5 طرق لتجنب جفاف الجلد في فصل الشتاء

مع دخول فصل الشتاء، مفيش واحدة فينا مش بتعاني من مشاكل البشرة بسبب برودة الجو، مهما كان نوع بشرتها سواءً عادية أو بشرة حساسة أو بشرة جافة أو بشرة دهنية أو حتى مختلطة. كلنا حقيقي بشرتنا بتعاني في الموسم ده، بس زي ما بنخاف وبنعتني ببشرتنا في الصيف، الشتاء كمان له روتين عناية بالبشرة خاص به، هنقول لك هنا طرق لتجنب جفاف الجلد في الشتاء.

أهم 5 طرق لتجنب جفاف الجلد في شتاء 2021

1. غيري نوع الصابون بتاعك.
2. استحمي بدرجة حرارة معتدلة.
3. جففي بشرتك بلطف ورطبيها.
4. غيري مسحوق الغسيل.
5. قللي من استخدام مطهرات اليد.

• غيري نوع الصابون بتاعك

لو انتي من النوع اللي بيستخدم صابون قاسي، بالشكل اللي يخليكي تحسي إن بشرتك من كتر ما نضفت، جلدك بينشف أو بيكون فيه إحساس بسيط إنه مشدود، يبقى لما الشتاء ييجي، لازم توقفي استخدامه لإن الأنواع دي من الصابون مدمرة لبشرتك في الشتاء. لأنها أصلًا بتقضي على الزيوت الطبيعية اللي بيفرزها الجلد لترطيبه. استخدمي في الشتاء أنواع في تركيبتها مرطبات. هي هتوفر لك النضافة اللي عايزاها، وفي نفس الوقت، هتوفر ترطيب جيد لبشرتك.

• استحمي بدرجة حرارة معتدلة

على قد ما الاستحمام بمياه سخنة ولوقت طويل بيكون حاجة مغرية جدًا في الشتاء، بس الموضوع ده له آثار سلبية على البشرة. تجنبي المياه بحرارة عالية، واختاري دايمًا درجة حرارة المياه تكون ما بين فاترة ودافية.

• جففي بشرتك بلطف ورطبيها

بعد الاستحمام، بشرتك بتكون أكثر طراوة ومسامية جدًا، ودي فرصة ممتازة لتجفيفها بهدوء، بدون فرك، وده يعتبر أفضل وقت لترطيبها. استخدمي مرطبات بدون لون وبرائحة عطرية خفيفة. وتقدري في الشتاء تستخدمي مرطبات فيها مكونات تقيلة زي زبدة الشيا والفازلين، لإن قدرتهم على حبس الرطوبة في الجلد عالية، واستخدمي المرطبات اللي بتحتوي على الكاموميل.

• غيري مسحوق الغسيل

ممكن دي تعتبر نصيحة غريبة، بس فعليًا كل منظفات الملابس ومستحضرات تنعيم الأنسجة اللي ريحتها قوية هي عدو في الشتاء، لإن ريحتها وتركيبتها القاسية بتأثر بالسلب على بشرتك، حتى لو بتستخدمي المسحوق من سنين، هتحتاجي دايمًا في فترة الشتاء إنك تغيري لحاجة ريحتها أهدى علشان العطور القوية دي ما تأثرش على بشرتك.

• قللي من استخدام مطهرات اليد

اللي لازم تعرفيه إن المطهرات دي مركبها الأساسي هو الكحول، اللي هو فعلًا بيسحب المياه من بشرتك ويسيبها في حالة جفاف مؤلم، فلو انتي مش بتشتغلي في المجال الصحي، غسيل الإيدين بشكل دوري كفيل إنه يوفر لك النضافة والحماية اللي محتاجة لها.

في النهاية، الترطيب هو صديق بشرتك في كل موسم، وكل موسم له طريقة ترطيب معينة بتتناسب مع نوع بشرتك. واللي لازم تعرفيه إن الترطيب مش دوره إنه يحافظ بس على وجود المياه، لكن كمان الحفاظ على صحتها وشبابها ومرونتها. لو لاحظتي على بشرتك ظهور احمرار أو حكة أو جفاف شديد، لازم تحجزي موعد فوري مع طبيب الجلدية، لإن البرودة تقدر تسبب لك أمراض جلدية انتي في غنى عنها وعن علاجها لفترة طويلة.

المصادر
www.ndtv.com
www.consumerreports.org
www.womenshealthmag.com