دخل فصل الربيع والجو مش بديع قوي، والتراب في الأجواء وأصحاب الجيوب الأنفية بيعانوا أكتر من أي حد تاني، وأغلب اللي بيعانوا من حساسية الجيوب الأنفية بيكونوا مصابين بيها بشكل مزمن أو متكرر على الأقل، وبتزيد الحساسية دي في فصل الربيه بسبب حبوب اللقاح اللي بتطير في الهواء، ومش دايمًا الأدوية والعلاجات والحلول الطبية بتجيب نتيجة فعّالة، علشان كده النهارده هنقولك على طرق طبيعية لعلاج حساسية الجيوب الأنفية.
إيه هو التهاب الجيوب الأنفية؟
بتحصل مشاكل الجيوب الأنفية لما بتتراكم كمية مخاط في تجاويف خلف الوجه، وده بيؤدي لتورم والتهاب في التجاويف دي، والناس اللي بتعاني من الحساسية أو التهاب الجيوب الأنفية، بيحسوا بضغط مستمر حوالين الأنف، وصداع شديد، وإرهاق.
علاجات طبيعية لعلاج حساسية الجيوب الأنفية
الآلية الأساسية اللي بتشتغل بيها الوصفات الطبيعية، إنها بتساعد على تدفع المخاط من التجاويف دي، وتهدئ الممرات الملتهبة:
البخار لعلاج حساسية الأنف
بيساعد البخار على تدفئة ممرات الجيوب الأنفية وترطيبها، وبيهدئ أنسجة الجيوب الأنفية وبيدي شعور بالراحة.
وفي كذا طريقة لاستخدام البخار لعلاج الجيوب الأنفية: منها إنك تملي إناء فيه مياه مغلية وتحطي منشفة حوالين راسك علشان البخار يدخل ممرات أنفك، حاولي متقربيش قوي من المياه علشان متتلسعيش، وغمضي عينك علشان متلتهبش من الحرارة.
ممكن إضافة قطرة زيت عطري زي زيت اللافندر أو البابونج لإن ده بيساعد في تهدئة الحساسية أكتر.
المحلول الملحي لحساسية الأنف
محلول الماء المالح مهم لإنه بيساعد على إخراج الجراثيم والمخاط المسدود في الممرات الجيوب الأنفية، وتقدري تستعمليه بحقنة مخصصة للعملية دي متوفرة في كل الصيدليات، وبتدخليها في فتحة أنفك وبيخرج المحلول الملحي من الناحية التانية.
اليوجا
حاجة غريبة إن اليوجا تساعد في علاج حساسية الجيوب الأنفية مش كده؟ في وضعية معينة لليوجا بتساعد على إن راسك تفضل مرفوعة شوية، وده بيساعد على تخفيف الضغط على الجيوب الأنفية.
وعلشان تعملي الوضعية دي حطي مخدة أو بطانية ملفوفة تحت ضهرك ونامي على سريرك أو على الأرض، اتني ركبتك وحطي بطن رجليكي قدام بعض، وحطي دراعك جنبك، واضغطي على إيدك علشان تقومي في وضع الجلوس.
مادة الكيرسيتين
ودي نجيبها منين؟ هي مكون نباتي طبيعي موجود في البصل والتفاح والشاي الأخضر، ميزتها إنها مضادة للأكسدة وبتعمل على استقرار خلايا الجسم اللي بتفرز الهيستامين، ودي مادة بتحفز إفراز المخاط من الجيوب الأنفية.
شرب السوائل مهم لعلاج الجيوب الأنفية
علشان بيساعد على تخفيف آلام الجيوب الأنفية وبيخفف الاحتقان، وبيساعد على رطوبة الجيوب الأنفية، وبيقلل من سماكة مخاط الجيوب الأنفية وده يخليه يتدفق سهول أكبر، وأهم المشروبات على الإطلاق هي المياه، وأهم المشروبات اللي لازم تبعدي عنها هي الكافيين والكحول لإنها بتسبب الجفاف.
الزنجبيل – علاج حساسية الجيوب الأنفية بالأعشاب
أو الجنزبيل، بصرف النظر بتنطقيه إزاي، وهو عشب آمن وفعّال جدًا، ووظيفته إنه مضاد طبيعي للهيستامين ومضاد للفيروسات ومعزز للمناعة، وتقدري تضيفيه للشاي وتستنشقي البخار اللي بيطلع من الكوباية، وتقدري تستخدميه طازه أو مجفف.
التعليق باستخدام حساب فيس بوك