الحساسية في الإنسان مش حاجة وحشة في حد ذاتها. يعني مش وحش إن الإنسان يبقى حساس وعنده مشاعر وبياخد مواقف من الناس اللي بتجرحه. المشكلة بس بتكون لو الحساسية دي أثرت على اجتماعياته أو الناس اللي حواليه أصلًا ما بيجرحوهوش وهو بياخد المسائل العادية بحساسية. وهنا لازم برضه أقول إن “الحاجات العادية” دي تعريفها بيختلف من شخص لشخص. يعني ممكن حاجة بالنسبة لك تبان عادية لكن بالنسبة لشخص تاني تكون مهمة، وبالعكس. عشان كده، خلينا نعرف ازاي نتعامل مع الرجل الحساس خصوصًا لو هو شريك الحياة.
افعلي ولا تفعلي
- ما تقوليش للشخص “انت حساس زيادة” / “انت من أبو لمس” / “أنا كل ما هاكلمك هتزعل أو هتتعصب”. الجمل دي أولًا بتحسس اللي قدامك إنه غلطان وفي وضع اتهام ولازم يدافع عن نفسه. ولو أحد الطرفين بدأ ياخد منحى دفاعي، المناقشة هتتقلب خناقة والموضوع اللي يتحل بكلمتين هياخد أسبوع نكد.
5 جمل تقوليهم لو خطيبك بيجرك للكلام عن العلاقة الحميمية
- بلاش تسفهي من الحاجة اللي أثارت حساسيته. مش فيه ناس لما تتفرج على الأفلام المؤثرة بتعيط؟ بالظبط كده! مش لازم نقول عليهم عبط أو نسفه من تأثرهم. حتى لو انتي شايفة إن الموقف اللي حصل واستدعى حساسية جوزك موقف عادي، فزي ما قلت لك، تعريف الحاجات بيختلف. وممكن انتي نفسك لو جايبة قلم روج جديد واتكسر، تتنرفزي وتعيطي ولو حد اتريق عليكي، هتتضايقي. ما ينفعش أبقى معتبرة اللي قدامي “قطته جمل” لإن الحقيقة إن كلنا عندنا قطط بنعاملها على إنها جمل.
- افهمي نمط الحساسية: فيه حساس بيعيط، وفيه حساس بيتنرفز ويكسر أي حاجة قدامه بدل ما يخبط دماغه في الحيطة. للأسف الشديد مجتمعنا بيربي الولد على إن ما ينفعش تبان له مشاعر غير الغضب والنرفزة والزعيق والعنف. الراجل ما يعيطش، الراجل يبقى جامد، ما تنشف ياض فيه إيه، وغيرها كتير من الجمل اللي سمعناها بتخلي الراجل استحالة يعيط لو مات له ميت حتى. ففي حين إن ممكن تكوني انتي مثلًا لما بتتأثري بتعيطي (وفيه رجالة كمان كده)، ممكن جوزك لما يتأثر يتعصب. التعامل مع الرجل الحساس العصبي بيبقى أحسن له النقطة الجاية دي.
مشاكل الأطفال: أسباب بتخلي ولادنا ما يحكوش على مشاكلهم
- حاولي تحتويه في مواقف معينة. مش باقول لك تيجي على نفسك طول الوقت. ومش باقول لك مطلوب منك إنتي كل المجهود. بس لما يبقى الشخص اللي قدامك على وشك فقد السيطرة على نفسه، تلافيه. قولي له ببساطة أنا شايفة إننا نؤجل الكلام لحد ما نهدى احنا الاتنين (ولازم تقولي احنا الاتنين عشان حساسيته).
التعامل المثالي مع الرجل الحساس
اتكلموا مع بعض واوصلوا لحل يرضيكم انتم الاتنين. اختاري طبعًا وقت ما يكونش فيه أي ضغوط أصلًا، مش ساعة الخناقة، هاقول له لا تعالى نتكلم دلوقتي بقى! اختاري وقت تكونوا نايمين كويس وواكلين كويس وهاديين ومش لسه راجع من الشغل أو هينزل الشغل. الحل اللي يرضيكي ممكن ما يرضيهوش، والحل اللي يرضيه، ممكن ما يرضيكيش. وعليه، لازم انتم الاتنين يكون عندكم استعداد تتفاوضوا. ولازم ما تنسيش نفسك خالص، يعني مش اللي يريحه لازم تعمليه حتى لو انتي مش عايزة. لا، انتي كمان من حقك تكوني مرتاحة في القرار ده.
أتمنى لك حياة سعيدة
التعليق باستخدام حساب فيس بوك