طريقة عمل أشهر صوصات المطاعم .. أجمد 10 فيهم

صوصات المطاعم بتكون دايمًا لها طعم مختلف، وهي إللي بتميّز أكلات المطاعم وبتخلينا نرجع لها تاني ونشتاق لطعمها. لا السينابون تنفع من غير صوص الجبنة الكريمي وصوص الكراميل، ولا البرجر ينفع من غير صوص البيج ماك، ولا المكرونة تحلى من غير صوص الفيتوشيني، ولا الناتشوز تنفع من غير صوص الجبنة، ولا بيتزا السي فوود تظبط من غير صوص الرانش!

الصوصات دايمًا بتكمّل الأكلات وتخليها تلمع وتبان وإضافتها لأكلات كتير بتكون ساعات مهمه وأساسية ومن غيرها الأكلة ما تظبطش أبدًا. عشان كده، النهارده جيبنا لك أسرار 10 من أشهر صوصات المطاعم إللي ما يختلفش عليها اتنين بطرق ومكونات سهلة وبسيطة عشان تحضّري لعيلتك أكلات المطاعم من مطبخك، وتسمعي أحلى جملة ممكن تتقال: “بجد يا ماما دي أحلى من إللي بنشتريها من بره!”

صوص الرانش

طريقة عمل صوص الرانش – المصدر diabetesstrong

مقادير صوص الرانش

• 1/2 كوب مايونيز
• 1/2 كوب ساور كريم أو كريمة حامضة
• 1/4 كوب لبن رايب
• ملح وفلفل
• 1/2 معلقة صغيرة بودرة بصل
• 1/2 معلقة صغيرة بودرة توم
• 1/2 معلقة صغيرة شبت مجفف (يستبدل بمعلقة كبيرة شبت طازة مفروم)
• 1/2 معلقة صغيرة بقدونس مجفف (يستبدل بمعلقة كبيرة بقدونس طازة مفروم)
• 1 معلقة كبيرة توم معمر مفروم (يمكن الاستغناء عنه لو غير متوفر)
• 1 معلقة كبيرة عصير ليمون

طريقة عمل صوص الرانش

• في محضرة الطعام، اخلطي كل المكونات مع بعض، واحفظيها في برطمان زجاجي معقم في التلاجة.
• تستخدم الرانش كدريسينج للسلطات، أو إضافة للبيتزا مع السي فود أو الفراخ، أو كسبريد للسندويتشات.

صلصة البيتزا

طريقة عمل صلصة البيتزا – المصدر natashaskitchen

مقادير صلصة البيتزا

•  1 طماطم معلبة مقشرة أو 5 حبات طماطم طازة مقشرة ومفرومة
• 1 معلقة صغيرة من السكر
• 1 معلقة كبيرة معجون الطماطم
• 1/4 كوب من أوراق الريحان الطازة
• ملح وفلفل
• 3 فصوص توم مفرومين
• زيت زيتون

طريقة عمل صلصة البيتزا

• في طاسة عميقة، شوّحي التوم المهروس في معلقتين من زيت الزيتون، لحد ما تطلع ريحته. بعدها ضيفي معجون الطماطم وقلبيه كويس مع التوم.
• ضيفي الطماطم المعلبة واهرسيها كويس بالشوكة أو بهرّاسة البطاطس، وسيبي فيها بعض القطع البسيطة عشان تدي قوام خشن.
• سيبي الطماطم على نار عالية لحد ما تغلي، وبعدين هدّي النار وسيبيها تتسبك ويتقل قوامها لمدة 15 دقيقة بدون ما تغطيها.
• بعد ما تتقل الصلصة، اطفي النار، وضيفي الملح والفلفل وأوراق الريحان. وبكده تكون جاهزة عشان تفرديها على عجينة البيتزا.

