محتويات المقال
الإندومي أو “الرامن”، نودلز سريعة التحضير وأكلة ليها شعبية كبيرة قوي ومحبوبة جدا، الأطفال والمراهقين بيموتوا فيها، وجبة آخر الشهر في الشغل لما الفلوس بتخلص وأي حد مستعجل وعايز أكلة سخنة، مشبعة، سريعة، وأهم حاجة إنها رخيصة.
كتير اتكلموا عن أضرارها وإن استهلاكها بشكل يومي وبكميات كبيرة ليه أضرار صحية وإن فيها نسبة عالية من الصوديوم وأكياس التوابل الموجودة معاها فيها منكهات صناعية ضارة بس بالرغم من كده، الأطفال بتحبها وبتطلبها ودايما يشبطوا فيها والكبار ساعات كتير مبيقدروش يمنعوها وبيلجأوا لها وقت الطوارئ. عمليًا مش هنقدر نمنع استهلاكنا للإندومي.
عشان كدة إحنا النهاردة هنقولك على طرق جديدة وغير تقليدية لعمل الإندومي هتخليها وجبة كاملة ولذيذة، عشان لما يكون نفسك فيها إنتي أو أولادك تقدري تقدميها لهم بشكل صحي ولذيذ. أفكار عمل الإندومي إلي هنقدمها لك كلها بتعتمد على عدم استخدام أكياس البهارات الإضافية الموجودة مع النودلز.
1-شوربة الخضار مع الفراخ والرامن نودلز
bakerbynature
تقدري تحضري شوربة خضار فيها مجموعة متنوعة من الخضراوات المشكّلة إلي بتحبيها مع مرقة فراخ متحضرة في البيت ومتنكهة بكل المطيبات إلي متعودين عليها، ولمزيد من النكهة ضيفي شويه من عصير الطماطم للمرقه والنودلز وسيبيها تستوي مع كل الخضراوات دي هتكون طبق شوربة هايل للشتا، قدميها مع شرايح الفراخ.
2- برطمان سلاطة التونة بالنودلز والخضار
طرق جديدة لعمل النودلز – pinterest
فكرة السلاطة في البرطمانات فكرة محبوبة وعملية جدا عشان تاخديها معاكي الشغل.كل إلي هتعمليه إنك هتسلقي النودلز في ميه مغلية أو تضيفي عليها ميه مغلية وتغطيها شويه لحد ما تستوي وتبرديها وتجمعه البرطمان بتاعك، هتعملي طبقات من الخضراوات إلي بتفضليها مع طبقة من التونه والدريسينج إلي تحبيه وقت الأكل هترجي البرطمان وتفضيه في الطبق وتاكليه.
ممكن تشوفي هنا طريقة عمل البراونيز زي المحترفين!
3- الإندومي مع البيض: النودلز الحارة مع البيض المسلوق
الإندومي مع البيض المسلوق – currytail
ناس كتير بتحب النودلز عشان مشطشطة وبما إن إحنا هنستغتى عن التوابل والبهارات الموجودة معاها يبقى لازم يكون في بديل.
هنستخدم صوص السيراتشا الحراق وده نوع من الصوصات الآسيوية الحراقة جدا مع معلقة من الجنزبيل الفريش المفروم والتوم المفروم هنشوحهم على النار في معلقة صغيرة من الزيت ونضيف صوص السيراتشا ونضيف المرقة البيتي سواء مرقة خضار أو فراخ وبكده نكون نكهنا مرقة تسوية النودلز، هنضيف بعد كده النودلز لحد متستوي ونزينها بالفلفل الحار والكزبرة الخضرا والبصل الأخضر مع بيضة مسلوقة لإضافة عنصر البروتين. احترسوا من الوصفة دي لإنها مش لأصحاب القلوب الضعيفة وحراقة جدًا ومش للأطفال.
4-ستير فراي الرامن نودلز مع الخضار والفراخ أو اللحمة
استخدمي كل بواقي الخضار الموجودة عندك في التلاجة وكمان بواقي الفراخ أو اللحمة المشويه أو المسلوقة في الوصفة دي وإعملي وجبة متكاملة.
