، ولو خايفة تكون الإجابات مضللة أو دخلتي جروب أولياء الأمور ومحدش رد على سؤالك عن المدرسة ومدى رضاهم عنها، ممكن ببساطة تعملي سكرول داون وتنزلي تتفرجي على أسئلتهم ومشاكلهم واستفساراتهم، غالبًا المدارس المحترمة جروب أولياء الأمور بيكون هادي، والمدارس السيئة هتلاقي جواها ما قاله مالك في الخمر.
ولو كل ده ما كانش كافي أو مقنع ليكي ممكن تختاري ولي أمر أو اتنين أو حتى تلاتة، وتبدأي تاخدي رأيهم في المدرسة ومستواها وكل التفاصيل اللي حابة تعرفيها، لأن المثل بيقول اسأل مجرب ولا تسأل طبيب.
ميعاد نهاية الدراسة إيه؟
كل مرحلة وليها نهاية رسمية للدراسة، لكن للأسف مش كل المدارس بتلتزم بالمعاد ده وبيكروتوا الولاد، وبشوية أعذار تلاقي فجأة الدراسة انتهت. لذلك أهم سؤال المدرسة بتكمل المنهج فعلا لآخر وقت ولا لأ، بيقعدوا الأولاد بدري ولا لأ.
الأونلاين أخباره إيه؟
صحيح أزمة كورونا كانت تجربة صعبة جدًا، لكنها كانت كاشفة جدًا للمدارس ومستواها، من أهم علامات المدارس المحترمة هو طريقة تعاملهم مع أزمة كورونا، هل كملوا أونلاين والتزموا فعلًا مع الأولاد سواء من خلال غرف جوجل، أو زووم أو أي برنامج محترم ولا اكتشفوا بفيديوهات للولاد وخلاص، واللي فهم أو ما فهمش مش مشكلتهم ولا ما عملوش حاجة خالص!
المقابلة عاملة ازاي؟
للأسف إدارات المدارس بتبان من أول لحظة، هل قابلوكم كويس، مديرة المدرسة سهل توصلي لها ولا اتعامل أو اتعاملت بقلة ذوق، مدى احترام الإدارة لأولياء الأمور بيحدد حاجات كتير جدًا. بعد كده، لأن الإدارة مهمة جدًا بعد كده لو الطفل قابل مشكلة أو عنده أي أزمة.
اقرأي أيضا: رفض الأطفال: ابني بيقول لأ باستمرار
محترمين ماديًا ولا لأ
فيه مدارس محترمة ردت جزء من المصروفات، وفي مدارس ردت باقي فلوس الباص من نفسهم، تقدروا تعرفوا احترام المدرسة في الجانب المادي وهل فعلًا ماديين ولا بيحترموا أولياء الأمور والطلبة.
قرب المدرسة من البيت
لو المدرسة مش قريبة من البيت، اصرفي نظر عنها فورًا، متخيلة كمية العوادم والوقت اللي بيروح من الطفل رايح جاي من المدرسة. في الصيف، النار والحر في الباص، وفي الشتا، تلج يفضل فيه رايح جاي.
بصي على المدرسة كويس
السمعة حلوة لكن التفاصيل الصغيرة كمان كويسة، خشي الفصول، وخشي دورات المية، وشوفي شكل الحوش، مش شرط تكون أعظم حاجة لكن المهم تكون مقبولة بالنسبة ليكي فعلًا وتقدري تأتمنيهم على ابنك فعلًا.
اقرأي أيضا: كيفية الاستعداد النفسي للطفل قبل المدرسة في موسم الكورونا
التعليق باستخدام حساب فيس بوك