صوص السويت شيلي

طريقة عمل صوص السويت شيلي – المصدر leelalicious

مقادير صوص السويت شيلي

• 1 كوب ماء
• 1 كوب سكر أبيض
• 1/2 كوب خل الرز (يستبدل بخل أبيض)
• 1/4 كوب فلفل أحمر حار مفروم
• 1 معلقة صغيرة ملح
• 2 معلقة كبيرة صويا صوص
• 1 معلقة كبيرة نشا مذوبة في ربع كوب ماء

طريقة عمل صوص السويت شيلي

• في حلة على النار، ضيفي كل المكونات ما عدا النشا المذوبة في الماء، ارفعيها على نار هادية مع التقليب المستمر لمدة 15 دقيقة لحد ما يذوب السكر وتتجانس المكونات مع بعض.
• ضيفي النشا المذوب في الماء وقلبي المزيج كويس، وسيبيه على النار مع التقليب لحد ما يسمك القوام، وخدي في اعتبارك إنه القوام هيتقل بعد ما يبرد الصوص.
• سيبي الصوص يبرد قليلا، وصبيه في برطمان زجاجي معقم وسيبيه بعدها يبرد تمامًا قبل دخّلوه التلاجة.
• يحفظ في التلاجة لمدة 3 أسابيع فقط.

صوص البيج ماك

صوص البيج ماك – المصدر 30minutesmeals

مقادير صوص البيج ماك

• 1 كوب مايونيز
• 2 معلقة كبيرة خل عنب أبيض (يستبدل بخل أبيض)
• 2 معلقة صغيرة مستردة
• 1 معلقة صغيرة عسل أبيض
• 2 معلقة كبيرة بصل أبيض مفروم ناعم جدًا
• 3 معالق كبيرة مخلل خيار مفروم (معلب وبيكون له نكهة مميزة ومسكرة وهو أساسي في نكهة الصوص)
• 1/2 معلقة صغيرة بودرة توم
• 1/2 معلقة صغيرة بودرة بصل
• 1/2 معلقة صغيرة بابريكا حلوة
• 1/2 معلقة صغيرة بابريكا مدخنة (يمكن استبدالها ببابريكا عادية)

طريقة عمل صوص البيج ماك

• في بولة كبيرة، اخلطي كل المكونات مع بعض، وسيبيها في التلاجة على الأقل ساعة قبل الاستخدام عشان الأطعمة تتداخل ومذاق الصوص يكون أقوى.
• افردي طبقة من الصوص مع ساندويتشات البرجر لنكهة زي المطاعم بالظبط.

صوص السيزر

طريقة عمل صوص السيزر – المصدر karissasvegankitchen

مقادير صوص السيزر

• 3/4 كوب مايونيز
• 1 شريحة أنشوجة مع معلقة صغيرة من زيت الأنشوجة
• ملح وفلفل إسود
• 1 معلقة كبيرة خل أبيض
• عصير نص ليمونة
• 1 فص توم مفروم ناعم
• 1/4 كوب جبنة بارميزان مبشورة
• 3 معالق كبيرة زيت زيتون

طريقة عمل صوص السيزر

• في محضرة الطعام، اخلطي كل المكونات لحد ما توصلي لقوام كريمي ناعم.
• ضيفي صوص السيزر لأوراق مع مكعبات التوست المحمص ورشة من الجبنة البارميزان.

صوص فيتوشيني ألفريدو (المكرونة الوايت صوص)

طريقة عمل الوايت صوص – المصدر copykat

مقادير الوايت صوص

• 2 فص توم مهروس
• 2 كوب كريمة طهي
• 3 معالق كبيرة زبدة
• 1 كوب جبنة بارميزان مبشورة
• ملح وفلفل
• 2 معلقة كبيرة بقدونس مفروم

طريقة عمل الوايت صوص

• في طاسة على نار متوسطة، دوّبي الزبدة وضيفي التوم المهروس وقلّبيه لحد ما تظهر ريحته ويصفر لونه.
• ضيفي كريمة الطهي للتوم، وسيبيها تغلي لمدة 5-8 دقايق لحد ما يتقل قوامها وتتكثف.
• ضيفي الجبنة البارميزان واخلطيها كويس مع الكريمة على نار هادية، وضيفي الملح والفلفل والبقدونس.
• كده الصوص جاهز تضيفي له المكرونة المسلوقة مع شوية من ماء السلق عشان تحضّري أحلى مكرونة بصوص الألفريدو الأصلي.

