محتويات المقال
“الجوع والشتاء” أو في قول آخر “let’s hunger games begin”. مش هنكدب يا جماعة: الصراع النفسي اللي وقعنا فيه واحنا بنكتب النصائح دي كان شديد. اللي هو ازاي يا جماعة شتا وناكل أكل صحي؟ أومال صواني المكرونة والبطاطس وحلل المحشي الأسطورية دي نسيبها لمين يا جماعة؟! حد يحرم نفسه من نعمة ربنا؟ فيه ناس أعرفهم بيبصوا لحلة محشي الكرنب بنفس عاطفة العشاق والله، بريحتها اللي بتدفي الشقة قبل ما تتاكل، ولا صواني المكرونة بالبشاميل اللي بتتاكل ودموع نازلة من عينينا من فرط اللذة، ولا الحلويات! فيه مذبحة الكيكة السنوية اللي بنشارك فيها كلنا. ومجات الهوت تشوكليت اللي رايحة جاية من المطبخ، معروفة يعني، بس وقفة مع النفس يا جماعة! ناخد نفسنا ونستهدى بالله علشان فيه مستقبل بيضيع فعلًا ولازم نلاقي حل. وبكل أسف، لاقينا عشر حلول بصرف النظر عن مقتنعين بيهم ولا لأ، بس فيه لبس صيفي متشال في الدواليب مش هنعرف ندخل دراعنا فيه لو استسلمنا لمصيدة الشتاء اللعين. هنقول لك النصايح، شوفيهم من غير ما تتعصبي! احنا بنحاول نرمي لبعض عوامات علشان نلحق بعض بجد فخلينا نبدأ بأول عوامة.
نصائح تقليل الإحساس بالجوع في الشتاء
- اشربي ميا
- اتمرني
- ابعدي الأكل عن عينك
- نامي كويس
- كلي بروتين
- كلي سناك صحي
- بلاش سكر
- افطري كويس
- خلي أكلك مبهر
- كلي ببطء
اشربي مياه
حقيقي احنا بنهمل نقطة شرب المياه دي في الشتاء جدًا ودايمًا نشتكي من جفاف بشرتنا في الشتاء، وبنقول ده بسبب الجو البارد بس هو الحقيقة من قلة شرب المياه. ومعنى شرب المياه مش إنك تشربي عصائر ولا مشروبات ساخنة وتعتبري إن ده بديل، لأ، شرب المياه نقية كده من غير إضافات. لإن اللي بيحصل في المخ البشري إنه أغلب الأوقات بيخلط ما بين الشعور بالعطش والشعور بالجوع. علشان كده، أيًا كان فصل السنة لما تحسي بالجوع، جربي اشربي مياه لإنك غالبًا هتكوني عطشانة مش جعانة.
اتمرني
من الحاجات اللي بجد بنحمد ربنا عليها هنا في مصر هو إننا ما عندناش تلج في الشتاء غير مثلًا في أماكن معينة في سيناء، بمعنى إن حتى لو الجو برد بالنسبة لنا، مفيش جزء إننا هنتحبس في البيت بسبب إن التلج وصل سمكه لمتر واتنين متر والكلام ده! أغلب أيام الشتاء الجو مشمس وبنشوف الشمس حتى لو ساعات قليلة في اليوم. في الوقت ده، اتمرني حتى لو مرتين تلاتة في الأسبوع لمدة نص ساعة. والسبب بسيط إن التمارين بتعلّي من نسبة هرمون السعادة في الجسم اللي احنا بنحب نعلّيه بأكل النشويات والحلويات. هو صحيح خيار أفضل بس احنا زي ما اتفقنا بنحاول ننقذ نفسنا فخلينا نتمرن أحسن.
ابعدي الأعداء من قدام عينيكي
من الجرائم اللي كلنا بنحب نعملها هي الزيارة الحنونة لكل محلات الحلويات في طريقنا ولا قسم المخبوزات في السوبر ماركت. واللي بنوقف نشتري منه اللي نقدر عليه من باب يعني أجيب الدونتس وأسيب الكرواسون؟ ده حتى يزعل! فنقوم جايبنه، فيصعب علينا الباتيه، فنجيبه هو كمان. ما هو حرام نفرق أفراد الأسرة عن بعضيها! وبصرف النظر عن حنان الأم بتاعنا اللي بيظهر في اللحظة دي، لازم بجد نروح نشتري متطلباتنا واحنا شبعانين وما ندخلش أبدًا الأقسام اللي هي عبارة عن فخ في صورة دقيق وسكر.
