طريقة عمل أكلات بالكبد والقوانص

كبد وقوانص الفراخ من المكونات الاقتصادية البسيطة اللي ممكن تكون مش واخدة حقها، يمكن لإن ستات كتير بتخاف إنها ما تعرفش تنضفها كويس أو إن يكون فيها ريحة زفرة غير محببة، ويمكن لإن بنحس إن الأكلات اللي ممكن ندخّلها فيها محدودة شوية، ويمكن كمان عشان البعض ما بيعرفش يسويها بطريقة سليمة فبتطلع ناشفة وخصوصًا الكبد.

النهارده، هنديكي شوية أفكار لوصفات بسيطة وجديدة واقتصادية باستخدام كبد وقوانص الفراخ، هتنفعك لو انتي حابة توفري شوية في مصروف البيت أو لو كنتي زهقانة من الفراخ نفسها واللحمة، أو لو حتى كنتي من عشاق كبدة الفراخ، وحابة تحضريها بطرق جديدة ومختلفة. لكن في الأول خلينا نتكلم شوية عن خطوات تنضيف الكبد والقوانص وتجهيزها للطبخ.

خطوات تنضيف وتجهيز الكبد والقوانص

• اتأكدي من جودة المصدر اللي بتشتري منه، ولو بتشتري الكبد والقوانص طازة أو حتى مجمدة، اتأكدي من سلامة العبوة والتغليف.
• اشطفي الكبد والقوانص تحت ماء جاري وانقعيها لمدة 10 دقايق في ماء وكمية وفيرة من الملح وعصرة ليمون.
• استخدمي عصير الليمون وابعدي تمامًا عن الخل لإن الخل بيأثر على نسيج الكبدة وبيخليها تتهري.
• بعد شطف الكبد والقوانص من الماء والملح والليمون، صفيها كويس واتخلصي من الدهون الزيادة اللي بتغلفها خصوصا القوانص، وصفيها تمامًا.
• تقدري كمان تنقعي كبدة الدجاج في شوية من اللبن الحليب لمدة 30 دقيقة للتخلص من أي روايح أو زفرة.

كبد وقوانص الفراخ بالزبدة والتوم والروزماري

المصدر simplydelicious

المقادير

• 1/2 ك كبد وقوانص فراخ
• 50 جم زبدة
• 1 معلقة كبيرة زيت نباتي
• 2 معلقة صغيرة توم مهروس
• 1 معلقة كبيرة روزماري فريش مفروم ناعم
• ملح وفلفل أسود
• 1/4 معلقة صغيرة جوزة الطيب
• 1/2 كوب مرقة خضار
• بشر ليمونة

طريقة عمل الكبد والقوانص بالزبدة والتوم والروز ماري

• سخني طاسة واسعة على النار وضيفي معلقة كبيرة من الزيت النباتي، وشوحي الكبد والقوانص كويس على نار عالية (بدون ما تزحمي الطاسة)
• بعد ما الكبد والقوانص تاخد لون دهبي، ضيفي التوم المهروس، والروزماري وسيبي رشة منه للتزيين.
• ضيفي مرقة الخضار وغطي الطاسة وسيبيها على نار هادية لحد ما تستوي تمامًا.
• ضيفي الزبدة، بشر الليمون، الملح والفلفل وجوزة الطيب، واطفي النار.
• قدميها مع رشة من الروزماري والعيش المحمص.

 كبدة الفراخ المقلية بالطحينة

المصدر irvineschicken

المقادير

• 1/2 ك كبدة فراخ
• 1 بيضة
• 1/2 كوب لبن
• 1/2 كوب دقيق
• 1/2 كوب بقسماط ناعم
• 1 معلقة كبيرة بودرة توم
• 1 معلقة صغيرة كمون
• 1/2 معلقة صغيرة شطة (اختياري)
• ملح وفلفل أسود
• زيت غزير للتحمير
• عيش فينو وسلطة طحينة للتقديم

طريقة عمل الكبدة المقلية

• في بولة، اخلطي البيض واللبن مع رشة من الملح والفلفل.
• في كيس بلاستيك محكم الغلق (zipper bag) اخلطي الدقيق والبقسماط والبهارات الجافة مع بعض.
• في طاسة عميقة، سخني الزيت النباتي للتحمير لحد ما يوصل حرارته 190 درجة.
• حطي كبدة الفراخ في مزيج البيض واللبن لحد ما تتغلف كويس، ومنها انقليها قطعة قطعة للكيس عشان تتغلف بالدقيق والبقسماط ورجي الكيس كويس كل مرة، ومنها على الزيت الغزير.
• صفي الكبد على ورق مطبخ، وحطيها في الساندويتشات مع صوص الطحينة.

