5 طرق لعمل الفول على السحور

السحور في رمضان ساعات بيحيرنا أكتر من الفطار نفسه وبنبقى محتاجين تنوع وتغيير، وده لأن أغلب المصريين بياكلوا أصناف محدودة زي الجبن بأنواعها والزبادي والبيض وطبعًا الفول. على فكرة الفول المدمس يعتبر سحور صحي جدًا في حد ذاته لإنه بيمد الجسم بنسبة عالية من البروتين والألياف، اللي بتساعد جدًا على الشبع. المهم إننا نراعي الإضافات اللي بنزودها على طبق الفول لو بنحاول نعمل رجيم أو متبعين نظام غذائي صحي. ولإن الفول يعتبر من أفضل وجبات السحور رمضان عند المصريين. اخترنا طبق الفول عشان نقول لك طرق لعمل الفول وأفكار متنوعة هتخليكي ما تزهقيش منه وتحسي إنك بتاكلي كل يوم طعم جديد.

 

 

طريقة عمل الفول بالحمص والطحينة

المقادير

• 1 كوب فول مدمس مهروس
• 1/2 كوب حمص حب معلب
• 1/4 كوب طحينة
• ماء بارد لتخفيف القوام
• 3 معلقة كبيرة عصير ليمون
• 1 معلقة صغيرة كمون
• 1 معلقة صغيرة توم مفروم
• زيت زيتون
• ملح وفلفل
• شطة (اختياري)

للتقديم

• بقدونس مفروم وطماطم مفرومة ناعم
• 2 معلقة كبيرة حمص حب للوجه

طريقة عمل الفول بالحمص والطحينة

• في الكبة أو محضرة الطعام، اخلطي الحمص مع الطحينة وعصير الليمون والتوم والكمون والملح والفلفل والشطة لو حبيتي وضيفي شوية من المياه الباردة لحد ما يبقى القوام ناعم جدًا وكريمي.
• سخني الفول المهروس وضيفي له خليط الحمص المهروس واخلطيهم في بعض نص خلطة بس.
• زيّني بحبات الحمص والطماطم والبقدونس ورشة وفيرة من زيت الزيتون وقدميه مع العيش اللبناني.

 

 

طريقة عمل طاجن الفول بالبيض والسجق الشرقي

المقادير

• 1/4 كيلو سجق شرقي مقطع حلقات
• 2 علبة فول مدمس حب
• 4 بيضات
• فلفل أخضر مقطع مكعبات
• 1/2 كوب طماطم مبشورة
• 2 معلقة صغيرة توم مفروم
• 1/4 كوب كزبرة خضراء مفرومة ناعم
• زيت نباتي
• ملح وفلفل
• 2 معلقة صغيرة كمون
• عصير ليمون

طريقة عمل الفول بالبيض والسجق الشرقي:

• في طاسة على النار، هتشوحي السجق الشرقي في قليل من الزيت النباتي وتضيفي معاه الفلفل والطماطم المبشورة والتوم المفروم والكزبرة الخضرا ورشة من الملح والفلفل والكمون.
• في طاجن فخار مدهون بالزيت، هتضيفي الفول وتقلبي معاه خلطة السجق وتضيفي له عصير ليمون ومعلقة زيت نباتي وملح وفلفل حسب الحاجة وتقدري تضيفي شوية شطة أو فلفل حراق لو تحبي.
• اخبزي الطاجن في الفرن لمدة 15 دقيقة وبعدين خرجيه من الفرن واكسري البيض على الوش وضيفي رشة ملح وفلفل على وش البيض ورجعيه للفرن وولعي الشواية لحد ما توصلي لدرجة التسوية اللي تحبيها للبيض.
• قدمي الطاجن سخن مع رشة من الكزبرة.

 

 

طريقة عمل الفول بالزبادي والنعناع

المقادير

• 1 كوب من الفول الحب
• 1 كوب زبادي
• 2 معلقة كبيرة عصير ليمون
• 1/4 كوب نعناع طازة مفروم ناعم
• 1 معلقة صغيرة توم مفروم
• 1/2 معلقة صغيرة نعناع مجفف
• ملح وفلفل

لتزيين الوجه

• مكعبات صغيرة طماطم وخيار وأوراق النعناع الطازة

طريقة عمل الفول بالزبادي والنعناع

• في بولة، اخلطي الزبادي مع النعناع الطازة المجفف والملح والفلفل وعصير الليمون والتوم وزيت الزيتون.
• في الطاسة على النار، سخني الفول وضيفي عليه قليل من الزيت وعصير الليمون ورشة ملح.
• في طبق التقديم، قدمي الفول وفوقه طبقة الزبادي وزيني بالطماطم والخيار ومزيد من النعناع. ووقت الأكل، اخلطي الطبقتين مع بعض.

 

 

طريقة عمل الفول الإسكندراني

المقادير

• 1 كوب فول مدمس حب
• بصل أحمر مفروم ناعم
• بقدونس مفروم ناعم
• طماطم مقطعة مكعبات صغيرة
• 1/4 كوب زيتون أسود حلقات مخلي
• زيت زيتون
• 2 معلقة كبيرة عصير ليمون
• ملح وكمون وشطة اختياري

طريقة عمل الفول الإسكندراني:

• في بولة، اخلطي كل المكونات ما عدا الفول وقلبيهم مع بعض كويس.
• ضيفي نص الخلطة للفول وقلبيهم مع بعض والنص التاني على الوش مع رشة وفيرة من زيت الزيتون.

 

 

طريقة عمل الفول بالتوم والفلفل الأحمر المشوي

المقادير

• 1 كوب فول مدمس مهروس
• زيت نباتي
• ملح وفلفل
• معلقة صغيرة بابريكا
• 2 معلقة كبيرة عصير ليمون
• 2 معلقة كبيرة من معجون التوم والفلفل الأحمر المشوي
• بقدونس مفروم وبصل أخضر للتقديم

لعمل الفلفل والتوم المشوي

 

• راس توم كاملة
• 3 حبات فلفل أحمر (كاملة بدون تقطيع)
• زيت نباتي
• ملح

طريقة عمل الفول بالتوم والفلفل الأحمر المشوي:

• ادهني الفلفل والتوم بالزيت ورشة من الملح وغلفيهم بورق الفويل واشويهم في الفرن على درجة حرارة 200 لمدة 45 دقيقة.
• استخرجي فصوص التوم من القشرة واتخلصي من القشرة، وتقدري تحتفظي بالتوم المشوي في برطمان وتغمريه بالزيت.
• حطي حبات الفلفل الأحمر وهي سخنة في كيس واقفليه عشان البخار هيساعدك تتخلصي من القشرة بسهولة، قشريه واحفظيه في برطمان محكم الغلق مغطى بالزيت.
• لعمل المعجون، اهرسي التوم والفلفل المشوي مع بعض باستخدام شوكة أو في الهون.

لتحضير الفول:

• اخلطي كل مكونات الفول مع معجون التوم والفلفل المشوي.
• قدمي الفول مع رشة من البقدونس والبصل الأخضر على الوجه ورشة وفيرة من زيت الزيتون.

البسبوسة من أكتر الحلويات اللي كل الناس بتحبها .. اعرفي هنا طريقة عمل البسبوسة بالقشطة من منال العالم

 

هل عندك تعليق على المقال ده؟ شاركينا هنا

Leave a Comment Cancel Reply

التعليق باستخدام حساب فيس بوك