محتويات المقال
عيد الفطر خلاص كمان كام يوم، ودايمًا كده العيد الصغير بيكون له طعم مختلفة وبهجة غريبة، بالذات بقى لو ولادنا في سن الصيام أو التدريب على الصيام. فبيكونوا تعبوا واحنا محتاجين نكافئهم ونفاجئهم ونفرّحهم. في المقال ده، هاقول لك على طرق تقديم العيدية للأطفال بدل ما ندي لهم الفلوس في إيديهم لوحدها، ممكن نزينها بشكل لطيف أو نقدمها بطريقة مختلفة تفرحهم أكتر.
طرق تقديم العيدية للأطفال
-
البالونة:
بما إن كدا كدا البلالين من أساسيات العيد عند الأطفال، فاحنا ممكن نستغل ده ونحط لكل واحد جوا بلونة فلوس العيدية وورقة فيها اسمه وندي البلالين للولاد يفرقعوها ويدوّروا على عيديتهم.
-
كروت العيدية:
من الأفكار اللذيذة اللي كنت باعملها أنا وابني من سنين وهي إننا كنا بنقعد نعمل كروت لأطفال العيلة ونكتب لكل واحد كلمة لطيفة عليها ونلزق فيها فلوس العيدية مع candy صغيرة في الكارت. ودلوقتي كمان في أماكن كتير بتبيع كروت العيد أونلاين جاهزة لو ما عندكيش وقت كفاية تعلموا الكروت ده بإيديكم في البيت.
-
العيدية مع شوكولاتة:
وده بقي الفقرة المحببة للأطفال لأن في الغالب في العيد إحنا بنكسر القواعد وبنعمل إستثناءات كتير منها اكل الحلويات والشوكولاته، فممكن نلف العيدية للأطفال حوالينا الشوكولاته المفضلة عنده أو نجهز كيس صغير ونزينه ونحط فيه كذا نوع من الحلوي اللي بيحبوها وشوكولاته وفي وسط الكيس نحط لهم فلوس العيدية.
-
الهدايا بدل العيدية:
وده من الأفكار المناسبة اكتر للسن الصغير اللي بيفرح باللعب أكتر من فرحته بالفلوس، وهي إننا نشتري لولادنا لعبة كان نفسهم فيها او عارفين إنهم بيحبوها ونقدمهالهم يوم العيد الصبح ونخلق تقليد بتاعنا في البيت وهو “هدية العيد”، وممكن كمان نطبقه مع اطفال العيلة ويكون بديل لطيف ومختلف عن الفلوس.
-
البحث عن الكنز:
اللعبة ده بقي ممكن نستخدمها في تقديم العيدية وكمان تبقى أداة مفيدة لتسلية الأطفال في العيد وتقضية كواليتي تايم لذيذ معاهم، وهي إننا نخبي العيدية في أماكن مختلفة في البيت ونكتب برده اسامي ولادنا عليها ونبدأ نديلهم في تلميحات عن اماكن العيدية ونشجعهم يدوروا عليها ونشوف مين هيوصل لعيديته أسرع.
التعليق باستخدام حساب فيس بوك