مع دخلة الشتاء، ومع كل زيارة بروح فيها لبيت أمي بفضل أدور عليه بمنتهى الحماس على رخامة المطبخ، وأسأل “الحاجة” هو اللفت لسه ما طلعش ولا إيه؟ البرطمان اللي بيهون عليا مصاعب الحياة، ويخلي أي أكلة يتاكل جنبها لها طعم ومذاق مختلف، برطمان اللفت المخلل الوردي اللي بيطبطب على قلبي وعلى نفسي المسدودة أحيانًا يعني!

مخلل اللفت البيتي من أجمل وأطعم المخللات إللي ممكن تاكلوها، وأفتكر مفيش بيت فيكي يا مصر بيعدي عليه موسم اللفت من غير ما يعمله برطمان لفت مخلل يسحب منه جنب أي أكلة. بيفتح النفس وبيحول أي أكلة مهما كانت بسيطة لوجبة مفرحة وسعيدة. عشان كده، أنا جايبة لكم النهارده أبسط وأسهل طريقة لتخليل برطمان السعادة بتاع الأكيلة في البيت.

طريقة تخليل اللفت البيتي

المقادير

• 1 كيلو لفت مغسول
• من 1/4 لـ 1/2 كوب ملح يفضل ملح خشن
• 1/4 كوب من الخل الأبيض
• 3 قرون فلفل أحمر حار (اختياري)
• 1 حبة بنجر صغيرة الحجم
• ماء (يفضل يكون مغلي ومبرد)
• 1 معلقة كبيرة حبوب الفلفل الإسود
• 2 ورقة لورا

الطريقة

• قطعي حبات اللفت المغسولة لأصابع أو مكعبات كبيرة نسبيًا، ده هيساعد إنها تحافظ على قرمشتها.
• ضعي اللفت المقطع في مصفاة ورشيه بالملح وسيبيه لمدة 5 ساعات ويفضل ليلة كاملة، هتلاحظي بعدها تغير في لون اللفت وهينزل منه كميه من السوائل.
• في برطمان زجاجي معقم، رصي اللفت مع كل السوائل بتاعته، أهم ملحوظة هي إنك تكبسيه كويس جدًا داخل البرطمان بحيث تقللي تمامًا الفراغات، بين طبقات اللفت هتضيفي شرايح البنجر المقطعة، ورق اللورا، الفلفل الحار، وحبوب الفلفل الإسود.
• صبي الخل، والماء المبرد فوق اللفت لحد ما يغمره تمامًا ويغطيه بحوالي 2 سم، اقفلي البرطمان بإحكام وسيبيه لمدة من 10 أيام لأسبوعين قبل ما يكون استوى وبقى قابل للأكل.
• قدمي اللفت المخلل مع شرايح الليمون وبألف هنا.

راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.