محتويات المقال
بالرغم من أن عضلة المهبل مرنة وبتقدر تتمدد وتتقلص عشان تفتح لاستقبال العلاقة الحميمة أو لخروج الجنين، إلا إن مع السن ومع الحمل والولادة ممكن عضلة المهبل تبقى أوسع بطريقة تضايقك أو تضايق شريكك في العلاقة الحميمة. في المقال ده، هنكلمك عن طرق طبيعية لتضييق المهبل، لكن خدي بالك إن المهبل الضيق جدًا مشكلة برضه.
عوامل تمدد/اتساع المهبل
العمر
في الأربعينات من العمر، الستات بتبدأ تفقد جزء من مرونة عضلة المهبل عشان نسبة الإستروجين بتبدأ تقلق في سن ما قبل انقطاع الدورة الشهرية. ونقص نسبة الإستروجين بيبقى معناه إن نسيج المهبل عندك بيكون أرفع وأقل مرونة.
الولادة
لو الولادة طبيعية، فالطبيعي إن المهبل بيتسع وعضلاته بتتمدد عشان تسمح لجسم الطفل بالخروج وعشان كده رجوعها للضيق الأصلي اللي كان موجود قبل الولادة بيكون صعب. لو الولادة الطبيعية اتكررت أكتر من مرة، ده بيكون أصعب وأصعب في رجوع عضلات المهبل لمرونتها الأولى.
أعراض ضعف عضلات المهبل
• السلس البولي.
• الإحساس المتكرر بإلحاح التبول.
• عدم الارتياح في ممارسة العلاقة الحميمة وعدم الشعور بالمتعة زي الأول.
وسائل تقوية عضلات المهبل
فيه أكتر من تمرين يقدروا يساعدوا عضلات الحوض إنها تتقوى وبالتالي المهبل يضيق ويرجع لحالته الأولى.
تمرين كيجيل Kegel
1. أثناء التبول، حاولي توقفي نزول البول. لما يقف، هتحسي بالعضلة اللي قفلت ووقتها هتعرفي إيه هي العضلة المستهدفة بالتمرين.
2. سواء وانتِ في الحمام أو وانتِ نايمة على ضهرك في السرير، حاولي تشدي العضلة دي (كأنك بتمنعي نزول البول) لمدة 5 ثواني وبعدين سيبيها لمدة 5 ثواني.
3. كرري المتتابعة دي على الأقل 5 مرات ورا بعض.
حاولي تركزي في التمرين على العضلة المستهدفة وما تشديش عضلات بطنك أو المؤخرة أو عضلات الفخد مع العضلة المستهدفة. بعد ما تكرري التمرين مرات كتير وتقوي العضلة، ارفعي عدد التمرين من 5 لـ10.
تمرين ضغط الحوض Pelvic tilt
التمرين ده بيقوي عضلات المهبل عن طريق تقوية عضلات الحوض ككل.
1. اقفي واكتافك ومؤخرتك لامسة الحيطة وما تشديش الركب.
2. اشفطي البطن لجوا لحد ما تحسي إن ضهرك كله لامس الحيطة.
3. افضلي على الوضع ده لمدة 4 ثواني وبعدين ارجعي للوضع الأول.
4. كرري الحركات عشر مرات وكرري التمرين ككل لحد 5 مرات في اليوم.
التعليق باستخدام حساب فيس بوك