اعرفي هنا 6 وصفات بمكرونة بينا غير المكرونة بالبشاميل

صوص الجبنة للناتشوز

طريقة عمل صوص الجبنة الناتشو – المصدر budgetbytes

عشان تعرفي طريقة تحضير صوص الجبنة بالتفصيل، ادخلي هنا

صوص الكراميل

طريقة عمل صوص الكراميل – المصدر sallysbakingaddiction

مقادير صوص الكراميل

• 1 كوب سكر
• 4 معالق كبيرة زبدة في حرارة الغرفة
• 3/4 كوب كريمة
• 1 معلقة صغيرة فانيليا
• رشة ملح

طريقة عمل صوص الكراميل

• في كاسارول على النار، ضيفي كل المكونات مع بعض، وخلي النار متوسطة، وحركي المزيج كل شوية عشان تتأكدي من ذوبان السكر تمامًا.
• بعد ذوبان السكر، سيبي المزيج على نار توسطة لحد ما يتقل قوامة لمدة 5-8 دقايق، وخدي في اعتبارك إن القوام هيتقل بعد ما يبرد الصوص.
• صبي الصوص في برطمان معقم واحفظيه في التلاجة بعد ما يبرد تمامًا لمدة شهر.
• قدميه فوق السينابون أو الآيس كريم أو البراونيز أو أي نوع حلويات تحبيه.

صوص الشوكولاتة

طريقة عمل صوص الشوكولاتة – المصدر pinterest

مقادير صوص الشوكولاتة

• 200 جم شوكولاتة شيبس (أي نوع تحبيه بالحليب أو شوكولاتة غامقة)
• 250 مل كريمة خفق
• 1 معلقة كبيرة زبدة
• 1 معلقة صغيرة فانيليا

طريقة عمل صوص الشوكولاتة

• في بولة على النار، ضيفي الشوكولاتة والكريمة، وعلى نار هادية قلبيهم باستمرار لحد ما تدوب الشوكولاتة تمامًا وتتجانس المكونات.
• بعد ما توصلي لقوام متجانس، ضيفي معلقة الفانيليا والزبدة، وسيبيها تدوب على حرارة المزيج.
• صبي الصوص في برطمان معقم ويحفظ في التلاجة لمدة أسبوعين، قبل الاستخدام، دفي الصوص في الميكروويف لمدة 30 ثانية فقط عشان يكون قوامه مناسب.
• قدميه فوق السينابون أو الآيس كريم أو البراونيز أو أي نوع حلويات تحبيه.

اعرفي من هنا طريقة عمل الهوت شوكليت

صوص السينابون (الكريم شيز)

طريقة عمل صوص السينابون – المصدر themodernproper

مقادير صوص السينابون

• 1 كوب جبنة كريمي في حرارة الغرفة
• 1/2 كوب زبدة في حرارة الغرفة
• 1 معلقة كبيرة فانيليا
• 2 كوب سكر بودرة منخول
• من معلقة لمعلقتين لبن حليب

طريقة عمل صوص السينابون

• باستخدام المضرب الكهربائي، اخلطي الزبدة والجبنة الكريمي على سرعة متوسطة لحد ما يبقى قوامهم كريمي.
• ضيفي السكر بودرة بالتدريج واستمري في الخفق، لحد ما يندمج السكر تمامًا، ضيفي الفانيليا واللبن لحد ما يبقى القوام مناسب.
• يستخدم الصوص كفروستينج للسينابون أو لأنواع كتير من الكيكات والحلويات.
• ادخلي على اللينك ده عشان تعرفي طريقة عمل السينابون بالتفصيل.