ساعات كتير بيبقى نفسنا ناكل سلطة، بس مش عايزين ناكلها بشكل تقليدي وخصوصًا بقى لو عاملين دايت بيكون نفسنا طبق السلطة يبقى وجبة كاملة ومشبعة، ويا سلام بقى لو دافية وخصوصًا في الشتا. في الشتا، ما بتكونش فكرة لطيفة إننا ناكل طبق سلاطة بارد من التلاجة. في الصيف طبعًا بتكون لذيذة ومنعشة لكن في الشتا لو في عناصر جوه السلطة مطبوخة ودافية شوية هتكون أفضل بكتير.
طب إزاي نقدر بشكل عام نضيف عناصر دافية للسلطة؟
- نقدر نضيف أي نوع مطبوخ من الحبوب زي القمح، الكينوا، البرغل، العدس، أو الكسكسي.
- نقدر نضيف قطع ستيك، جمبري، سالمون أو فراخ مشوية دافية في أسياخ خشبية بشكل لذيذ مع السلطة.
- نقدر نضيف عنصر الخضراوات المشوية في الفرن زي البطاطا، البطاطس، القرنبيط، البروكلي أو حتى البنجر للسلطة هينقلها في مكان تاني.
والنهارده هنعرفك على السلطات الشتوية الدافية من خلال تلات وصفات أحلى من بعض مختلفين ومبتكرين ويعتبروا وجبات كاملة فيهم أغلب العناصر الغذائية اللي ممكن تاخديها من أي وجبة تانية أنصحك تجربيهم هتنبهري!
سلطة العدس البني مع الفلفل المشوي والجبنة الفيتا مع دريسينج دبس الرمان
سلطات دافية
مقادير السلطة
- 1/2 كوب عدس بجبة مسلوق ودافي
- 50 جم جبنة فيتا يوناني
- 1/2 كوب طماطم شيري مقطعة أنصاص وممكن تستخدمي مكعبات من الطماطم العادية
- 2 ثمرة فلفل ملون مشوية مقطعة مكعبات وتكون دافية
- أوراق الكزبرة
- بصل أحمر شرايح
- أي نوع خس أو جرجير أو أي نوع خضراوات ورقية تحبيها
للدريسينج
- 1 معلقة كبيرة دبس الرمان
- 1 فص توم مفروم
- 1/4 معلقة صغيرة كمون
- ملح وفلفل أسود
طريقة عمل سلطة العدس
- اخلطي كل مكونات الصوص مع بعضها.
- اخلطي العدس المسلوق مع مكعبات البصل والطماطم والفلفل الألوان.
- جمعي السلطة في طبق التقديم: رصي الخس أو أي ورقيات تحبيها وفوقها العدس مع الخضروات وزينيها بقطع الجبنة الفيتا اليوناني وورق الكزبرة وضيفي الصوص وقت التقديم.
سلطة الجبنة الحلومي المشوية مع البرتقان والجرجير ودريسينج المسطردة والعسل
سلطات دافية. المصدر bbcgoodfood
مقادير السلطة
- جرجير أو سبانخ
- ثمرة برتقان مقطعة شرايح
- 3-4 شرايح متوسطة السماكة من الجبنه الحلوم
- زيت زيتون لشوي الحلوم
- ثمرة جزر مقطعة شرايط رفيعة باستخدام مقشرة الخضار
- عين جمل
للدريسينج
- معلقة كبيرة عسل أبيض
- معلقة كبيرة مسطردة
- معلقة كبيرة مايونيز أو زبادي يوناني
- ملح وفلفل
- 1/2 معلقة بابريكا
الطريقة
- في شواية أو طاسة على نار متوسطة في معلقة صغيرة من زيت الزيتون، اشوي شرايح الجبنة الحلوم.
- في معلقة من زيت الزيتون شوّحي شرايح الجزر بس لحد ما يطرى وتبليه بالملح والفلفل.
- جمعي السلطة في طبق التقديم بإنك ترصي الورقيات سواء الجرجير أو السبانخ أو الاتنين وفوقيهم شرايط الجزر الدافية وشرايح البرتقان والجبنة الحلوم المشوية.
- اخلطي كل مكونات الدريسينج واخلطيه مع السلطة وقت التقديم.
سلطة مكسيكية مع أسياخ الجمبري
سلطات دافية. المصدر: theflavoursofkitchen
مقادير السلطة
- 1/2 كوب مكعبات أفوكادو
- 1/2 كوب ذرة معلبة مصفاة
- 1/2 كوب طماطم شيري مقطعة أنصاص أو مكعبات طماطم عادية
- 1/2 ثمرة بصل أحمر مقطعة مكعبات
- جمبري مقشر متوسط الحجم
لتتبيل الجمبري
- بابريكا
- ملح وفلفل
- بودرة توم
- زيت زيتون
- عصير ليمون
للدريسينج
- 1/4 كوب زيت زيتون
- 2 معلقة كبيرة عصير ليمون
- 1 معلقة صغيرة بابريكا
- 1 فص توم مفروم
الطريقة
- تبلي الجمبري ورصيه في الأسياخ الخشبية واشويه على طاسة أو شواية.
- جففي الذرة المعلبة كويس جدًا على مناديل مطبخ واشويها في طاسة سخنة بدون أي مادة دهنية لحد ما تاخد لون الشوي وتقدري كمان تستخدمي الذرة الطازة المشوية.
- اخلطي كل مكونات الدريسينج وضيفيها وقت التقديم.
- رصي مكونات السلطة وقدميها مع أسياخ الجمبري الدافية.
التعليق باستخدام حساب فيس بوك