مع دخول فصل الشتاء، بيكون التحدي الأكبر قصاد أي أم هو نزلات البرد اللي بتصيبها وكمان اللي بتصيب أطفالها وما بتخلصش الشتا كله. وبما إن الوقاية خير من العلاج، وأوفر كتير، جمعنا لك هنا نصايح ممكن تتبعيها عشان تقوي مناعة أطفالك في فترة الشتاء.
كتري من الخضروات والفاكهة
طبعًا، دي النصيحة المتكررة في أي مقال عن حاجة تخص الصحة. لكن كمان فيما يخص المناعة، الدكتور وليام سيرس الطبيب ومؤلف “كتاب تغذية العائلة” بيقول إن الجزر والفاصوليا والبرتقال والفراولة كلهم مواد بتعزز المناعة زي فيتامين سي والكاروتينات اللي بتزود إنتاج الجسم من كرات الدم البيضا المحاربة لأي عدوى، وإنتاجه للإنترفيرون اللي بيغلف الخلايا عشان يحميها من الفيروسات.
ساعات النوم الكافية
طبعًا نوم أولادنا في كل الأحوال خبر سعيد ووقت مهم جدًا لنا. بس لما نتكلم عن المناعة، فالنوم فعلًا مهم جدًا لمناعة الأطفال، طبعًا مش النوم الزايد عن اللزوم، لكن النوم ساعات كافية كل يوم. د. كاثي كيمبر أستاذة طب الأطفال في جامعة بوسطن إن ساعات النوم الكافية بتختلف على حسب السن لأن البيبي اللي لسه مولود (حديث الولادة) بيحتاج لحد 18 ساعة نوم، إنما الطفل الدارج toddler بيحتاج حوالي 12 ساعة نوم والطفل في سن 4 و5 بيحتاج 10 ساعات نوم.
لو طفل رضيع، رضعيه
الجملة عجيبة، صح؟ بس فعلًا الدراسات أثبتت إن من أهم فوايد الرضاعة الطبيعية الكتير جدًا زيادة مناعة الأطفال. الرضاعة الطبيعية بتحمي من التهابات الودن ومن الحساسية ومن الإسهال ومن الالتهاب الرئوي. د. شوبين من الأكاديمية الأمريكية لطب الأطفال بيقول إن لبن الأم غني جدًا بالأجسام المضادة اللي بتحارب الأمراض. لو ما قدرتيش ترضعي كل السنة أو السنتين الأولى، حاولي على الأقل ترضعي أول شهرين أو تلاتة.
نعلًم ولادنا عادات صحية
ساعات الجراثيم بتقوي الجهاز المناعي للأطفال وعشان كده بنبقى سايبين لهم مساحة يلعبوا عشان مناعتهم تكون قوية. لكن اللي ما بنعملش حسابه ساعات إن كتر الجراثيم ممكن يربك المناعة ويتقل عليها جدًا وعشان كده، لازم نعلم أطفالنا يغسلوا إيديهم كويس بالصابون وباستمرار، خصوصًا قبل وبعد كل وجبة، بعد اللعب مع الحيوانات الأليفة، بعد اللعب برا، بعد ما يستخدموا المناديل لمناخيرهم، بعد الحمام، ولما يوصلوا البيت من برا. وعشان يحبوا الموضوع، خليهم هم اللي يختاروا شكل وريحة الصابون اللي بيحبوها ويختاروا لون وشكل الفوطة. د. باربارا ريتش المتحدثة باسم أكاديمية طب الأسنان بتنصح كمان إن بمجرد ما أطفالنا ييجي لهم برد أو أنفلونزا، لازم نرمي فرشة الأسنان بتاعتهم بعده مباشرة، بالطريقة دي هنضمن إن الدور ده مش هيرجع لها تاني لأن الفيروس بيكون متعلق في الفرشة.
نمنع التدخين جوة البيت
إذا كنتِ انتِ أو الأب مدخنين، لازم نمنع التدخين في البيت لأن استنشاق الأطفال لدخان السجاير بيقلل مناعتهم جدًا لأنه بيحتوي على 4000 نوع سم، معظمهم ممكن يقتل خلايا في الجسم حسب كلام د. بيفيرلي كينزلي عالمة الأوبئة في مركز التحكم والوقاية من الأمراض.
ما تستسهليش المضاد الحيوي
كتير مننا أول ما بتظهر أعراض البرد عندنا أو عند أطفالنا، بنلجأ فورًا للمضادات الحيوية وده غلط لأن المضادات الحيوية بتشتغل بس على الأمراض اللي بتسببها الباكتيريا مش الفيروسات في حين إن معظم نزلات البرد والأنفلونزا والاحتقان بيسببها فيروسات. ودي نصيحة د. هاوارد بوشنر أستاذ طب الأطفال والصحة العامة في جامعة بوسطن.
مصدر ساعدنا في كتابة المقال