نامي كويس
هو صحيح أنا مكسوفة وأنا باقول النصيحة دي خصوصًا للأمهات اللي عندها أطفال بتسهر ترضعهم، بس ممكن تحطيها في قائمة أمنياتك للعام الجديد. وبالنسبة للي ممكن يحققوا النقطة دي، هنقول لهم إن العلماء وجدوا إن فيه فعلًا ارتباط بين النوم الجيد والجوع، لإن اللي بيحصل إن السهر لفترة طويلة ومزيج البرد والليل ده لسبب ما بيخلينا نقف قدام التلاجة نشوف نصيبنا منها هيكون إيه. الشعور بالملل اللي بنقاومه بالأكل بالليل خطير بجد. علشان كده، نامي كويس.
كلي بروتين
من أفضل الاختيارات في عناصر الغذائية للحصول على الشبع لفترة طويلة هي البروتين. ده مش معناه تروحي تشتري بار بروتين تجاري مليان فواكه مجففة وسكر، لأن ده فخ على فكرة. البروتين اللي نقصده هو البروتين الطبيعي يعني الزبادي والأسماك واللحوم والطيور والمكسرات.
كلي سناكس صحي
يعني قبل ما تتعصبي بسبب النقطة دي، هنقول لك حاجة. السناكس وسيلة كويسة جدًا لتزويد الجسم بالطاقة، بس الفكرة في نوعها. يعني هو صعب أقول لك خلينا نقضيها صوابع خيار وجزر لأن دي حاجة تنرفز ومحبطة، بس في نفس الوقت، ده لا يعني أبدًا إننا نقضيها شيبسي وبطاطس محمرة وبسكوتات وكيكات. علشان كده، هنقترح عليكي إنك تخلّي عندك دايمًا عيش حبوب كاملة أو أي نوع عيش صحي تحبيه وكمان برطمان زبدة فول سوداني ونوع جبنة من اللي بتحبيه. لو عملتي شريحة أو اتنين منهم وأكلتيهم هتحسي إنك شبعتي وكلتي أكل طعمه حلو وصحي.
اوعى وشك والسكر
احنا مش بنعاكس هنا، احنا بنتكلم جد. علشان تفهمي آلية السكر: الجسم بيتعامل مع السكر على إنه وسيلة سريعة وتقريبًا مباشرة لتزويد الجسم بالطاقة. اللي بيحصل إن الإنسولين بينطلق في الجسم وبعدين يقف محتار ويقول طيب أنا باعمل إيه هنا؟ مفيش أي نشاط بيتعمل علشان أحرق السكر ده؟ فيضطر إنه ياخد السكر ويحوّله لشوية دهون حلوة كده يخزنها في أماكن ما يصحش إنها تتخزن فيها. فعلشان كده، انتبهي جدًا من السكريات الصريحة والسكريات المخفية لإن في منتجات في السوق مكتوب عليها صحية لما تبصي في مكوناتها، تلاقي سكر صريح فيها.
افطري كويس
هنعتبر النقطة دي مرتبطة برقم 4، فالواحد بيكتبها على استحياء يعني. بس حقيقي احنا أشطر حاجة بنعملها وبجدارة هي الإهمال في النفس. يعني ليه بيكون عندنا حرص على فطار كل أفراد أسرتنا واحنا لأ؟ افطري كويس، وكويس جدًا كمان! وجبة الفطار لما تكون متكاملة، تأثيرها بينعكس على باقي اليوم ومستوى الشبع عندك بيكون عالي جدًا وحتى النشاط والإنتاجية.
خلّي أكلك مبهر أو متبل
بمعنى إنك لما تعملي أكلك في الشتا، خليه فيه توابل حلوة، ما تعمليش أكل طعمه مايع أو دِلِع، لأن ده أولًا هيقفلك من الأكلة الطبيعية اللي قدامك، وهيخليكي تفكري في الأكل اللي كله نشويات وسكريات وغير صحي بالمرة. اعملي أكلك بشكل حلو وغني علشان حتى الصورة اللي عينك شايفاها توصّل للمخ رسالة إنك شبعانة ومكتفية بالأكل ده.
كلي ببطء
من الجرائم اللي بنعملها – وفيه ناس بتتباهى بيها – هي الأكل بسرعة، اللي هو ليه بجد؟! ده أولًا خطير جدًا على صحة معدتك لأن إنتي ما مضغطيش الأكل كويس، وبالتالي نزل لمعدتك شبه سليم، واللي مش من وظيفتها أصلًا إنها تتعامل مع الأكل السليم، وتقوم بوظيفة الأسنان، وده بيسبب مشاكل هضمية سخيفة على المدى البعيد. وبعدين يعني لما احنا نقعد على الأكل تلات ولا حتى خمس دقايق هيحصل لنا إشباع نفسي إننا أكلنا امتى. علشان كده، خدي وقتك جدًا في المضغ وما تخليش حد يستعجلك تقومي من على الأكل.
كده احنا رمينا لبعض 10 عوامات تنقذنا من ظلام الجوع في الشتاء وميعادنا في الصيف. كله هينكشف ويبان وهنعرف مين اللي نجى ومين قاعد جوه جعان.
التعليق باستخدام حساب فيس بوك