محتويات المقال
في رمضان، أغلبنا بيحب المقبلات اللذيذة زي السمبوسة بكل أنواعها ويا سلام لو في تنوع لحشوات السمبوسة .. هتلاقيها ما بتلحقش تتحط على السفرة لإن أول المدفع ما بيضرب، بتكون دي أسهل حاجة تتخطف بالإيد. لما دورت على أصل كلمة سمبوسك أو سمبوسة، لقيت إنها كلمة معربة من اللغة الفارسية القديمة ولقيت كمان إنهم لقوا وصفات للسمبوسة في كتب الطبخ من القرن العاشر لحد القرن التالت عشر. تخيلوا قد إيه الأكلة دي قديمة وتاريخية!
طرق لحشوات السمبوسة – المصدر ladyspatula
السمبوسة عبارة عن عجينة السمبوسة والحشوة، العجينة في منها نوعين: العجينة الجاهزة اللي بتتباع مجمدة على شكل مستطيلات بتتحط جواها الحشوة وتطبق عليها العجينة على شكل مثلثات، والنوع التاني اللي بيطلق عليه السمبوسك البيتي عشان هي عجينة بتتعمل في البيت وبتتقطع على شكل دواير وبتتحشي وبتتقفل زي القطايف وتتبرم بالإيد عشان تاخد الشكل المميز المتعارف عليه. النهارده هنشارك معاكي طريقة عمل عجينة السمبوسة البيتي اللي تقدري تقليها في الزيت أو تخبزيها في الفرن وللناس اللي بتزهق وبتحب التغيير، هنشاركك بخمس وصفات لحشوات متنوعة للسمبوسك.
طريقة عمل عجينة السمبوسة البيتي (تصلح للقلي أو الخبز في الفرن)
طريقة عمل عجينة السمبوسة – المصدر hyattrestaurants
مقادير عجينة السمبوسة
- 500 جم دقيق
- 1 معلقة صغيرة خميرة فورية
- 1 معلقة كبيرة زبدة سايحة
- 2 معلقة كبيرة زيت زيتون
- 1 معلقة صغيرة ملح
- 1 معلقة صغيرة سكر
- 1 معلقة كبيرة لبن بودرة
- مياه للعجن
طريقة عمل عجينة السمبوسة:
- في بولة صغيرة، اخلطي الخميرة مع السكر وربع كوباية من المياه الدافية وقلبيهم وسيبيهم لحد ما تظهر فقاعات الخميرة.
- في بولة كبيرة ضيفي باقي المكونات واخلطيها بالمعلقة واعملي حفرة في نص العجينة وضيفي مزيج الخميرة وقلبي بمعلقة خشب.
- ضيفي مياه للعجينة وقلبي لحد ما تبدأ العجينة تتكون. استعملي إيديكي واعجني العجينة على رخامة المطبخ لحد ما تبطل تلزق وتبقى ملساء (طبعًا تقدري تستخدمي العجان الكهربائي لو متوفر).
- سيبي العجينة في بوله مدهونة بالزيت، وغطيها كويس وسيبيها في مكان دافي تخمر وترتاح لمدة ساعة.
- بعد ما تخمر العجينة، افرديها بالنشابة وقطعيها على شكل دواير وبكده تكون جاهزة للحشو.
- احشيها بالحشوة اللي تحبيها وسويها إما بالخبز في الفرن أو بالقلي العميق في الزيت.
- تقدري بعد متحشيها تشيليها في الفريزر:رصي حبات السمبوسك مفرودة على صينية وغطيها لحد متتجمد وبعدين جمعي الحبات في أكياس محكمة الغلق ورصيها في الفريزر لوقت الحاجة.
أفكار متنوعة لحشوات السمبوسة
1. حشوة الجبنة الحلوم:
المقادير
- جبنة حلوم قليلة الملح مبشورة
- جبنة فيتا
- عين جمل مجروش
- بقدونس مفروم
- توم مفروم ناعم
طريقة عمل حشوة الجنبة الحلوم للسمبوسة:
اخلطي مكونات الحشوة كلها في بولة واحشي بيها السمبوسك قبل ما تقليه.
2. حشوة البطاطس بالكاري (نباتية vegan)
المقادير
- بطاطس مسلوقة ومهروسة
- بسلة مسلوقة
- بصل مفروم ناعم
- معجون توم وجنزبيل
- كاري
- كركم
- حبوب الكمون
- ملح وفلفل وكزبرة خضراء
- زيت
طريقة عمل حشوة البطاطس للسمبوسة:
- شوحي البصل في معلقة من الزيت مع معجون التوم والجنزبيل والبهارات.
- ضيفي البطاطس المهروسة والبسلة وشوحيهم لحد ما يمتزجوا مع كل البهارات وضيفي الملح والفلفل.
- بردي الحشوة واحشي بيها السمبوسك.
3. حشوة الفراخ والذرة
المقادير
- صدور فراخ مقطعة قطع صغيرة جدًا أو مفرومة
- ذرة صفرا معلبة
- بصل أخضر مفروم
- صويا صوص
- قرفة
- ملح وفلفل
- نشا مذوب في الماء
طريقة عمل حشوة الفراخ والذرة للسمبوسة:
- في شوية من الزيت شوحي البصل الأخضر وضيفي الفراخ وشوحيها لحد ما تاخد لون ذهبي وتبدأ تستوي.
- ضيفي الذرة الصفرا وقلبي كويس وبعدين ضيفي البهارات والصويا صوص.
- ذوبي شوية من النشا في مياه باردة وضيفيهم للحشوة عشان يضيفوا قوام ويساعدوا إن الحشوة تكون متماسكة جوه السمبوسك.
- بردي الحشوة وبكده تكون جاهزة للحشو.
4. حشوة اللحمة المفرومة الحارة والجبنة الموتزاريلا
المقادير
- لحمة مفرومة
- جبنة موتزاريلا
- بقدونس مفروم ناعم
- هريسة
- بصل مفروم ناعم
- ملح وفلفل أسود
- سبع بهارات
طريقة عمل حشوة اللحمة المفرومة للسمبوسة:
- شوحي البصل في زيت الزيتون وضيفي اللحمة المفرومة وقلبي لحد ما تبدأ تستوي.
- ضيفي الهريسة والملح والفلفل والبهارات واطفي النار.
- ضيفي البقدونس المفروم وسيبي الحشوة تبرد وبعدين ضيفي الجبنة الموتزاريلا.
- الحشوة جاهزة للاستخدام.
5. حشوة السبانخ واللبنة وعين الجمل
المقادير
- سبانخ مفرزنة
- بصل أحمر مفروم ناعم
- عين جمل
- القليل من اللبنة
- سماق
- ملح وفلفل
- زيت زيتون
طريقة عمل حشوة السبانخ واللبنة وعين الجمل للسمبوسة:
- خلي السبانخ تفك تمامًا وصفيها من المياه كويس عن طريق عصرها في فوطة مطبخ لحد ما تتخلصي من كل مياتها.
- شوحي البصل الأحمر في زيت الزيتون وضيفي الملح وفلفل والسماق.
- ضيفي السبانخ المعصورة وقلبيها كويس واطفي النار.
- ضيفي معلقة من اللبنة عشان تدي قوام للحشوة وطعم لذيذ.
مفيش حد فينا مش بيحب البسبوسة .. شوفي هنا طريقة عمل البسبوسة بالقشطة من منال العالم
التعليق باستخدام حساب فيس بوك