في طاسه واسعه على نار عالية هتشوحي الخضراوات والفراخ مع جنزبيل وتوم مفرومين وتضيفي شويه من الصويا صوص وعليهم النودلز المسلوقة، هتقلبي كله بسرعة لحد ميندمجوا ويفضل الخضار مقرمش ومحتفظ بلونه وتتاكل ساخنة.
5- طريقة عمل إندومي كريمي مع الكاري والخضار
طريقة عمل إندومي كريمي مع الكاري – tablefortwoblog
عشان تعمليها هتحتاجي معجون الكاري الجاهز هتلاقيه متوفر في أي سوبر ماركت كبير ولبن جوز الهند عشان هو ده إلي هيخليها كريمية جدا. هتضيفي معلقة من معجون الكاري على كمية متساوية من لبن جوز الهند والمرقة البيتي وتخليهم يسخنوا على نار هادية و ضيفي بعد كده النودلز تستوي في المزيج ده وتاخد كل نكهتها منه وتبقى كريمية ولذيذة. قدميها مع الكرنب الصيني والمشروم وعصير الليمون واستمتعي بنودلز بلمسة تايلاندية.
6- طريقة عمل إندومي ( سويت آند ساور )
طريقة عمل إندومي ( سويت آند ساور ) – pinterest
الفراخ السويت آند ساور كلنا بنحبها وبنطلبها من المطاعم الصينية، طب ليه منجربهاش مع النودلز سريعه التحضير.كل إلي هتحتاجيه صوص الحلو والحامض الجاهز وهيكون متوفر في أي سوبر ماركت كبير في منطقة الصوصات الصينية، وشوية من الفلفل الألوان والأناناس المعلب أو الطازة زي ماتحبي. هتشوحي في معلقة زيت معلقة من التوم والجنزبيل المفرومين وتشوحي الفلفل الألوان والأناناس وتضيفلهم كمية مناسبة من صوص الحلو والحامض وتضيفي النودلز المسلوقة وتقلبي كل المكونات وتكون جاهزة للتقديم وتقدري تضيفي معاها مكعبات من الفراخ لو حبيتي.
7- بولونيز الإندومي أو رامن نودلز بولونيز
بولونيز الإندومي – bonappetit
دي بقى أولادك هيفرحوا بيها جدا، معظم الأطفال بيحبوا المكرونه السباجيتي بصوص البولونيز مع اللحمة المفرومة طب ليه منعملش نفس الطريقة مع النودلز إلي بيحبوها في السريع.
8- طريقة عمل سلطة الإندومي ( سلطة طرية أو مقرمشة)
طريقة عمل سلطة الإندومي – dinneratthezoo
من مميزات الرامن نودلز سريعة التحضير إنها ممكن تتاكل مقرمشة زي ماهي من الكيس بدون طبخ وده بيخليها مناسبة جدا للسلاطات لأنها بتعمل قرمشة لذيذة مع الخضار. تقدري كمان تضيفيها مسلوقة للخضراوات المفضلة ليكي وتقدميها مع دريسينج آسيوي من الصويا صوص وعصير الليمون وزيت السمسم وشوية من العسل لمذاق رائع.
9-مقرمشات النودلز: إندومي بالشكولاتة (أعشاش العصافير)
ودي الحقيقة فكرة هايلة تتعمل في مناسبات وأعياد ميلاد الأطفال والسبوع كمان.
سهلة وبسيطة وشكلها مميز كل إلي هتعمليه إنك هتكسري النودلز وهي مقرمشه بدون تسويه وتجمعي كل شويه مع بعض زي العش على صينيه عليها ورقة زبدة ومدهونة بزيت خفيف عشان يساعدك وإنتي بتفكيها من الصينية وتبدأي تنزلي عليها شوكولاته سايحة لحد متتغطى كويس. زيني كل عش بأي كانديز بيحبوها أولادك، صدقيني هيفرحوا بيها جدا
وبكده وبعد كل الوصفات والأفكار دي نكون غيرنا معالم الرامن نودلز سريعة التحضير المعروفة بالإندومي وحولناها لأطباق فيها عناصر غذائية متنوعه ونكهات لذيذة مختلفة جربوها وقولولنا رأيكم.
التعليق باستخدام حساب فيس بوك