طاجن كبد وقوانص الفراخ بالبصل

المصدر southernkitchen

المقادير

• 1 ك كبد وقوانص فراخ
• 1 ك بصل مقطع جوانح
• 5 فصوص توم شرايح
• 2 معلقة صغيرة سبع بهارات
• 2 معلقة صغيرة كزبرة ناشفة
• 1 معلقة كبيرة صلصة طماطم
• ملح وفلفل أسود
• 1 معلقة كبيرة سمنة بلدي
• 1/2 معلقة صغيرة جوزة الطيب
• 1/2 معلقة صغيرة قرفة
• 2 كوب مرقة

طريقة عمل طاجن الكبد والقوانص بالبصل

• في بولة كبيرة، افركي البصل المقطع كويس مع كل البهارات والملح والفلفل.
• ادهني طاجن فخار بمعلقة كبيرة من السمنة البلدي واخلطي البصل بالبهارات مع الكبد والقوانص في الطاجن.
• ضيفي كوب واحد من المرقة ومعلقة الصلصة وغطي الطاجن بالفويل ودخليه الفرن المتسخن على حرارة 200 لحد ما تستوي الكبد والقوانص تمامًا ويدوب البصل، وزودي مرقة لو احتاجتي.
• قدمي الطاجن سخن مع الرز الأبيض أو العيش البلدي.

المكرونة الحارة بكبدة الفراخ والكزبرة

المصدر whatsfordinner

المقادير

• 1/2 ك كبدة فراخ
• 250 جم مكرونة مسلوقة
• 1 بصلة مفرومة ناعم
• 5 فصوص توم مهروسين
• 1 قرن فلفل أحمر حار
• 1 معلقة كبيرة صلصة طماطم
• 2 كوب عصير طماطم طازة
• 1 حزمة كزبرة خضراء مفرومة
• ملح وفلفل إسود
• 1 معلقة كبيرة كزبرة ناشفة
• عصير ليمونة

طريقة عمل المكرونة الحارة بكبدة الفراخ

• في طاسة على النار سخني زيت الزيتون وشوحي كبدة الفراخ لحد ما يتغير لونها.
• ضيفي البصل والتوم والفلفل الحار لحد ما تطلع ريحتهم، بعدها ضيفي الكزبرة الناشفة وقلبيها كويس.
• ضيفي صلصة وعصير الطماطم وسيبي المزيج يغلي على نار هادية لحد ما تستوي الكبد والقوانص.
• ضيفي المكرونة، والملح والفلفل وقلبيها مع الصلصة وأخيرًا ضيفي الكزبرة الخضراء وعصرة الليمون واطفي النار.
• قدميها ساخنة مع المزيد من الفلفل الحار.

سوتيه كبدة الفراخ مع الفواكة المجففة ودبس الرمان

unilever

المقادير

• 1/2 ك كبدة فراخ
• 1/4 كوب دبس رمان
• 1 بصلة مفرومة ناعم
• 4 فصوص توم مفرومين
• 1 كوب فواكة مجففة مشكلة مقطعة مكعبات (مشمشية-قراصيا-زبيب)
• 1/2 كوب فلفل ألوان مقطع مكعبات صغيرة
• ملح وفلفل أسود
• 1 معلقة صغيرة قرفة
• 2 معلقة صغيرة بابريكا
• 3 معالق كبيرة زبدة
• 1 معلقة كبيرة خل تفاح
• كزبرة خضراء للتقديم

طريقة عمل سوتيه كبدة الفراخ

• في طاسة واسعة على النار، سخني معلقة من الزيت النباتي مع معلقة من الزبدة، ضيفي البصل والتوم وقلبيهم لحد ما تظهر ريحتهم.
• ضيفي البهارات والملح والفلفل للبصل، بعدها ضيفي الفلفل الألوان والكبد والقوانص وقلبيها معاهم كويس لمدة دقيقتين.
• ضيفي الفواكه المجففة، خل التفاح، دبس الرمان وقلبهم كويس مع باقي المكونات، هدي النار وغطي الطاسة وسيبي المزيج على نار هادية لحد ما تستوي الكبد ويتكون صوص تقيل مسكر ولذيذ، ولو احتاجتي ممكن تخفيه بشوية من المرقة أو الميه.
• زيني برشة من الكزبرة الخضراء وقدميها مع العيش اللبناني.