محتويات المقال
صيف وحر يعني عصاير ومشروبات باردة تطري على القلب اللي كله آهات وحنين وتنعنش مكنونياتك اللي خلاص ماتت في الكمين وتنسي بيها اللي عايزة تعوضيه في التلاتين .. تكملة القافية بقى والعمق، هنعمل مشروبات باردة بالقهوة، ما هو القهوة مش للشتا ولا لأغاني منير وفيروز بس! والناس أصحاب شعار النفسية محتاجة كوباية قهوة من إيد عدلات، أكيد ما جربوش حلاوة مشروبات القهوة الباردة في الصيف، اللي حقيقي هتديكي نفس إحساس كوباية القهوة اللي بتدفيكي في الشتا.
وحلاوة مشروب القهوة الباردة في الصيف إنك مش محتاجة تستني على النار ولا في إحتمالية إن القهوة تفور وإنتي بتجري على ابنك تدخليه الحمام لا يتصرف ورا كنبة الصالون، لأ خالص مشروب القهوة الباردة دحلاب كده دحلاب، وله مليون وصفة وطريقة ولو مش عايزة حتى تتعبي نفسك خالص يا ست الكل، كيس قهوة سريع الذوبان ولبن ساقع ومية مسا على الناس الكويسة D: وبرضو جربي الوصفات اللي هنقول لك عليها في المقال ده وشاركينا رأيك في كومنت.
الوصفة الأولى لمشروب القهوة الباردة
ودي أسهل وأسرع وصفة مش محتاجة مكونات غريبة ولا محتاجة مجهود وكل المقادير موجودة عندك في البيت
هتحتاجي
- قهوة سريعة الذوبان
- لبن
- سكر
- مياه
- تلج
الطريقة:
- هتجيبي ٢ معلقة كبيرة من القهوة سريعة الذوبان وعليهم معلقتين أو ٣ مياه وتزودي سكر على حسب ذوقك واختيارك.
- هتقلّبي الخليط اللي فات بالمعلقة وبعدين تخفقيه بالمضرب كويس قوي لحد ما يعمل رغوة كثيفة ويبقى قوامه تقيل وتقدري تشيليه بالمعلقة.
- هتجيبي الكوبايات وتحطي معلقة كبيرة من الرغوة اللي عملتيها وتزودي لبن بارد وتلج.
الصيف عايز مناعة كمان، شوفي 5 مشروبات صيفية منعشة لتقوية وزيادة مناعتك
الوصفة التانية
ودي وصفة برضو سهلة وسريعة وهتطلع زي الكافيهات بالضبط
هتحتاجي
- ١/٤ كوب قهوة إسبرسو
- ١/٤ كوب لبن مكثف
- صوص كراميل
- ١/٤ كوب لبن
- تلج
الطريقة
هتخلطي الحليب المكثف مع القهوة الإسبرسو ومع اللبن العادي وصوص الكراميل وتزودي التلج وتضربي الخلاط. لو مش حابة إن التلج يبقى مجروش مع المشروب، ممكن تحطيه في الكوب وتزودي عليه الخليط.
اعرفي من هنا فوائد القهوة الخضراء لخسارة الوزن وأفضل أماكن بيعها
الوصفة التالتة
هتحتاجي
- ربع كوب قهوة سريعة التحضير
- ربع كوب كاكاو
- لبن
- مياه
- تلج
الطريقة
هتجيبي ٢ معلقة صغيرة كاكاو وتدوبيهم في مياه كويس، وتدوبي القهوة سريعة التحضير في مياه كويس وتزودي اللبن وتخلطي كله مع بعض كويس وتقدميه بارد مع التلج.
الصيف عايز آيس كريم، اعرفي طريقة عمل الآيس كريم بدون ماكينة في البيت
التعليق باستخدام حساب فيس بوك