الطفل الحساس اللي بيتقال عليه دراما، واللي دايمًا محطوط عليه label “أبو لمس” اللي بيزعل ويتأثر من كل حاجة. ودايمًا طبعًا اللي حواليه بالذات من الكبار شايفينه بيبالغ أو بيتدلع، لكن في الحقيقة هو لا بيبالغ ولا بيتدلع. الأطفال الحساسة في السن الصغير مشاعرهم هي اللي بتكون متحكمة فيهم. ربنا خلقهم كده، بيتوجعوا بزيادة ومشاعرهم دايمًا عالية قوي في الفرح وفي الزعل. عشان كده، بيحاولوا يوصّلوا لنا اللي حاسين بيه بالعياط الكتير. ردود أفعالنا بقى غالبًا بتكون حاجة من الاتنين: يا نزعق ونقول له يبطل عياط من غير ما نتفهمه، يا ننفذ له اللي هو عايزه على طول عشان برضه يبطل عياط. لكن إيه أحسن طريقة للتعامل مع الطفل الحساس اللي تريحه وتريح اللي حواليه؟
الرجل الحساس .. طريقة التعامل مع جوزك الحساس
طريقة التعامل مع الطفل الحساس
-
صدقي اللي حاسه:
مشاعر الطفل هي أكتر حاجة حقيقية وما فيهاش صح وغلط حتى لو بالنسبة لنا مالهاش مبرر، فبلاش نقول له الموضوع مش مستاهل بلاش أفورة. لإنه يضطر إما يكبت مشاعره ويحس إنها غلط أو يزوّد فيها وندخل مع بعض في صراع قوي. فنحاول نعمل إقرار لمشاعره ونبدل كلامنا “أه أنا فاهمة إنك زعلان قوي. تحب تيجي في حضني؟”
صفات الطفل العدواني وطريقة التعامل معاه
-
أسامي المشاعر:
ساعديه يفهم هو حاسس بإيه، لو بيعيط قوي ومش عايز يسمعك، قولي له بهدوء إنك مش بتقدري تفهمي اللي مزعله وهو بيعيط ومش هتعرفي تساعديه. وأول ما يبدأ يشرح لك، سمّي على طول مشاعره زي “انت متضايق عشان أخوك أخد لعبتك” أو “انتي خايفة من القطة وعايزاها تمشي” لإن تسمية المشاعر بتعلّمهم بالتدريج يعبروا عن نفسهم بطريقة أفضل.
-
ساعديه يدور على حل:
بعد ما صدقنا مشاعره وإديناه فرصة يعبر عنها، ما ينفعش نسيبه كده من غير توجيه، هنا ييجي دور إنه يدور بنفسه على حل للمشكلة ده بدل ما يزعل أو يعيط ويعبر عن شعوره وبس. زي إننا نقول له “واضح إنها فعلًا واجعاك” ونسأله “تحب تغسلها بمياه ولّا تحط بلاستر؟”
-
ما ترجعيش في كلامك:
أوقات كتر زعل وحساسية الطفل بيخلينا دايمًا بنحسس عليه عشان ما يزعلش، وهو ده اللي بيخلّي الطفل الحساس يكون متدلع. عشان كده، مهم إننا ما نستسلمش للعياط والزعل الكتير ونرجع في كلامنا عشان نراضيه.
وافتكري دايمًا إن مش وظيفتنا نغيّر ولادنا أو نحميهم من أي نوع من أنواع المشاعر، لكن وظيفتنا هي تجهيزهم للي هيشوفوه في الدنيا والتعامل مع المشاعر دي بصورة صحية.
التعليق باستخدام حساب فيس بوك